គុណភាពនៃមេជីវិតពិតជាមានសារៈសំខាន់ណាស់ សម្រាប់ការបង្កកំណើត ឬនិយាយសាមញ្ញថាបង្កើតកូន។ អ្វីដែលជាបញ្ហាដែលប្តីប្រពន្ធជាច្រើនកំពុងតែជួបប្រទះនាពេលបច្ចុប្បន្ននេះ គឺការពិបាកមានកូន ដែលអាចបង្កឡើងពីកត្តារួមផ្សំផ្សេងៗទៀត ក្នុងនោះក៏មានការខ្សោយចុះមេជីវិតផងដែរ។

ដើម្បីអាចបង្កកំណើតបាន តម្រូវឱ្យទាំងមេជីវិតញី និងមេជីវិតឈ្មោល សុទ្ធតែមានសុខភាពល្អ ដែលក្នុងនោះមេជីវិតឈ្មោលជាកត្តាសំខាន់មួយក្នុងកំណត់ការមានកូន។ យោងតាមប្រភព VnExpress ដោយមានការចែករំលែកផ្ទាល់ពីវេជ្ជបណ្ឌិត Tra Anh Duy បានឱ្យដឹងដើម្បីការពារហានិភ័យផ្សេងៗអាចធ្វើឱ្យមេជីវិតឈ្មោលខ្សោយចុះ និងបង្កើនគុណភាពមេជីវិតឈ្មោលឱ្យកាន់តែល្អ គួរអនុវត្តវិធីធម្មជាតិទាំង៨នេះ ៖

១ រក្សារបបអាហារដែលមានសុខភាពល្អ៖ របបអាហារដើរតួនាទីយ៉ាងសំខាន់ក្នុងការធ្វើអោយប្រសើរឡើងនូវគុណភាពមេជីវិតឈ្មោល។ បុរសគួរតែបន្ថែមអាហារដែលសម្បូរទៅដោយសារធាតុប្រឆាំងអុកស៊ីតកម្ម វីតាមីន និងសារធាតុរ៉ែ ដើម្បីបង្កើនសុខភាពបន្តពូជ។ អាហារសម្បូរវីតាមីន C ដូចជា ផ្លែក្រូច ផ្លែស្ត្របឺរី ម្ទេសប្លោក និងបន្លែបៃតង ជួយការពារមេជីវិតឈ្មោលពីការខូចខាតរ៉ាឌីកាល់សេរី។ អាហារសម្បូរជាតិស័ង្កសី ដូចជា អយស្ទ័រ សាច់ក្រហម គ្រាប់ល្ពៅ សណ្ដែក ... គឺជាសារធាតុរ៉ែដ៏សំខាន់សម្រាប់ការលូតលាស់ និងមុខងារមេជីវិតឈ្មោល។ រីឯអាស៊ីតខ្លាញ់ Omega-3 ដែលមាននៅក្នុងត្រីសាលម៉ុន គ្រាប់ធញ្ញជាតិ chia, walnut... ជួយធ្វើឱ្យឈាមរត់ទៅកាន់ប្រដាប់បន្តពូជ ជំនួយដល់ការផលិតមេជីវិតឈ្មោលផងដែរ។

២ រក្សាទំងន់រាងកាយសមរម្យ៖ ការលើសទម្ងន់ ឬខ្វះទម្ងន់អាចប៉ះពាល់អវិជ្ជមានដល់គុណភាពមេជីវិតឈ្មោល។ បុរស​គួរ​រក្សា​ទម្ងន់​ខ្លួន​ឱ្យ​មាន​សុខភាព​ល្អ​តាម​រយៈ​របប​អាហារ​មាន​តុល្យភាព និង​ការ​ហាត់ប្រាណ​ជា​ប្រចាំ។ គួរធ្វើការសម្រកទម្ងន់នៅពេលដែលលើសទម្ងន់នឹងជួយបង្កើនបរិមាណ និងគុណភាពមេជីវិតឈ្មោល។

៣ ធ្វើលំហាត់ប្រាណឱ្យបានទៀងទាត់៖ ការហាត់ប្រាណ​ជួយ​ពង្រឹង​សុខភាព​ទូទៅ និង​គុណភាព​មេ​ជីវិត​ឈ្មោល​ផង​ដែរ។ សកម្មភាពដូចជាការរត់ ហែលទឹក វាយកូនបាល់ ទៅកន្លែងហាត់ប្រាណ អាចជួយបង្កើនចរាចរឈាម និងធ្វើអោយមុខងារបន្តពូជប្រសើរឡើង។ ទោះជាយ៉ាងណាក៏ដោយ គួរចៀសវាងការធ្វើលំហាត់ប្រាណច្រើនពេក លើសកម្រិត ព្រោះនេះអាចបណ្តាលឱ្យមានភាពតានតឹង និងប៉ះពាល់អវិជ្ជមានដល់សុខភាពបន្តពូជ។

៤ ចៀសវាងទម្លាប់អាក្រក់៖ ដូចជាការជក់បារី ការផឹកស្រា និងការប្រើសារធាតុរំញោចអាចកាត់បន្ថយគុណភាពមេជីវិតឈ្មោល។ ក្នុង​ចំណោម​នោះ ការ​ជក់​បារី​បង្ក​បញ្ហា​ហ្សែន ជា​ពិសេស​ការ​បង្កើន​អត្រា​មេ​ជីវិត​ឈ្មោល​ខុស​ប្រក្រតី។ ការផឹកស្រាច្រើនពេកអាចប៉ះពាល់ដល់អរម៉ូនភេទ និងកាត់បន្ថយការផលិតមេជីវិតឈ្មោល។ សារធាតុរំញោចដូចជាកញ្ឆា និងហេរ៉ូអ៊ីនអាចកាត់បន្ថយការមានកូនរបស់បុរសដូចគ្នាដែរ។

៥ កាត់បន្ថយភាពតានតឹង៖ ភាពតានតឹងយូរអាចប៉ះពាល់ដល់អរម៉ូនភេទ និងកាត់បន្ថយគុណភាពមេជីវិតឈ្មោល។ បុរសគួរតែស្វែងរកវិធានការកាត់បន្ថយស្ត្រេស ដូចជាការធ្វើសមាធិ យូហ្គា ឬចូលរួមក្នុងសកម្មភាពកម្សាន្តនានា ដើម្បីរក្សាស្មារតីសុខស្រួល។

៦ ត្រូវប្រាកដថាគេងឱ្យបានគ្រប់គ្រាន់៖ ការគេងឱ្យបានគ្រប់គ្រាន់ និងប្រកបដោយគុណភាព ជួយឱ្យរាងកាយងើបឡើងវិញ និងរក្សាសុខភាពល្អ។ ការគេងមិនលក់អាចកាត់បន្ថយកម្រិតអ័រម៉ូន Testosterone ដែលជះឥទ្ធិពលអវិជ្ជមានដល់ការផលិតមេជីវិតឈ្មោល។ បុរសគួរតែធានាថាពួកគេគេងពី 7 ទៅ 8 ម៉ោងរៀងរាល់យប់ និងរក្សាកាលវិភាគនៃការគេងឱ្យបានទៀងទាត់។

៧ កំណត់ការប៉ះពាល់នឹងសារធាតុពុល៖ ការប៉ះពាល់នឹងសារធាតុពុល ដូចជាសារធាតុគីមីឧស្សាហកម្ម លោហធាតុធ្ងន់ និងថ្នាំសម្លាប់សត្វល្អិតអាចបង្កគ្រោះថ្នាក់ដល់មេជីវិតឈ្មោល។ បុរសគួរតែកំណត់ការប៉ះពាល់នឹងសារធាតុទាំងនេះដោយប្រើឧបករណ៍ការពារ និងធ្វើការក្នុងបរិយាកាសសុវត្ថិភាព។

៨ ស្លៀកខោទ្រនាប់ត្រជាក់៖ សីតុណ្ហភាពខ្ពស់ខ្លាំងអាចប៉ះពាល់ដល់ការផលិតមេជីវិតឈ្មោល។ ការស្លៀកខោទ្រនាប់ដែលតឹងពេក ឬត្រូវបានប៉ះពាល់នឹងសីតុណ្ហភាពខ្ពស់ ក្នុងនោះការងូតទឹកក្តៅ ឬប្រើទូរស័ព្ទ កុំព្យូទ័រដាក់លើភ្លៅ ក៏អាចចូលរួមកាត់បន្ថយគុណភាពមេជីវិតឈ្មោលបាន។ បុរស​គួរ​ជ្រើសរើស​ខោ​ទ្រនាប់​ដែល​មិនហប់ មិនតឹងខ្លាំងពេក ហើយ​ចៀសវាង​ការ​ជ្រើសរើស​សម្ភារៈណាដែលអាច​បង្កើន​សីតុណ្ហភាពប៉ះពាល់​ពងស្វាស​បាន​ងាយ។

គួរបញ្ជាក់ផងដែរ ប្រសិនបើអ្នកមានទម្លាប់រស់នៅល្អហើយ ប៉ុន្តែនៅតែពិបាកមានកូន ឬមានបញ្ហាសុខភាពបន្តពូជណាមួយ សូមកុំខ្លាចក្នុងការទៅជួបប្រឹក្សាជាមួយគ្រូពេទ្យជំនាញ ដើម្បីអាចទទួលបានដំណោះស្រាយដ៏មានប្រសិទ្ធភាព និងបញ្ជៀសហានិភ័យជំងឺធ្ងន់ធ្ងរផ្សេងៗ៕

អត្ថបទដោយ៖ Senghong-សេងហុង