បើយោងតាមការចុះផ្សាយរបស់ Aptagro អ្នកស្រី Maryanne Murray Buechner គឺជាអ្នកនិពន្ធម្នាក់ដែលរស់នៅប្រទេសជប៉ុនអស់រយៈពេល៥ឆ្នាំមកហើយ អ្នកស្រីបានសង្កេត និងសរសេរអំពី របៀបរស់នៅរបស់ជនជាតិជប៉ុន និងការចិញ្ចឹមកូនរបស់ជនជាតិជប៉ុន ដែលនៅក្នុងនោះអ្នកស្រីបានលើកឡើង មេរៀនទាំង០៦ដែលឪពុកម្ដាយជប៉ុនតែងតែបង្រៀនកូនៗពួកគេរួមមាន៖ 

មេរៀនទី១ ក្មេងជប៉ុនគ្រប់រូបមានទំនុកចិត្តលើខ្លួនឯង

អ្នកស្រី Maryanne Murray Buechner បាននិយាយថា រឿងដំបូងដែលម៉ាក់ប៉ាជប៉ុនបង្រៀនកូនគឺ លើកទឹកចិត្តខ្លួនឯង ខ្លួនទីពឹងខ្លួន។ ម៉ាក់ប៉ាជប៉ុនតែងអនុញ្ញាតឱ្យកូនរបស់ពួកគេដើរទៅរៀនដោយខ្លួនឯង គ្មានប៉ា ឬម៉ាក់ជូនទៅរៀននោះទេ។ ភាគច្រើនក្មេងជប៉ុនជិះឡានក្រុង រថភ្លើង និងដើរទៅរៀន។

មេរៀនទី២ ឪពុកម្ដាយស្អប់ការអួតកូន

ឪពុកម្ដាយជប៉ុនស្អប់ការអួតកូននៅនឹងមុខអ្នកដទៃណាស់ ប៉ុន្តែផ្ទុយទៅវិញ​ ពួកគេតែងតែចែករំលែកភាពលំបាក និងភាពរីករាយជាមួយកូន ដើម្បីបង្ហាញពីភាពស្មោះត្រង់ និងភាពស្និទ្ធស្នាល។

មេរៀនទី៣ មិនទម្លាប់បង្ហោះរូបសរសើរកូនតាមបណ្ដាញសង្គម

ថ្វីបើម៉ាក់ប៉ាជប៉ុនមិនទម្លាប់បង្ហោះរូបសរសើរកូនតាមបណ្ដាញសង្គម ប៉ុន្តែមិនមែនមានន័យថា ពួកគេមិនស្រលាញ់កូននោះទេ ផ្ទុយទៅវិញកូនពួកគេបង្រៀនកូនពីរបៀបរស់នៅ ចេះអត់ធ្មត់ ចេះលើកទឹកចិត្តខ្លួន មិនប្រើអំពើហិង្សានោះទេ។ មួយវិញទៀត ពួកគេមានទម្លាប់មួយគឺ រាល់ពេលទំនេរពីការងាររកស៊ី ពួកគេតែងនាំកូនទៅកម្សាន្តនៅកន្លែងផ្សេងៗ និងញុំាអាហារសុខភាពដោយក្ដីរីករាយជាមួយឯកជនភាពរបស់គ្រួសារគេ។

មេរៀនទី៤ ឪពុកម្ដាយបង្រៀនកូនឱ្យចេះអត់ធ្មត់

រយៈពេល៥ឆ្នាំដែលអ្នកនិពន្ធ Maryanne Murray Buechner រស់នៅ និងស្វែងយល់ពីការរស់នៅរបស់ជនជាតិជប៉ុន ដែលអ្នកស្រីយល់ឃើញថា ធាតុផ្សំសំខាន់មួយនៃវប្បធម៌របស់ជនជាតិជប៉ុនគឺ ការអត់ធ្មត់។ តាំងតែពីដូនតារបស់ពួកគេមក ជប៉ុនតែងតែបង្រៀនកូនពួកគេឱ្យចេះអត់ធ្មត់ ដែលវាកើតចេញពីប៉ាម៉ាក់មិនមានកំហឹងនៅមុខកូនៗ តស៊ូជាមួយការងារ និងព្យាយាមយកពេលទំនេរអានសៀនវភៅជាដើម។

មេរៀនទី៥ រៀបចំអាហារសុខភាពសម្រាប់កូនៗ

អ្នកគ្រប់គ្នាប្រាកដជាដឹងហើយថា ជនជាតិជប៉ុនរវល់នឹងការងាររបស់ខ្លួនប៉ុនណា ប៉ុន្តែពួកគេមិនដែលទម្លាប់ឱ្យកូនញុំាអាហារណាមិនល្អនោះទេ។ ផ្ទុយទៅវិញ ជនជាតិជប៉ុនឆ្លៀតពេលចម្អិនអាហារឱ្យកូនៗញុំាប្រកបដោយអនាម័យ ហើយភាគច្រើនអាហារដែលពួកគេធ្វើឱ្យកូនញុំានោះគឺ សាច់ត្រី បន្លែបៃតង តៅហ៊ូ សារ៉ាយ បាយ និងគ្រាប់ធញ្ញជាតិជាដើម។

មេរៀនទី៦ ឪពុកម្ដាយទម្លាប់នាំកូនទៅលេងកន្លែងសម្បូរធម្មជាតិ

ភាគច្រើនជនជាតិជប៉ុនចូលចិត្ត និងស្រលាញ់ធម្មជាតិជាខ្លាំង ដែលពួកគេបានបង្រៀនកូនរបស់ពួកគេឱ្យស្រលាញ់ធម្មជាតិដូចជា នាំកូនទៅកម្សាន្តនៅក្រោមដើមផ្កាសាគូរ៉ាជាដើម។

អត្ថបដោយ៖ DADDY-RATH