ជឿថាបងប្អូនភាគច្រើនធ្លាប់តែដឹងថាអ្នកចូលញ៉ាំញ៉ាំផ្អែមអាចកើតទឹកនោមផ្អែម ប៉ុន្តែមិនធ្លាប់ដឹងថាញ៉ាំប្រៃក៏អាចកើតទឹកនោមផ្អែមនោះទេ។ តាមពិតទៅរសជាតិទាំង២នេះ ទាំងប្រៃ ហើយនិងផ្អែម គឺមានទំនាក់ទំនងជាមួយគ្នា ហើយហានិភ័យក្នុងការកើតទឹកនោមផ្អែមគឺមានដូចគ្នា។

បើផ្អែកទៅតាមការចុះផ្សាយរបស់ប្រភព allrecipes បានលើកឡើងពីសម្តីរបស់វេជ្ជបណ្ឌិត Tricia Pingel អ្នកជំនាញខាងផ្នែកចំណីអាហារ បាននិយាយថា នៅក្នុងការសិក្សាបានបង្ហាញថា ការទទួលទានអាហារសម្បូរជាតិប្រៃពិតជាអាចនាំសុខភាពឱ្យប្រឈមទៅនឹងការកើតជំងឺទឹកនោមផ្អែមប្រភេទទី ២ នាពេលអនាគតបានមែន។

មូលហេតុដែលបង្កឱ្យមានទំនាក់ទំនងជាតិអំបិល (សូដ្យូម) ផ្សារភ្ជាប់នឹងការកើតជំងឺទឹកនោមផ្អែម​ គឺដោយសារតែ សារជាតិអំបិល (សូដ្យូម​) មាន​តួនាទី​គ្រប់គ្រង​តុល្យភាព​ជាតិ​ទឹក​ក្នុង​ខ្លួនរបស់មនុស្ស និង​ជួយ​រក្សា​បរិមាណ​ឈាម ក៏ដូចជា​សម្ពាធ​ឈាមឱ្យស្ថិតនៅកម្រិត​ធម្មតាផងដែរ។

ប្រសិនណាបើទទួលទានអំបិលច្រើនពេក គឺអាចបង្កើនកម្រិតសម្ពាធឈាមក្នុងខ្លួនបណ្តាលឱ្យជាតិទឹកកើនឡើងនៅគ្រប់ផ្នែកនៃសរីរាង្គកាយ ធ្វើឱ្យចេញអាការដូចជា ហើមជើង បញ្ហាសុខភាពផ្សេងៗ ជះផលអាក្រក់តម្រងនោម និងសម្ពាធឈាម​​ អាចឈានដល់ការកើតជំងឺទឹកនោមផ្អែមប្រភេទ២។

យ៉ាងណាមិញ នៅក្នុងទម្លាប់ប្រចាំថ្ងៃដើម្បីកាត់បន្ថយជាតិប្រៃ ជាអំបិលឱ្យនៅតិចបំផុត ទីមួយ ក្នុងការចម្អិនម្ហូបអាហារប្រចាំថ្ងៃ អ្នកគួរព្យាយាមប្រើអំបិលតិចបំផុត អ្នកអាចពិបាកនៅពេលដំបូងៗតែយូរទៅហ្នឹងទម្លាប់ជាមិនខាន។ ទីពីរ គួរកាត់បន្ថយ ឬចៀសវាងញ៉ាំអាហារ៥ក្រុមខាងក្រោម៖

១. អាហារកែច្នៃ៖ មានដូចជាអាហារកំប៉ុង អាហារដែលចម្អិនស្រាប់ៗ អាហារផ្អាប់...ពីព្រោះអាហារទាំងនេះសុទ្ធតែប្រើប្រាស់អំបិលច្រើនដើម្បីរក្សាទុកបានយូរ។

២. សាច់ប្រៃ៖ ដូចជាប្រភេទសាច់ប្រឡាក់ស្រាប់ សាច់ងៀត សាច់ក្រក...សុទ្ធតែជាប្រភពនៃអំបិលដែលអ្នកគួរចៀសវាង ឬកាត់បន្ថយក្នុងការញ៉ាំឱ្យនៅតិចបំផុត។

៣. ទឹកជ្រលក់ផ្សេងៗ និងទឹកស៊ីអ៊ីវ៖ អាហារទាំងនេះសុទ្ធតែជាប្រភពនៃអំបិល ជាតិប្រៃ សូដ្យូម គួរកាត់បន្ថយក្នុងការញ៉ាំ។

៤. ឈីស៖ ក៏ជាប្រភពនៃអំបិលដែលអ្នកគួរតែចៀសវាងដែរ។

គូសបញ្ជាក់ផងដែរថា នៅក្នុងការសិក្សាមួយបានរកឃើញថា អ្នកចូលចិត្តញុំាប្រៃ មានការកើនឡើងហានិភ័យនៃជំងឺទឹកនោមផ្អែមដល់ទៅ ៤៣% និងចំពោះអ្នកទម្លាប់ញុំាប្រៃខ្លាំង អាចមានឱកាសកើតទឹកនោមផ្អែមរហូតដល់ ៥៨% ឯណោះ។ មានន័យថា អ្នកដែលចូលញ៉ាំប្រៃ គឺមានហានិភ័យក្នុងការកើតទឹកនោមផ្អែមខ្ពស់ជាងអ្នកញ៉ាំផ្អែមផង៕

អត្ថបទដោយ៖ មឿន គន្ធា