តាមឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានសង្កេតឃើញថា “អ្នកជំងឺលើសឈាម និងទឹកនោមផ្អែមមានចំនួនច្រើនលើសលប់។ ហើយឯកឧត្តមបានណែនាំដល់អ្នកជំងឺ និងក្រុមគ្រួសារអ្នកជំងឺ ជាពិសេសប្រជាជនទាំងអស់ ឱ្យចូលរួមថែរក្សាសុខភាព បង្ការខ្លួនពីជំងឺមិនឆ្លង ដោយត្រូវបរិភោគអាហារសុវត្ថិភាព អំបិលតិច ខ្លាញ់តិច ស្ករតិច និងត្រូវធ្វើលំហាត់ប្រាណជាប្រចាំថ្ងៃដើម្បីសុខភាព”។ នៅសម្តីដ៏មានតម្លៃរបស់ឯកឧត្តម ឈាង រ៉ា គឺការយកឈ្នះបញ្ហាទឹកនោមផ្អែម អ្នកគួរមានទម្លាប់ធ្វើហាត់ប្រាណជាប្រចាំថ្ងៃ ដើម្បីស្រូបជាតិស្ករ ការពារឡើងគីឡូ។

ជាពិសេសការលំហាត់ប្រាណជួយបញ្ចុះជាតិស្ករហើយបណ្តេញជាតិខ្លាញ់ចេញពីរាងកាយឱ្យសុខភាពរឹងមាំ រស់នៅឆ្ងាយពីជំងឺទឹកនោមផ្អែម។ តាមគេហទំព័រ Betterhealth​ បានចុះផ្សាយថា ការធ្វើលំហាត់ប្រាណកម្រិតមធ្យមជួយគ្រប់គ្រងគីឡូ ជួយកាត់បន្ថយកម្រិតជាតិស្ករនៅក្នុងឈាម និងគ្រប់គ្រងសម្ពាធឈាម និងកូឡេស្តេរ៉ុលបានយ៉ាងល្អ។ បើអ្នកចង់ឱ្យគ្រួសារមានសុភមង្គល និងអនាគតអ្នករស់គ្មានជំងឺទឹកនោមផ្អែម សូមឱ្យនាំគ្នាធ្វើលំហាត់ប្រាណដើម្បីរំលាយជាតិស្ករតាមសរសៃឈាម។ ព្រោះការរស់នៅគ្មានជំងឺ សុខភាពពិតជាមានតម្លៃណាស់៕ អត្ថបទដោយ៖ ទ្រ សុភាព