អគារមន្ទីរពេទ្យមួយមានតម្លៃដល់ទៅជាង ២,៤៥០លានដុល្លារអាមេរិក បានលេចមុខលេចមាត់ឡើងនៅក្នុងប្រទេសអូស្ត្រាលី ដែលធ្វើឱ្យពិភពលោកបើកភ្នែកសម្លឹងមើលមិនដាច់គ្រប់ៗគ្នា។ នៅឆ្នាំ២០១៧ ប្រទេសអូស្ត្រាលីបានទាក់ទាញចំណាប់អារម្មណ៍មនុស្សទូទាំងពិភពលោកឱ្យមកចាប់វិស័យសុខាភិបាលប្រទេសរបស់ខ្លួន ដែលការវិនិយោគចំណាយលុយដល់ជាង២ពាន់លានដុល្លាររបស់រដ្ឋាភិបាល ទៅលើមន្ទីរពេទ្យដែលមានតម្លៃថ្លៃជាងគេបំផុតនៅក្នុងពិភពលោកបានសម្ពោធឱ្យប្រើប្រាស់ជាផ្លូវការ។

យោងតាមសារព័ត៌មាន ABC.Net បានឱ្យដឹងថា មន្ទីរពេទ្យមួយនេះមានឈ្មោះពេញថា Royal Adelaide Hospital ហៅកាត់ថា(NRAH)។ មន្ទីរពេទ្យនេះត្រូវបានគេដឹងថា មានគ្រែផ្ទុកអ្នកជំងឺបានរហូតដល់ទៅ៨០០គ្រែឯណោះ ខណៈក្រុមគ្រូពេទ្យជំនាញ បុគ្គលិកសុខាភិបាលសរុបមានដល់ទៅជាង៦ពាន់នាក់ដែលធ្វើការនៅក្នុងមន្ទីរពេទ្យមួយនេះ។ អគារទាំងមូល ត្រូវបានគេប្រៀបធៀបទៅនឹងតារាងបាល់ធំៗកម្រិតអន្តរជាតិ២បញ្ចូលគ្នាទើបស្មើរអគារមន្ទីរពេទ្យនេះ១ ពោលគឺមានទំហំដល់ទៅ១០ហិកតាឯណោះ។

ដីដែលអគារមន្ទីរពេទ្យ Royal Adelaide បានសាងសង់ឡើង គឺជាអគារបុរាណមួយបានសាងសង់តាំងពីឆ្នាំ១៨៤០មកម្លេះ ហើយទីតាំងនេះត្រូវការកែច្នៃចុះឡើងៗ រហូតចុងក្រោយនេះបានក្លាយជាមន្ទីរពេទ្យដែលមានតម្លៃថ្លៃជាងគេក្នុងពិភពលោក គិតមកដល់ឆ្នាំ២០២២នេះទីតាំងនេះមានអាយុ១៨២ឆ្នាំហើយ។ អគារទាំងមូលសាងសង់ឡើងដោយចំណាយប្រាក់ជាង២ពាន់លានដុល្លារ ខណៈការបំពាក់បរិក្ខាពេទ្យមានតម្លៃ២៤៥លានដុល្លារបន្ថែមទៀត។ ជាមួយនឹងទំហំ និងតម្លៃនេះ ធ្វើឱ្យអគារមន្ទីរពេទ្យ Royal Adelaide ក្លាយជាអគារដែលថ្លៃបំផុតក្នុងលោកលំដាប់ទី៣ក្នុងចំណោមអងគារទាំងអស់ និងអគារថ្លៃជាងគេបំផុតលំដាប់ទី១ក្នុងចំណោមអគារមន្ទីរពេទ្យនានា។

មូលហេតុធំៗដែលធ្វើឱ្យមន្ទីរពេទ្យ Royal Adelaide មានតម្លៃថ្លៃជាងគេបំផុតក្នុងលោក គឺនៅក្នុងមន្ទីរពេទ្យទាំងមូលមានគោលបំណងធំប្រើបច្ចេកវិទ្យាទំនើបបំផុត សូម្បីតែការដឹកជញ្ជូនថ្នាំ លើកម្ហូបអាហារក៏ត្រូវធ្វើឡើងដោយរ៉ូបូតដែរ។ ចំណុចដែលពិសេសជាងនេះ បើធៀបទៅនឹងមន្ទីរពេទ្យផ្សេងៗ មន្ទីរពេទ្យ Royal Adelaide បំពាក់ប្រព័ន្ធកាត់បន្ថយការបំភាយឧស្ម័នចេញពីផ្ទះកញ្ចក់ដល់ទៅ៥០%ឯណោះ។

ក្រឡេកទៅសេវាកម្ម ឯកទេសរបស់មន្ទីរពេទ្យនេះក៏មិនធម្មតា ពិតជាសមនឹងតម្លៃ។ តាមរយៈគេហទំព័រផ្លូវការរបស់មន្ទីរពេទ្យ Royal Adelaide បានឱ្យដឹងថា នៅក្នុងមន្ទីរពេទ្យមានសេវាកម្មទទួលព្យាបាលជំងឺគ្រប់កម្រិត ទាំងកម្រិតស្រាល និងកម្រិតសង្រ្គោះបន្ទាន់២៤ម៉ោងលើ២៤ម៉ោង។ សេវាកម្មវះកាត់គ្រប់ប្រភេទ រហូតដល់វះកាត់ខួរក្បាល, ការព្យាបាលបញ្ហាផ្លូវចិត្តកម្រិតធ្ងន់ និងសេវាសង្គ្រោះបន្ទាន់គ្រប់ប្រភេទគឺរួមមាននៅក្នុងមន្ទីរពេទ្យមួយនេះទាំងអស់៕

អត្ថបទដោយ៖ កញ្ញា លីហួយ