ភាពតានតឹង និងស្ត្រេសដោយសារការងារ អាជីវកម្ម គ្រួសារ ស្នេហា ជំងឺប្រចាំកាយ មិនសូវធ្វើលំហាត់ប្រាណ អាយុកាន់តែច្រើនចេះតែមានបញ្ហាដំណេក។ ការគេងមិនគ្រប់គ្រាន់ប៉ះពាល់ខ្លាំងណាស់ដល់គ្រប់ផ្នែកនៃសុខភាពខួរក្បាល ហើយអាចជាកត្តាបង្កជំងឺរ៉ាំរ៉ៃជាច្រើនរួមមានបញ្ហាធាត់ ជំងឺទឹកនោមផ្អែម ជំងឺដាច់សរសៃឈាមខួរក្បាល ជំងឺបេះដូង លើសឈាម មហារីក និងជំងឺផ្លូវចិត្តផ្សេងៗទៀត។ នេះជាវិធី២ ជួយសម្រួលអារម្មណ៍ស្ងប់គេងឆាប់លក់លឿន៖
១.ដោះសម្ពាធផ្លូវចិត្ត៖ ពេលមានសម្ពាធផ្លូវចិត្ត និងបញ្ហាស្រ្តេសច្រើន វាធ្វើឱ្យអ្នកមានបញ្ហាដល់ដំណេក ប៉ុន្តែបើអ្នកអាចរកវិធីបន្ធូរអារម្មណ៍ដូចជាសមាធិ និងការហាត់ប្រាណជាវិធីល្អ។ មានការស្រាវជ្រាវជាច្រើនពីការធ្វើសមាធិបានបង្ហាញថា “អ្នកដែលធ្វើសមាធិជាប្រចាំ មុនចូលគេង ធ្វើឱ្យចិត្តស្ងប់ និងគេងលក់ស្រួល”។ បញ្ហាការគេងរបស់មនុស្ស គឺមកពីចិត្ត និងអារម្មណ៍របស់ពួកគេមានការគិតលើរឿងច្រើនពេក វាធ្វើមានបញ្ហាប៉ះពាល់ដល់ដំណេក។ ហើយក៏មានតាមអ្នកស្រាវជ្រាវជនជាតិអាមេរិកម្នាក់បាននិយាយថា បើមនុស្សគិតរឿងតែមួយ ក្នុងពេលចូលដំណេក ក៏អាចឱ្យគេគេងលក់បានដែរ តែបញ្ហាមកពីគេមានសម្ពាធផ្លូវអារម្មណ៍ច្រើន ការធ្វើសមាធិជាវិធីល្អបំផុត។ តាមលោកគ្រូ នឹម ឈុន្នី ជាសហស្ថាបនិកក្រុមហ៊ុនបណ្តុះបណ្តាល Vipassa បានបញ្ជាក់ប្រាប់ឱ្យមនុស្សដោះស្រាយក្នុងការសម្រាលគេងលក់នោះថា គ្រាន់តែមនុស្សម្នាក់ៗ ចំណាយពេលវេលា ៥ទៅ១០នាទីក្នុងមួយថ្ងៃ ធ្វើសមាធិនោះ បញ្ហាផ្លូវចិត្តកាត់បន្ថយបានច្រើនណាស់។ សូម្បីអ្នកមានបញ្ហាការគេង គ្រាន់តែសមាធិ ៥នាទី ដកដង្ហើមតាមច្រមុះ បញ្ហាអារម្មណ៍ស្ងប់ជាងមុនដែរ។
២. ចូលអានជាមុន ដើម្បីប្រមូលអារម្មណ៍៖ បើអ្នកចង់ចូលគេងឱ្យលក់ស្រួល អ្នកគួរអានសៀវភៅចំនួន ៣០ នាទីជាមុន ដើម្បីសម្រួលអារម្មណ៍ឱ្យបានល្អ មុនចូលគេង។ ខ្ញុំនិយាយនេះ មិនមែនជាការអានសៀវភៅតាមទូរស័ព្ទ និងមើលទូរសព្ទមុនចូលគេងទេ វាធ្វើឱ្យពន្លឺទូរស័ព្ទជះចូលកែវភ្នែករបស់អ្នក ហើយវាក៏បញ្ជូនដល់ផ្លូវអារម្មណ៍របស់អ្នក ជាផ្នែកមួយនៃការរំខានដែរ។ អ្នកគួរអានសៀវភៅបែបក្រដាស។ សូម្បីតែលោកមហាសេដ្ឋី Bill Gate ក៏ធ្លាប់បានចែករំលែកថាលោក តែងតែអានសៀវភៅ១ម៉ោងរៀងរាល់ថ្ងៃមុននឹងចូលសម្រាក។ លោកតែងនិយាយថាការអានគឺជួយឱ្យយើងមានអារម្មណ៍ថាបានសម្រាកបន្ទាប់ពីធ្វើការច្រើនពេញមួយថ្ងៃ ហើយក៏ជួយឱ្យឆាប់ងងុយគេង និងគេងលក់ស្ងប់ផងដែរ។ តាមបទពិសោធន៍ផ្ទាល់របស់មិត្តអ្នកអានអត្ថបទរបស់ចាបបៃតង ពួកគាត់ក៏ធ្លាប់ចែករំលែកថាអានសៀវភៅប្រៀបដូចលេបថ្នាំងងុយគេងអ៊ីចឹង អានតែ២,៣ទំព័រ គេងលក់មិនដឹងខ្លួន៕ អត្ថបទដោយ៖ ទ្រ សុភាព
សៀវភៅ "លំហូរចិត្ត" លោកអ្នកអាចទិញតាម https://t.me/hangchhengH24
