អ្វីៗ គ្រប់យ៉ាងដែលមានភាពអស្ចារ្យបាន គឺកើតពីច្បាប់សន្សំជានិច្ចកាល គ្មានអ្វីបានមកតាមផ្លូវកាត់នោះទេ។ ច្បាប់ធម្មជាតិនេះយុត្តិធម៍ខ្លាំងណាស់ វានឹងដាក់ទោសទៅលើជនណាដែលល្មើសនឹងច្បាប់សន្សំនេះ។ បើអ្នកចង់មានលុយមួយលានដុល្លារ អ្នកត្រូវរកលុយ និងសន្សំពីតិចតួចជាមុនសិន។ គ្មានអ្នកណាម្នាក់មិនចេះអ្វីសោះ អាចធ្វើជំនួញបានលុយភ្លាមៗមួយលានដុល្លារជាដាច់ខាត វាត្រូវកើតពីការប្រើពេលវេលា សំន្សំចំណេះដឹង និងសំន្សំបទពិសោធន៍ជាច្រើនឆ្នាំដើម្បីសម្រេចគោលដៅបានកំណត់។

ពេលអ្នកចាប់ផ្តើមសន្សំអ្វីមួយពីតូច ផលវានឹងចាប់ផ្តើមរីកធំម្តងបន្តិចៗ ជានិច្ច។ ដូចអ្វីដែលអ្នកប្រាជ្ញា ឡៅ ជឺ របស់ចិនបានពោលថា “ការចាប់ផ្តើមធ្វើដំណើររាប់រយះគីឡូម៉ែត គឺចាប់ផ្តើមពីមួយម៉ែតជាមុនសិន”។ ការសម្រេចដំណើរកិច្ចការអ្វីមួយ មិនមែនចាប់ផ្តើមត្រឹមតែមួយថ្ងៃចប់នោះទេ គឺវាមានតាមដំណាក់កាលនីមួយៗរបស់វាដែលត្រូវប្រើពេលវេលាផងដែរ។ សូម្បីតែរុក្ខជាតិក៏ត្រូវការលូតលាស់ម្តងបន្តិចៗ ក៏វាត្រូវការសន្សំពេលវេលាដែរ។ សមត្ថភាពរបស់មនុស្សខ្លាំង ក៏ត្រូវការការអភិវឌ្ឍជាប្រចាំថ្ងៃដែរ។ មនុស្សដែលមានសាច់ដុំធំៗ គេហ្វឹកហាត់ខ្លួនប្រាណជាប្រចាំ។ មនុស្សដែលមានទំនុកចិត្តនឹងគ្នាជានិច្ច ជាមនុស្សប្រើពេលវេលាស្វែងយល់ចិត្តគ្នា ដែលប្រកបដោយភាពស្មោះត្រង់។ នេះហើយជាគោលការណ៍នៃច្បាប់សំន្សំនេះឯង ដែលលោកអ្នកអាចប្រើសម្រាប់ជីវិតបានជានិច្ច៕ អត្ថបទដោយ៖ ទ្រ សុភាព