បញ្ហាផ្លូវចិត្តបានក្លាយជាបញ្ហាប្រឈមធំមួយសម្រាប់យុវវ័យនិងស្ទើគ្រប់គ្នាក្នុងសង្គម ហើយមិនមែនគ្រប់គ្នាសុទ្ធតែមានលំនឹងផ្លូវចិត្តរឹងមាំគ្រប់គ្រាន់ដើម្បីប្រឈមនេះទេ។ មានមនុស្សជាច្រើនបានក្លាយជាជនរងគ្រោះនៃជំងឺផ្លូវចិត្ត និងកាន់តែមានសុខភាពដុនដាបទៅៗ រហូតមិនអាចរៀនសូត្រ និងធ្វើការងារប្រចាំថ្ងៃបានដូចមុន ហើយនេះជាអ្វីដែលគួរឱ្យបារម្ភបំផុត។ បើអ្នកមានបញ្ហាបែបនេះ អ្នកគួរតែមានទម្លាប់ទាំង ២នេះជួយផ្លូវចិត្តរបស់អ្នក។
១. ទម្លាប់គិត៖ ជីវិតមនុស្សយើងបែបណា អាស្រ័យលើគំនិតដែលយើងគិតបែបណាដែរ។ បើយើងគិតអាល័យតែខ្លាចច្រើន មិនហ៊ាននេះ មិនហ៊ានធ្វើនោះ ជីវិតយើងធ្វើអ្វីដដែលៗ អនាគតយើងក៏គ្មានរីកចម្រើនដូចគ្នា។ តាមទស្សនវិទូ Marcus Aurelius បានបញ្ជាក់ថា “សុភមង្គលជីវិតមនុស្សម្នាក់ៗ អាស្រ័យលើគុណភាពនៃការគិតរបស់យើងនេះឯង។” បើយើងមានទម្លាប់គិតរឿងល្អៗ រឿងល្អៗ ច្បាស់ជាចូលក្នុងជីវិតមិនខានឡើយ។ ហើយក៏គ្មានអ្នកណាអង្គុយគិតរឿងអាក្រក់ ហើយធ្វើឱ្យខ្លួនសប្បាយចិត្តនោះទេ វាគ្មានទេ។
ការផ្តើមថ្ងៃថ្មីជាមួយនឹងភាពវិជ្ជមានរាល់ថ្ងៃ ធ្វើឱ្យជីវិតរបស់អ្នករីកចម្រើន។ សូម្បីតារាចម្រៀងលំដាប់ពិភពលោក Selena-Gomez បានបង្កើតទម្លាប់ចាប់ផ្តើមថ្ងៃថ្មីជាមួយផ្នត់គំនិតវិជ្ជមាន ដើម្បីឱ្យអារម្មណ៍ស្រស់ស្រាយ រីករាយ ពេញដោយក្តីសង្ឃឹម ហើយបែបនេះយូរៗទៅ វាបានជួយឱ្យផ្នត់គំនិតនិងភាពអវិជ្ជមានបាត់បន្តិចម្តងៗ។ ជារៀងរាល់ព្រឹក គាត់តែងចែករំលែកផ្នត់គំនិតវិជ្ជមាននៅលើ Instagram របស់គាត់។
២. ទម្លាប់នៅម្នាក់ឯងស្រូបយកថាមពលឡើងវិញ៖ ភាពស្ងប់ស្ងាត់ដែលមនុស្សយើងបានចំណាយពេលវេលានូវម្នាក់ជាការដាក់សំណួរ ដើម្បីរកគោលដៅជិវិត វាធ្វើឱ្យេជីវិតអ្នកមានថាមពល និងមានច្រកសម្រាប់ធ្វើការដោះស្រាយចំពោះបញ្ហាផ្សេងៗ ។ លោក សំ កុសល បាននិយាយថា គាត់បានចំណាយពេលនូវម្នាក់ឯងចំនួន ៣០ នាទី និងចំនួន ១០ នាទីទៀត ដើម្បីធ្វើសមាធិ។ ហើយលោកគ្រួបានបន្តថា ពេលដែលគាត់នូវម្នាក់ឯងអំឡុងពេលហ្នឹង ធ្វើឱ្យគាត់មានការផ្តោតអារម្មណ៍ឱ្យមូល ដែលត្រូវសួរ និងគិតរឿងសំខាន់ៗ ក្នុងជីវិតនេះ។ ការធ្វើបែបនេះ បានធ្វើឱ្យផ្លូវចិត្តរបស់គាត់មានភាពរឹងមាំ។
ការឈប់សំរាកពីសកម្មភាពនៅលើប្រព័ន្ធផ្សព្វផ្សាយសង្គមផ្សេងៗ ធ្វើឱ្យផ្លូវចិត្តរបស់អ្នកកាន់តែរឹងមាំ។ ជាការពិត ការសំរាកលំហែកាយពិតជាសំខាន់ណាស់ដើម្បីឱ្យផ្លូវចិត្តមានសុខភាពល្អ រឹងមាំ មានថាមពល និងកាន់តែស្វាហាប់ជាមុនផងដែរ។ អត្ថបទដោយ៖ ទ្រ សុភាព