ជាទូទៅយើងសង្កេតឃើញថាស្ទើរតែគ្រប់អត្តពលិកអាជីពតែងតែត្រាំខ្លួនក្នុងទឹកកកមុនពេលហាត់ ឬក៏ក្រោយពេលចប់ការប្រកួត។ ខណៈប្រិយមិត្តមួយចំនួននៅតែមានការងើយឆ្ងល់ហេតុអ្វីបានជាកីឡាករចាំបាច់ត្រាំខ្លួនក្នុងទឹកកកត្រជាក់បែបនេះដើម្បីអ្វី? ហើយវាបានផ្ដល់ជាប្រយោជន៏អ្វីខ្លះចំពោះរាងកាយ? ដូច្នេះហើយនៅក្នងថ្ងៃនេះចាបបៃតងនឹងបកស្រាយរាល់ចម្ងល់ទាំងអស់ដើម្បីឲ្យប្រិយមិត្តយល់ច្បាស់ពីមូលហេតុនៅក្រោយការត្រាំទឹកកក។
ផ្អែកលើប្រភពវែបសាយ Ninjawarriorx បានឲ្យដឹងថា មូលហេតុដែលនាំឲ្យអត្តពលិកអាជីពត្រាំខ្លួនក្នុងទឹកកកគឺដើម្បីព្យាបាលខ្លួនក្រោយទទួលរងរបួសក្នុងពេលប្រកួត ជួយសម្រួលដល់សាច់ដុំដែលតឹងណែន ជួយបណ្ដេញជាតិពុល កាត់បន្ថយ និងព្យាបាលរបួសដែលកើតមានអំឡុងពេលប្រកួត ឬហ្វឹងហាត់បានដល់ពី ៥០ដល់៦០% ។
អត្ថប្រយោជន៍កាន់តែអស្ចារ្យមួយទៀតនោះការត្រាំទឹកកកក៏បានកាត់បន្ថយការរលាក កម្រិតថាមពលខ្ពស់ មានការកើនឡើងកម្រិត dopamine និងnorepinephrine បង្កើនការផ្តោតអារម្មណ៍ ទំនុកចិត្ត និងកម្លាំងផ្លូវចិត្ត និងជួយឲ្យអត្រាមេតាបូលីសកើតឡើងកាន់តែខ្ពស់ទៀតផង។ ជាមួយគ្នានេះផងដែរដើម្បីឲ្យការព្យាបាលរបួស និងសម្រួលសាច់ដុំមាន ប្រសិទ្ធភាពខ្ពស់ក្នុងវិធីសាស្ត្រនេះ កីឡាករត្រូវត្រាំក្នុងកម្រិតសីតុណ្ហភាពដកសូន្យអង្សា និងប្រើរយៈ ពេលចាប់១៥នាទី ទៅ ៣០នាទី។
ដោយឡែកដោយយោងតាមវែបសាយ Firstpost ការត្រាំខ្លួនក្នុងទឹកកកក៏ជាវិធីសាស្រ្ដកាត់បន្ថយគីឡូ ល្អសម្រាប់អ្នកដែលចង់ស្រកទម្ងន់ផងដែរ។ ជាលិកា Adipose ឬខ្លាញ់មាន២ប្រភេទគឺ ពណ៌ត្នោតនិងពណ៌ស។ ជាលិកា adipose ពណ៌សបានដើរតួនារីរក្សាទុកថាមពល ហើយក៏ជាប្រភេទនៃជាតិខ្លាញ់ដែលអាចបន្ថែមអ៊ីញទៅចង្កេះ និងភ្លៅរបស់យើងផងដែរ។ ចំណែកខ្លាញ់ adipose ពណ៌ត្នោត ដែលមានទីតាំងជាចម្បងនៅជុំវិញក និងឆ្អឹងក គឺមានសកម្មភាពមេតាបូលីសហើយអាចដុតជាលិកា adipose ពណ៌ស ដោយហេតុនេះជួយឲ្យយើងសម្រកទម្ងន់។
ខណៈការងូតទឹកកក ឬត្រាំក្នុងទឹកត្រជាក់អាចធ្វើឱ្យខ្លាញ់ និងសាច់ដុំមានពណ៌ត្នោតសកម្ម នៅពេលដែលធ្វើឲ្យសកម្ម ពួកវានឹងបញ្ចេញអរម៉ូនពីរគឺ អ៊ីរីស៊ីន និងអេហ្វអេហ្វ២១។ អ័រម៉ូនទាំងនេះបានដុតបំផ្លាញជាលិកាខ្លាញ់ពណ៌ស និងជួយអ្នកសម្រកទម្ងន់។
មិនត្រឹមតែប៉ុណ្ណោះការសិក្សាបានបង្ហាញថា អ្នកដែលមានជំងឺទឹកនោមផ្អែម និងកូឡេស្តេរ៉ុលខ្ពស់ច្រើនតែត្រូវបានគ្រូពេទ្យណែនាំឲ្យរកវិធីសម្រកទម្ងន់ដើម្បីគ្រប់គ្រងសុខភាពឲ្យបានល្អប្រសើរ។ តាមរយៈវិធីសាស្រ្ដក្នុងការសម្រកទម្ងន់ ការត្រាំខ្លួនក្នុងទឹកកកក៏ជួយដោះស្រាយបញ្ហាដែលទាក់ទងនឹងការធាត់ផងដែរ។ ព្រោះទឹកកក ត្រជាក់តែខាងក្រៅទេ តែគឺនៅខាងក្នុងគឺក្ដៅ ចឹងគឺវាជួយរំលាយជាតិខ្លាញ់ពេលត្រាំទៅមានអារម្មណ៍ថាធូរ ហើយស្រាលខ្លួនទៀតផង។
ជារួមមកវិញការត្រាំខ្លួនក្នុងទឹកកកគឺមានផលប្រយោជន៍យ៉ាងច្រើនចំពោះកីឡាករអាជីព ឬក៏អ្នកដែលចង់សម្រកទម្ងន់។ ជាពិសេសអាចយកអនុវត្តបានប្រសិនបើថ្ងៃណាមួយយើងប្រើធ្វើពលកម្មការងារធ្ងន់ៗហើយនឹងធ្វើឲ្យខ្លួនយើងទ្រោម អស់កម្លាំងល្ហិតល្ហៃ យើងគួរតែត្រាំខ្លួនក្នុងទឹកកឲ្យបាន១៥នាទី ទៅ ៣០នាទី ដើម្បីទទួលបានគុណសម្បត្តិសុខភាពដូចដែលចាបបៃតងបានរៀបរាប់ដូចខាងលើ៕
អត្ថបទដោយ៖ ស្រីណុច