យ៉ាអ៊ួរត្រូវបានគេដឹងថាជាប្រភេទអាហារសម្បូរសារធាតុចិញ្ចឹមដែលផ្តល់ថាមពលដល់រាងកាយ ដោយវាមានផ្ទុកប្រូតេអ៊ីន ប្រូបាយអូទិច កាល់ស្យូម ម៉ាញ៉េស្យូម វីតាមីន និងអាស៊ីតខ្លាញ់សំខាន់ៗមួយចំនួន ដែលរាងកាយរបស់អ្នកត្រូវការដើម្បីមានសុខភាពល្អ។ ផ្អែកតាមការចែករំលែករបស់គេហទំព័រclevelandclinic បានឱ្យដឹងថាប្រូបាយអូទិច(probiotics) ដែលមានក្នុងយ៉ាអ៊ួរ ជាបាក់តេរីល្អ ដែលជួយកម្ចាត់បាក់តេរីអាក្រក់ចេញពីក្នុងខ្លួន និងធ្វើឱ្យរាងកាយមានតុល្យភាព។ វាក៏ជួយការពារ និងបំប៉នសុខភាព ពិសេសជួយសម្រួលប្រព័ន្ធរំលាយអាហារ បន្ទោរបង់បានស្រួល និងការពារពីជំងឺមហារីកប្រព័ន្ធរំលាយអាហារបានផងដែរ។

ផលិតផលយ៉ាអ៊ួរមានច្រើន តើធ្វើម៉េចទើបដឹងថា ប្រភេទណាដែលអាចជួយសម្រកគីឡូ ការពារជំងឺបាន ហើយផ្ដោតសំខាន់លើសុខភាព? តាមការចែករំលែករបស់លោក ឈឿន វុត្ថា ស្ថាបនិកសិប្បកម្មផលិតយ៉ាអ៊ួរសុខភាពSUNSHINE YOGURT ដែលផលិតយ៉ាអ៊ួរសុខភាពកម្ពុជា Natural Yogurt-Probiotic បានប្រាប់ថាគ្រប់ផលិតផលយ៉ាអ៊ួរទាំងក្នុងនិងក្រៅស្រុក សុទ្ធតែមានការណែនាំ ប្រាប់ពីវត្ថុធាតុដើមទាំងអស់ក្នុងលើសំបកវិចខ្ចប់។ បងប្អូនអាចរើសយកប្រភេទយ៉ាអ៊ួរដែលជំនួយសុខភាព គឺជាយ៉ាអ៊ួរដែលផលិតឡើងសាមញ្ញបំផុត មានន័យថាសារធាតុផ្សំតិច រសជាតិដើម មិនមានបន្ថែមសារធាតុបន្ថែមរសជាតិ ជាតិស្ករ សារធាតុបន្ថែមពណ៌ និងសារធាតុធ្វើឱ្យខាប់នោះទេ។

ដូចគ្នានេះដែរ តាមការចែករំលែកពីharvard.edu ក៏បានប្រាប់៣ចំណុចពីការជ្រើសរើសយ៉ាអ៊ួរ ដែលផ្ដល់អត្ថប្រយោជន៍ដល់សុខភាពមានដូចជា៖

គ្មានស្ករ៖ យ៉ាអ៊ួរដែលល្អសម្រាប់សុខភាពជាយ៉ាអ៊ួរដែលគ្មានជាតិផ្អែម (មិនបន្ថែមជាតិស្ករ)។ ប្រភេទយ៉ាអ៊ួរដែលមានជាតិផ្អែម ដែលមានបន្ថែមរសជាតិជាច្រើនផ្សេងៗទៀត លោកអ្នកអាចញ៉ាំវាបាន ប៉ុន្តែវាមិនបានចាត់ចូលជាផលិតផលអាហារសុខភាពនោះទេ។

ប្រូតេអ៊ីន៖ គួររើសយ៉ាអ៊ួរណាដែលមានប្រូតេអ៊ីន ចាប់ពី៥ក្រាមឬច្រើនជាងនេះឡើងទៅ(មើលក្នុងសំបកវិចខ្ចប់)។ យ៉ាអ៊ួរដែលមានប្រតេអ៊ីនខ្ពស់ ពេលញ៉ាំហើយអ្នកមានអារម្មណ៍ថាឆ្អែតបានយូរ វាក៏អាចជួយប្រឆាំងជាមួយនឹងការឡើងគីឡូ មិនឱ្យឃ្លានអាហារច្រើនផ្ដេសផ្ដាសផងដែរ។

សារធាតុផ្សំសាមញ្ញ៖ ព្យាយាមជ្រើសរើសប្រភេទយ៉ាអ៊ួរណាដែលមានចំនួនគ្រឿងផ្សំបន្ថែម តិចបំផុត។ ត្រង់ចំណុចនេះលោក ឈឿន វុត្ថា ក៏បានឱ្យលើកឡើងផងដែរថា សារធាតុផ្សំផលិតយ៉ាអ៊ួររសជាតិដើម មានសារធាតុផ្សំមិនច្រើនទេ ផលិតចេញពីទឹក ម្សៅទឹកដោះគោ និងបាក់តេរីល្អប្រភេទ(probiotics) តែប៉ុណ្ណោះ។ គ្រាន់តែរបៀបធ្វើត្រូវមានបច្ចេកទេសច្រើនដំណាក់កាល។ បើចង់ញ៉ាំយ៉ាអ៊ួរឱ្យមានរសជាតិឆ្ងាញ់ហើយល្អសម្រាប់សុខភាព អាចលាយឬក្រឡុកជាមួយផ្លែឈើស្រស់ៗ ឬគ្រាប់ធញ្ញជាតិ ញ៉ាំបែបនេះជំនួយសុខភាព ហើយមិនភ័យខ្លាចប៉ះពាល់សុខភាពទៀត។

បន្ថែមពីនោះ លោក ឈឿន វុត្ថា ក៏សូមអំពាវនាវឱ្យប្រជាពលរដ្ឋខ្មែរ យកចិត្តទុកដាក់លើសុខភាព ពិសេសកែប្រែរបបអាហារទទួលទានជាប្រចាំថ្ងៃ។ កុំទទួលទានតាមចិត្តចង់ ទទួលទានដោយអារម្មណ៍ រកតែរបស់ឆ្ងាញ់ រកតែរបស់មើលទៅទំនងមានរូបរាងស្អាតទាក់ទាញ ត្រូវគិតដល់សុខភាពផង។ មុននឹងទិញផលិតផលឬចំណីអាហារអ្វីក៏ដោយ កុំខ្វល់តែរឿងតម្លៃ ដែលត្រូវដឹងសិនថា បើញ៉ាំហើយបានអ្វីមកវិញ មានអត្ថប្រយោជន៍អ្វីខ្លះ មានផលប៉ះពាល់អ្វីដែលឬអត់។ និយាយរួម ត្រូវគិតសុខភាពជាធំមុនអ្វីៗទាំងអស់ ពលរដ្ឋប្រៀបបានដូចជាទាហានដែល បើទាហានខ្សោយ ជំងឺច្រើនជាប់ខ្លួនធ្វើម៉េចប្រយុទ្ធឈ្នះ ទាល់តែទាហានមានសុខភាពល្អ ទើបប្រទេសជាតិរីកចម្រើនបាន៕

អត្ថបទដោយ៖ Senghong