ជឿជាក់ថាបងប្អូនខ្មែរប្រមាណជា ៧០% ទៅ ៨០% ហើយប្រាកដជាបានស្គាល់យ៉ាងច្បាស់ពីយីហោត្រីខកំប៉ុងស្រី៣នាក់។ យីហោនេះបានល្បីខ្លាំងលើទីផ្សារទាំងក្នុងនឹងក្រៅស្រុក អស់រយៈកាលជាយូរណាស់មកហើយ។ មានមនុស្សជាច្រើនតែងតែនិយាយថា ញ៉ាំត្រីខកូនក្រមុំ៣យូរហើយ មិនដែលដឹងថានារី៣នាក់នេះជា នរណាសោះ។ ថ្ងៃនេះ Healthy Cambodia នឹងមកជួយស្រាយចម្ងល់បងប្អូនទាំងអស់គ្នា​។

យីហោត្រីខកំប៉ុង៣ ជាយីហោដើមរបស់ប្រទេសថៃ ដែលបានបង្កើតឡើងតាំងពីឆ្នាំ ១៩៧៣ មកម្ល៉េះ។ ដំបូងបំផុតគឺ លោក Suwat udom bunditkul និងមិត្តភក្តិ៥នាក់ផ្សេងទៀត បានរួមកម្លាំងគ្នាសម្រេចចិត្តចាកចេញពីការងារពេញម៉ោងរបស់ខ្លួនដើម្បីកសាងយីហោនេះឡើង។ មកដល់ចំណុចនេះបងប្អូនបានដឹងហើយឬនៅថា “តាមពិតត្រីខស្រី៣នាក់ មិនបានបង្កើតឡើងដោយនារី៣នាក់នៅក្នុងរូបនោះទេ។” រូបនារីទាំងបីអ្នកនៅលើកំប៉ុង គ្រាន់តែជានិមិតសញ្ញាតំណាងឱ្យសុភមង្គលក្នុងក្រុមគ្រួសារតែប៉ុណ្ណោះ។

រំលឹកទៅដល់អតីតកាល សហស្ថាបនិកទាំង៦នាក់របស់យីហោនេះ បង្កើតឡើងទាំងដែលពួកគាត់គ្មានបទពិសោធន៍រកស៊ីពីមុនមកនោះទេ​ព្រមទាំងមិនមានទាំងដើមទុនទៀតផង។ ចំណុចដែលគួរឱ្យសរសើរ លោក Suwat udom bunditkul បានប្រាប់ឱ្យដឹងថារូបលោកមានមហិច្ឆតាមួយចង់បង្កើតអាជីវកម្មដែលជារបស់ខ្លួនឯង។ លោកគិតថា ​ប្រសិនបើមិនហ៊ានក្នុងការសាកល្បងធ្វើអ្វីសោះ ប្រាកដណាស់នឹងត្រូវធ្វើការឱ្យគេពេញមួយជីវិត មិនងាយមានភាពរីកចម្រើនខ្លាំងទៅមុខនោះទេ។ ដោយមានគំនិតថាបើឆាប់ចេញមករកស៊ី ប្រហែលប្រសើរជាងធ្វើការរហូតដល់ចូលនិវត្តន៍ ហើយក៏សម្រេចចិត្តប្រថុយ លាឈប់ដើម្បីចេញមកបង្កើតអាជីវកម្មដេញតាមក្ដីស្រមៃ។

នៅក្នុងការចាប់ផ្ដើមដំបូងរបស់ពួកគាត់ អាចទទួលបានចំណូលក្នុងម្នាក់ត្រឹមតែ ៣ពាន់បាត ប៉ុណ្ណោះ។ បន្ទាប់ពីបានខិតខំយ៉ាងស្រុះដៃគ្នា ក្រោយៗមកទៀតបានធ្វើឱ្យទីផ្សារត្រីខដំណើរការកាន់តែល្អឡើង ក៏សម្រេចចិត្តចុះឈ្មោះជាក្រុមហ៊ុនផ្លូវការមួយមានឈ្មោះថា Royal Foods Co., Ltd​ នៅក្នុងឆ្នាំ១៩៧៤ ។ បន្ទាប់ពីនោះមកទើបមានការកែប្រែឈ្មោះដើមដំបូងពី “Sam Cook” មកជាឈ្មោះ “Cook” វិញ។ ដោយយល់ឃើញថាលេខ៣ ជាលេខដែលល្អក៏សម្រេចចិត្តថាប្ដូរឈ្មោះមក “Three Cook” ព្រមទាំងមានរូបតំណាងនារី៣នាក់ ដែលប្រជាជនខ្មែរយើងនិយមហៅថាត្រីខស្រី៣នាក់ ឬត្រីខកូនក្រមុំ៣ រហូតមកដល់សព្វថ្ងៃនេះ។

ទន្ទឹមនឹងនេះ បើតាមការឱ្យដឹងពីប្រភព marketthink យីហោត្រីខកូនក្រមុំ៣នេះ នៅក្នុងឆ្នាំ២០១៨ អាចរកចំណូលបាន ២,៩២៩លានបាត ទទួលបានផលចំណេញ ១៥២លានបាត និងនៅក្នុងឆ្នាំ២០១៩ រកចំណូលបាន ៣,៦៨៧លានបាត និងចំណេញបាន ២៧២លានបាត ។

សរុបជារួមមក យីហោល្បីរបស់ថៃមួយនេះបានឈរជើងយ៉ាងយូរអង្វែង ល្បីសុះសាយពេញទីផ្សារក្នុងនិងក្រៅស្រុកជាច្រើនមកដល់សព្វថ្ងៃបាន កើតឡើងពីការខិតខំប្រឹងប្រែងស្ថាបនាគុណភាព យល់ច្បាស់ពីតម្រូវការអតិថិជន មានចក្ខុវិស័យវែងឆ្ងាយ ព្រមទាំងការហ៊ានចេញធ្វើការដេញចាប់ក្ដីស្រមៃរបស់ស្ថាបនិក។ តើបងប្អូនយល់ឃើញយ៉ាងណាដែរ បន្ទាប់ពីបានដឹងពីប្រវត្តិយីហោដ៏យូរលង់មួយនេះ?

អត្ថបទដោយ៖ Senghong