យោងទៅតាមការប្រភពចេញផ្សាយ jpost បានចុះផ្សាយនាថ្ងៃទី២៣ ខែកុម្ភៈ ឆ្នាំ២០២២ នេះ បានបង្ហាញឱ្យដឹងនូវការសិក្សាថ្មី ដែលអ្នកស្រាវជ្រាវនៅសាកលវិទ្យាល័យ Penn State ណែនាំស្ត្រីវ័យចំណាស់ដែលអស់រដូវ គួរតែពិចារណាទទួលទានផ្លែព្រូនជារៀងរាល់ថ្ងៃ ដើម្បីជួយការពារ ឬពន្យារការបាត់បង់ឆ្អឹងចំពោះស្ត្រីវ័យចំណាស់។

ដោយអ្នកជំនាញបានលើកឡើងថា ផ្លែព្រូន អាចកាត់បន្ថយការរលាករាងកាយ និងការខូចខាតអុកស៊ីតកម្ម ដែលរួមចំណែកបង្ការដល់ការបាត់បង់ឆ្អឹង។ តួយ៉ាង វេជ្ជបណ្ឌិត Connie Rogers សាស្ត្រាចារ្យផ្នែកវិទ្យាសាស្ត្រអាហារូបត្ថម្ភ និងសរីរវិទ្យា បាននិយាយថា ចំពោះស្ត្រីក្រោយអស់រដូវ កម្រិតទាបនៃអរម៉ូនអ៊ឹស្ត្រូសែន អាចបង្កឱ្យមានការកើនឡើងនៃអុកស៊ីតកម្ម និងការរលាក ដែលបង្កើនហានិភ័យនៃការចុះខ្សោយនៃសមត្ថភាពឆ្អឹង។

ជំងឺពុកឆ្អឹង ជាស្ថានភាពដែលឆ្អឹងផុយ និងទន់ខ្សោយ ដោយបញ្ហានេះ ជាធម្មតាចាប់ផ្តើមកើតមានចំពោះស្ត្រីមានអាយុលើសពី ៥០ឆ្នាំ។ ជាការប៉ាន់ប្រមាណរបស់អ្នកវិទ្យាសាស្ត្របង្ហាញថា មានស្ត្រីប្រហែល ២០០លាននាក់នៅទូទាំងពិភពលោកកំពុងរស់នៅជាមួយជំងឺពុកឆ្អឹង។ កត្តានេះហើយដើម្បីជៀសវាងនៅការជួបនូវបញ្ហាដ៏អាក្រក់បែបនេះទៅថ្ងៃខាងមុខ ឬកំឡុងពេលឈានចូលវ័យចំណាស់អ្នកជំនាញបានណែនាំឱ្យស្ត្រីៗគ្រប់រូបគួរតែជ្រើសយករបបអាហារដែលសម្បូរទៅសារជាតិវីតាមីន ជាពិសេសជាតិកាល់ស្យូមឱ្យបានជាប្រចាំថ្ងៃ។

ទន្ទឹមនឹងនេះផងដែរ តាមរយៈការសិក្សាស្រាវជ្រាវបន្ថែមនោះ​គេបានសង្កេតឃើញថា ផ្លែព្រូន ពិតជាមានអត្ថប្រយោជន៍ចាំបាច់ដល់រាងកាយរបស់មនុស្ស ដើម្បីរក្សាសុខភាពឆ្អឹងរបស់វាតាមរយៈការជួយជួសជុលនូវកោសិកាឆ្អឹងចាស់ និង បង្កើតកោសិកាឆ្អឹងថ្មីជានិច្ច។