ប្រភេទតែបៃតង Matcha ជាភេសជ្ជៈដែលមានផ្ទុកទៅដោយសារជាតិកាហ្វេអ៊ីន ប្រូតេអ៊ីន​ ជំនួយដល់សុខភាព ដាស់ស្មារតី សម្រកទម្ងន់ បង្ការរោគរុាំរ៉ៃមួយចំនួន នេះប្រសិនណាបើអ្នកទទួលទានផឹកត្រូវក្បួន ពេលវេលា និងកម្រិតបរិមាណ។

យ៉ាងណាមិញ បើផ្អែកទៅតាមប្រភពចេញផ្សាយរបស់គេហទំព័រ healthline បានលើកឡើងឱ្យដឹងថា Matcha ជាប្រភេទម្សៅតែបៃតង មានផ្ទុក L-theanine ដោយជាអាស៊ីតអាមីណូដែលមាននៅក្នុងរុក្ខជាតិតែបៃតង អាចជួយកាត់បន្ថយភាពតានតឹង ស្រ្តេសនៅក្នុងខួរក្បាល។ ជាងនេះទៀតសោត Matcha ក៏មានសារជាតិកាហ្វេអ៊ីនផងដែរ ក៏ប៉ុន្តែកម្រិតនៃការបង្កើនថាមពលនៅក្នុងភេសជ្ជៈមួយប្រភេទនេះ មានល្បឿនយឺតជាងកាហ្វេ។ ដោយហេតុថា ជាតិកាហ្វេអ៊ីន និងL-theanine ឆ្លងកាត់របាំងខួរក្បាល ធ្វើឱ្យកម្រិតកំហាប់ខ្ពស់ដោយប្រើរយៈពេល ៣០នាទី។ ក្រោយមកនៅពេលដែលជាតិកាហ្វេអ៊ីន និងL-theanine ផ្សំចូលគ្នា ទើបអាចកាត់បន្ថយភាពការអស់កម្លាំង បង្កើនអារម្មណ៍ផ្តោតខ្លាំងជាងមុន។

ដោយឡែក ក្រៅពីគុណសម្បត្តិជួយដល់សុខភាពរាងកាយ នៅក្នុងតែបៃតង Matcha គឺមានផ្ទុកទៅដោយសារធាតុ EGCG និង Matcha Polyphenols ដែលសារធាតុទាំង២នេះ ប្រសិនបើត្រូវបានប្រើប្រាស់នៅបរិមាណច្រើនលើសលប់ នឹងនាំឱ្យកើនឡើងជាតិពុលបណ្ដាលឱ្យខូចថ្លើម៕