របបអាហារសម័យទំនើប គឺពឹងផ្អែកធំទៅលើក្រុមអាហារដែលវេចខ្ចប់ទុកដាក់បានយូរខែថ្ងៃមិនថា ជាប្រភេទត្រីសាច់ បន្លែ ផ្លែឈើ នៅក្នុងទម្រង់ណានោះឡើយ ដើម្បីជួយសម្រួលទៅដល់តម្រូវការប្រចាំថ្ងៃរបស់មនុស្សរស់នៅជុំវិញពិភពលោក។ តួយ៉ាង បើយើងក្រឡេកទៅមើលអាហារកំប៉ុង ដោយមានការពេញនិយមខ្លាំង បានដាក់លក់ចែកចាយលើទីផ្សារដូចជា មី ត្រីខ សាច់កំប៉ុង ភេសជ្ជៈ អាចបង្កើនភាពងាយស្រួលរកក្នុងការចម្អិន ចំណេញពេលវេលាតិច លឿនទាន់ចិត្ត ជាហេតុធ្វើឱ្យមនុស្សមួយចំនួនជ្រើសយកអាហារកំប៉ុងមកធ្វើជាម្ហូបទទួលទានជាប្រចាំ។
យ៉ាងណាមិញ ចំពោះក្រុមអាហារកំប៉ុងនេះ ក្រៅពីមានគុណប្រយោជន៍ដូចដែលបានរៀបរាប់ខាងលើ ក្នុងលក្ខខណ្ឌប្រសិនណាបើទទួលទានអាហារកំប៉ុងក្នុងកម្រិតបរិមាណច្រើន ត្រូវបានគេសិក្សាឃើញថា វាអាចជះផលអាក្រក់ទៅដល់សរីរាង្គកាយ បង្កឱ្យចេញជាជំងឺផ្សេងៗដូចជា រលាកក្រពះពោះវៀន លើសឈាម ទឹកនោមផ្អែម...ដោយសារកម្រិតសារជាតិប្រៃផ្អែម បន្ថែមជាមួយនឹងសារជាតិគីមីរក្សាទុកនៅក្នុងអាហារកំប៉ុងទាំងនោះ។
ទន្ទឹមនេះទៀតសោត ចំពោះក្រុមអាហារកំប៉ុងដែលខូច និងហួសកាលបរិច្ឆេទកំណត់ គឺរឹតតែបង្កឱ្យមានផលអាក្រក់ដល់អ្នកទទួលទាន និងអាចធ្វើទុក្ខភ្លាមៗចេញជារោគអាការ ចុកឆ្អល់ពោះ រាគរូស ក្អួតចង្អោរ ឬមានករណីពុលប៉ះពាល់ដល់អាយុជីវិត។
កត្តានេះ ដើម្បីជាដំណោះស្រាយក្នុងការសម្គាល់ទៅក្រុមអាហារកំប៉ុងចៀសវាងទិញប៉ះរបស់ខូចគុណភាព និងហួសពេលវេលាកំណត់ ក្រុមការងារចាបបៃតង សូមលើកយកលក្ខណៈសម្គាល់មួយចំនួនផ្អែកតាមប្រភព tastingtable បានលើកឡើងថា គ្រប់អាហារកំប៉ុងទាំងអស់មុននឹងទិញញុំាត្រូវត្រួតពិនិត្យមើលឱ្យបានច្បាស់លាស់ទៅលើកាលបរិច្ឆេទផលិត និងផុតកំណត់ នៅលើសម្បកកំប៉ុងដោយកាលបរិច្ឆេទប្រសិនជាភាសាអង់គ្លេសគេភាគច្រើនប្រើជាពាក្យ Best By/Before បន្ទាប់មកដាក់ថ្ងៃខែឆ្នាំ ដែលបញ្ជាក់ថា អាហារកំប៉ុង គឺមានគុណភាពល្អត្រឹមថ្ងៃខែឆ្នាំ ដែលគេបានកំណត់នោះ។ ចំណែកឯមួយវិញទៀត គេអាចដាក់ជា ពាក្យកាត់ MFG (Manufacturing) ដែលជា កាលបរិច្ឆេទនៃផលិត និង EXP (Expiry) ដែលជាកាលបរិច្ឆេទនៃថ្ងៃផុតកំណត់។
ប្រភពដដែលបានបន្តឱ្យដឹងទៀតថា ប្រសិនបើកំប៉ុងអាហារមានខូចទ្រង់ទ្រាយ ដូចជា ប៉ោងកំប៉ុង ប្រេះឬខូចទ្រង់ទ្រាយគួរតែចៀសវាងដូចគ្នា បើទោះបីជាអាហារកំប៉ុងនោះមិនទាន់ហួសថ្ងៃកំណត់ក៏ដោយ។ សភាពអាហារកំប៉ុងដែលខូចទ្រង់ទ្រាយ យើងក៏អាចសង្កេតបន្ថែមទៅលើ ក្លិនមិនល្អ ទ្រង់ទ្រាយអាហារត្រូវខូចទាំងស្រុង ឬមានលក្ខណៈចង់រលួយ ឬក៏មានផ្សិតសៗ....ជាដើម។
បន្ថែមជាមួយគ្នានេះ ក្រសួងកសិកម្មសហរដ្ឋអាមេរិក ក៏បានបញ្ជាក់ដែរថា យកល្អមិនត្រូវទទួលទានអាហារក្នុងកំប៉ុង ដែលលេចធ្លាយ ប្រេះ ប្រឡាក់ ឬមានគម្របរលុងបិទមិនជិតឡើយ ពីព្រោះអាហារកំប៉ុងទាំងនេះ មានហានិភ័យដ៏គ្រោះថ្នាក់ណាស់ ដោយវាមានផ្ទុកសារធាតុ Clostridium botulinum ដែលអាចបណ្តាល ឱ្យស្លាប់ បើនេះទោះបីជាវាស្ថិតនៅក្នុងករណីកម្រក៏ដោយក្តី៕
អត្ថបទដោយ៖ ប៉ែត ធីតា