សម្រាលកូនរួចជួបបញ្ហាខ្សត់ទឹកដោះបំបៅកូន គឺជារឿងដ៏គួរឱ្យពិបាកចិត្តមួយដែលអ្នកម្តាយទើបតែសម្រាលកូនថ្មីថ្មោង និងកំពុងពពោះគ្រប់រូបមានការព្រួយបារម្ភជាខ្លាំង ខណៈពេលដែលពុំមានទឹកដោះបរិបូណ៍សម្រាប់កូនតូច។

ពាក់ព័ន្ធទៅនឹងកត្តាចោទមានខាងលើ បើផ្អែកទៅតាមប្រភព todaysparent បានចុះផ្សាយឱ្យដឹងថា ចំពោះអ្នកម្តាយដែលសម្រាលកូនរួចហើយពុំសូវសម្បូរទឹកដោះបំបៅកូននោះ គឺផ្សារភ្ជាប់បញ្ហាមួយចំនួនចំពោះម្តាយផ្ទាល់៖

១. ជាលិកាក្រពេញមិនគ្រប់គ្រាន់៖ សុដន់របស់ស្ត្រីមួយចំនួនមិនលូតលាស់ជាធម្មតាទេ ហេតុនេះហើយទើបបានធ្វើឱ្យមិនមានបំពង់ផលិតទឹកដោះគ្រប់គ្រាន់ ដើម្បីបំពេញតម្រូវការរបស់កូនតូចបាន។

២. បញ្ហាអ័រម៉ូន ឬប្រព័ន្ធ endocrine៖ ចំពោះស្ត្រីដែលមានបញ្ហាជម្ងឺ polycystic ovary Syndrome (PCOS) ក្រពេញទីរ៉ូអ៊ីតទាប ឬខ្ពស់ ជំងឺទឹកនោមផ្អែម លើសឈាម ឬបញ្ហាអ័រម៉ូន ក៏វាអាចជាផ្នែកមួយក្នុងការរួមចំណែកបង្កឱ្យមានការផលិតទឹកដោះក្នុងកម្រិតទាបផងដែរ ពីព្រោះថា ទឹកដោះផលិតបានបរិមាណច្រើនឬតិច គឺពឹងផ្អែកលើសញ្ញាណនៃអ័រម៉ូនដែលត្រូវបានបញ្ជូនទៅកាន់សុដន់។

៣. ការប្រើប្រាស់វិធីសាស្ត្រពន្យារកំណើតដោយអរម៉ូន៖ មានអ្នកម្តាយបំបៅកូនដោយទឹកដោះម្តាយ ហើយប្រើថ្នាំពន្យារកំណើតអាចនឹងមិនសូវជាជួបប្រទះនឹងបញ្ហាខ្សត់ទឹកដោះនោះទេ ក៏ប៉ុន្តែសម្រាប់ក្រុមបុគ្គលមួយចំនួនអាចនឹងប្រឈម ខណៈដែលទទួលយកការពន្យាកំណើតក្នុងទម្រង់ណាមួយ ដូចជា ថ្នាំគ្រាប់ កងដាក់ក្រោមស្បែក ឬថ្នាំចាក់ មុនពេលកូនមានអាយុ ៤ខែ។

៤. ទប់ទឹកដោះមិនបំបៅកូននៅពេលយប់៖ មានការលើកឡើងជាច្រើនដែលណែនាំកុំឱ្យម្តាយបំបៅដោះកូននាពេលយប់ ពីព្រោះអាចនឹងរំខានដល់ការគេងរបស់ទារក។ ប៉ុន្តែសម្រាប់ស្ត្រីបំបៅដោះកូនមួយចំនួន អាចនឹងរងផលប៉ះពាល់ដោយសារការមិនបំបៅដោះកូននៅពេលនេះ អាចធ្វើឱ្យកម្រិតនៃ prolactin (អរម៉ូនដែលបង្កើតទឹកដោះ) ត្រូវធ្លាក់ចុះផងដែរ។

គូសបន្ថែមឱ្យដឹងផងដែរថា ចំពោះស្ថានភាពម្តាយដែលប្រឈមនឹងការខ្សត់ទឹកដោះនេះ អាចបណ្ដាលមកពីកត្តាផ្សេងៗទៀតដូចជា បញ្ហាលេបថ្នាំមួយចំនួន ម្តាយមានប្រវត្តិវះកាត់សុដន់ ប្រើប្រាស់ថ្នាំពន្យារកំណើត ឬម្យ៉ាងវិញក៏អាចករណីកើតមកពីបញ្ហាសុខភាពទារកផងដែរ។

ហេតុនេះ ជាការលើកទឹកចិត្ត​ បើទោះបីជាកំពុងជួបបញ្ហាពុំសូវសម្បូរទឹកដោះក៏ដោយក្តី អ្នកម្តាយគ្រប់រូបគួរព្យាយាមបំបៅកូនទឹកដោះតាមដែលអាចធ្វើទៅបាន ពីព្រោះថា វាអាចជំរុញឱ្យមានការរីកលូតលាស់នៃបំពង់ទឹកដោះ និងជាលិកាកាន់តែច្រើន ដែលមានបានប្រយោជន៍ខ្លាំងក្នុងជួយឱ្យកូនបន្ទាប់ទទួលបានទឹកដោះបរិបូណ៍។ មួយវិញទៀតសោត អាចប្រើឧបករណ៍ប៊ូមទឹកដោះទុក ញុំាជាប្រភេទអាហារសុខភាព(បន្លែបៃតង អង្ករសម្រូប ត្រី ដំឡូង ល្ហុងទុំ...) ជួយជំរុញឱ្យកើនទឹកដោះបន្ថែម។

ចំណែកឯជំហានបន្ទាប់នោះ គឺត្រូវទៅជួបពិគ្រោះជាមួយវេជ្ជបណ្ឌិត ឬអ្នកជំនាញការបំបៅកូនដោយទឹកដោះម្តាយផ្ទាល់ ដើម្បីទទួលបាននូវវិធីសាស្ត្រដោះស្រាយណាមួយជាក់លាក់សមស្របទៅនឹងស្ថានភាពសុខភាពផ្ទាល់ខ្លួនរបស់ម្តាយ៕