រូបភាព៖ CNN

វ៉ាក់ស៊ាំងចិនរបស់ Sinovac បង្ហាញប្រសិទ្ធភាព ពេលធ្វើតេស្តនៅប្រេស៊ីល។ អភិបាល São Paulo បានប្រកាសកាលពីថ្ងៃពុធថាវ៉ាក់ស៊ាំងកូវីដ ១៩ របស់ក្រុមហ៊ុនចិន Sinovac មានប្រសិទ្ធភាពជាង ៥០ ភាគរយ ប៉ុន្តែពន្យារពេលការចេញផ្សាយទិន្នន័យលម្អិតស្តីពីប្រសិទ្ធភាពនៃវ៉ាក់ស៊ាំងដែលបង្កើតដោយ Butantan Institute ដែលមានមូលដ្ឋាននៅទីក្រុង São Paulo ក្នុងភាពជាដៃគូជាមួយក្រុមហ៊ុនឱសថចិន Sinovac។ នេះបើយោងតាមសេចក្តីរាយការណ៍របស់ Global Times កាលពីថ្ងៃពុធនេះ។

លោក Dimas Covas នាយក Butantan Institute ក៏បានឱ្យដឹងដែរថាការសិក្សាដំណាក់កាលទី ៣ បានបង្ហាញថាវ៉ាក់ស៊ាំងនេះមានប្រសិទ្ធភាព។ ផងដែរ លោក Covas ក៏បានសង្កត់ធ្ងន់ដែរនៅក្នុងសន្និសីទកាសែតមួយកាលពីថ្ងៃពុធថា "យើងបានឈានដល់កម្រិតមួយនៃប្រសិទ្ធភាព ៥០% ដែលអនុញ្ញាតឱ្យដំណើរការស្នើសុំការសង្គ្រោះបន្ទាន់ មិនថានៅក្នុងប្រទេសប្រេស៊ីល ឬនៅក្នុងប្រទេសចិនទេ"។

លោក Covas  បានឱ្យដឹងទៀតថា កាលដែលការបង្ហាញទិន្នន័យនេះត្រូវបានពន្យារពេលគឺដោយសារមានប្រយោគដែលជាលក្ខខណ្ឌនៅក្នុងកិច្ចសន្យាដែលបានចុះហត្ថលេខារវាង Sinovac និងអភិបាល São Paulo។

សូមជម្រាបថា ទាំងសាធារណៈចិននិងប្រេស៊ីលកំពុងយកចិត្តទុកដាក់ខ្ពស់ចំពោះលទ្ធផលដែលនឹងត្រួសត្រាយផ្លូវក្នុងដើម្បីនឹងធ្វើការចុះឈ្មោះ និងទទួលបានការអនុញ្ញាតដាក់ឱ្យប្រើប្រាស់ទាំងក្នុងប្រទេសចិននិងប្រេស៊ីល។

ជាការឆ្លើយតប ក្រុមអ្នកវិភាគបានបង្ហាញថាលទ្ធផលពួកគេនឹងបង្ហាញត្រូវបានគេរំពឹងថានឹងបន្ថែមនូវទំនុកចិត្តកាន់តែខ្លាំងឡើងដែលវ៉ាក់ស៊ាំងដែលអភិវឌ្ឍដោយប្រទេសចិនអាចជួយបញ្ចប់ការរាតត្បាតនេះ។

រដ្ឋលេខាធិការក្រសួងសុខាភិបាល São Paulo លោក Jean Gorinchteyn មានប្រសាសន៍ថាប្រសិទ្ធភាពរបស់ Sinovac ដែលបានគណនាដោយការសិក្សារបស់ Butantan Institute គឺខុសគ្នាពីប្រសិទ្ធភាពដែលបានបញ្ជាក់នៅក្នុងប្រទេសដទៃទៀត បើធៀបនឹងវ៉ាក់សាំងកំពុងដាក់ឱ្យប្រើប្រាស់។ យោងតាមអ្នកនាំពាក្យរដ្ឋាភិបាល ភាពខុសគ្នានេះនៅក្នុងទិន្នន័យពីបណ្តាប្រទេសផ្សេងៗគ្នាបណ្តាលឱ្យមានការពន្យាពេលក្នុងការបង្ហាញព័ត៌មានចុងក្រោយ។

រីឯនៅអារ៉ាប់រួមអេមីរ៉ាតវិញ ក្រសួងសុខាភិបាលអារ៉ាប់រួមអេមីរ៉ាតបាននិយាយកាលពីដើមខែធ្នូថាវ៉ាក់ស៊ាំងរបស់ក្រុមហ៊ុនផលិតឈានមុខគេរបស់ចិនមួយគឺ Sinopharm បានបង្ហាញប្រសិទ្ធិភាពដល់ទៅ ៨៦% ហើយ Sinopharm បានប្រាប់កាសែត Global Times ថាខ្លួនបានបញ្ជូនទិន្នន័យទាំងអស់ពីការសាកល្បងដំណាក់កាលចុងក្រោយទៅនិយតករឱសថចិន។

គួរបញ្ជាក់ផងដែរថា វ៉ាក់ស៊ាំងកូវីដ ១៩ បានបង្កើតឡើងដោយ Sinopharm និង Sinovac ត្រូវបានរំពឹងថាជាវ៉ាក់ស៊ាំងដំបូងគេដែលទទួលបានការយល់ព្រមជាផ្លូវការសម្រាប់ការប្រើប្រាស់នៅក្នុងប្រទេសចិន ដោយផ្អែកលើការពិចារណាលើបច្ចេកទេសយ៉ាងល្អិតល្អន់ និងដំណើរការអភិវឌ្ឍន៍យ៉ាងយកចិត្តទុកដាក់ ចាប់តាំងពីផ្តើមលើកដំបូង៕

ដោយ ហៃ សុចិន្តា

ប្រភព Global Times