ផ្អែកតាមការចែករំលែក អ្នកឧកញ៉ា វេជ្ជបណ្ខិត គួច ម៉េងលី នៅលើបណ្ដាញសង្គមយូធូបបានមានប្រសាសន៍ឱ្យដឹងថា បញ្ហានៃក្រោយពេលទទួលទានអាហាររួចមនុស្សមួយចំនួនតែមានអាការៈមិនសូវជាស្រួលនៅក្នុងខ្លួនលេចចេញជារោគសញ្ញា ដូចជា ថប់ដង្ហើម រមួលក្នុងពោះ ចុកឆ្អល់ ភើញឹកញាប់ ជាប់គ្នារហូត គឺបណ្ដាលមកពីទម្លាប់មួយចំនួនដែលប្រជាជនយើងមានវប្បធម៌មួយ នៅពេលញុំាអាហាររួចហើយ ទម្រេតខ្លួនគេង។
អ្នកឧកញ៉ា វេជ្ជបណ្ខិត គួច ម៉េងលី បានពន្យល់ថា ពេលដែលយើងញុំាអាហារហើយគេង ក្រពះរបស់យើងនឹងមិនកិនអាហារបានល្អទេ ហើយម្ហូបដែលញុំាចូលទៅនោះ វាក៏មិនងាយរលាយនៅផងដែរ និងអាចច្រាល់ឡើងទៅលើវិញ។ តួយ៉ាង នៅក្នុងខ្លួនយើងមានបែងចែកផ្នែកទ្រូងខាងលើ និងទ្រូងខាងក្រោម ហេតុនេះកាលណាយើងគេងក្រពះក៏រំកិលទៅផ្នែកទ្រូងខាងលើ ជាកត្តានាំឱ្យបំពង់អាហារ និងបំពង់ខ្យល់ ប៉ះគ្នានាំឱ្យទៅសង្កត់ជាមួយសួត ហើយនេះជាហេតុធ្វើឱ្យយើងមានអាការៈឈឺ ពិបាកដកដង្ហើម ឬក៏មានអារម្មណ៍ថាចុក។ ម៉្យាងទៀត ប្រសិនបើក្នុងករណី ញុំាអាហារមានជាតិអាស៊ីតច្រើនពេកក៏អាចធ្វើឱ្យចុក ឆ្អល់ រមួលពោះ ផងដែរ។
ទន្ទឹមនឹងនេះផងដែរ អ្នកឧកញ៉ាក៏បានបញ្ជាក់ថា ក្នុងលក្ខខណ្ឌអាហារដែលញុំាចូលទៅត្រូវស្តុកទុកយូរវាអាចនឹងកើនឡើងនូវអាស៊ីតក្រពះ យូរៗទៅអាចប៉ះពាល់ដល់ស្រទាប់ក្រពះ បង្ករទៅជាហើម រលាក ហើយបើយើងមិនយកចិត្តទុកដាក់ព្យាបាលទេ ទុកយូរទៅអាចនឹងមានបញ្ហាដំបៅក្រពះកើតឡើង។ លើសពីនេះទៅទៀត ប្រសិនបើបញ្ហាក្រពះដំបៅមានរយៈរុំារ៉ៃយូរៗទៅ អាចនឹងធ្លាយក្រពះក៏មាន ដែលនេះគឺជាប្រភេទកម្រមួយដែលយើងគួរយកចិត្តទុកដាក់។
អ្នកឧកញ៉ា វេជ្ជបណ្ខិត គួច ម៉េងលី បានលើកឡើងបន្ថែមទៀតថា បញ្ហានេះ អាចនឹងកើតចេញពីបញ្ហារោគក្រពះដែលចេះតែធ្វើឱ្យយើងភើមកក្រៅញឹកញាប់ ចំណែកមូលហេតុផ្សេងទៀតអាចនឹងបង្ករពីកត្តាចម្បងៗចំនួន ២គឺ៖
ទី១. អាចមកពីការអាលែហ្ស៊ី នឹងអាហារផ្ទាល់ ពេលញុំាអាចនឹងកើតអាការៈថប់ដង្ហើម។
ទី២. មកពីខ្សោយស្រទាប់សាច់ដុំ ធ្វើឱ្យពេលយើងញុំាអ្វីចូលទៅងាយច្រាល់មកឡើងមកវិញ ឬក៏ថប់ៗដង្ហើម។
ជាចុងក្រោយអ្នកឧកញ៉ា វេជ្ជបណ្ខិត គួច ម៉េងលី ក៏បានណែនាំដែរថា ចំពោះអ្នកកំពុងតែជួបនូវបញ្ហានវជាប្រចាំ គួរតែរកថ្នាំព្យាបាលដែលចេញពីវេជ្ជបញ្ជារបស់គ្រូពេទ្យច្បាស់លាស់ដូចជា ថ្នាំប្រភេទ pepcid, pepto bismol,zantac ក៏ដូចជាថ្នាំផ្សេងៗទៀតដែលជួយកាត់បន្ថយអាស៊ីតក្រពះ។ ក្រៅពីនេះ កុំព្យាយាមពាក់ខោអាវណាដែលតឹងចង្កេះខ្លាំងពេក ញុំាអាហាររួចកុំទាន់អាលគេងភ្លាមៗ ដោយរង់ចាំ យ៉ាងហោចណាស់៣ម៉ោងក្រោយចាំគេង និងគួរចៀសវាងនូវប្រភេទម្ហូបចៀន ខ្លាញ់ ជាតិអាល់កុល និង ជាតិជូរ ក៏គួរតែកាត់បន្ថយដែរ៕
អត្ថបទដោយ៖ ប៉ែត ធីតា