ពេលអ្នកមានវិបត្តិផ្លូវចិត្ត និងទុក្ខព្រួយច្រើន អ្នកងាយរងផលប៉ះពាល់ដល់សុខភាពនាំឱ្យកើតជំងឺលឿន។ លោក Willis H.Carrier ជាវិស្វករដ៏ល្បីមានការព្រួយចិត្តដេកមិនលក់ បក់មិនល្ហើយ នាំឱ្យគាត់ឈឺក្បាលចង់បែក និងឈឺពោះវៀនទៀត។ មកពីគាត់ខ្លាចម្ចាស់ក្រុមហ៊ុនបណ្តេញចេញ ធ្វើឱ្យគាត់កើតវិបត្តិផ្លូវចិត្ត ប៉ុន្តែគាត់បានរកឃើញវិធីដោះស្រាយ ៣បន្តកន្ទុយគ្នា ដើម្បីជួយស្រោចស្រង់ជីវិតគាត់។ តើក្បួនទាំង៣មានអ្វីខ្លះ?

ក្បួនទី ១៖ អ្នកត្រូវគិតវិភាគពីស្ថានការណ៍ឱ្យចំៗ កុំមានអារម្មណ៍ភ័យខ្លាច។ រួចគិតថា តើការបរាជ័យនេះ មានផលខូចខាតកម្រិតណា? គាត់បានគិតវិភាគថា គ្មានអ្នកណាចាប់ខ្ញុំដាក់គុកទេ។ គ្រាន់តែគេបញ្ឈប់ខ្ញុំពីការងារប៉ុណ្ណោះ។ ហើយថ្លៃសងការដឹកជញ្ជូនគ្រឿងចក្រត្រឡប់ទៅឱ្យក្រុមហ៊ុនវិញ ខ្ញុំបង់ប្រហែល ២០.០០០ដុល្លារប៉ុណ្ណោះ ។

ក្បួនទី ២ ៖ បន្ទាប់គិតពីផលខូចខាតរួច ខ្ញុំហ៊ានទទួលលទ្ធផលនេះ បើវាគ្មានជម្រើសអ្វីផ្សេងទេ។ ទោះបីការបរាជ័យ ធ្វើឱ្យគាត់ខូចឈ្មោះ និងត្រូវគេបណ្តេញចេញក៏ដោយ ក៏គាត់អាចរកការងារថ្មីធ្វើបានដែរ។ ការពិតបានឱ្យគាត់ដឹងថា ថ្លៃខូចខាតទាំងអស់នោះ ខាងក្រុមហ៊ុនបង់ចំណាយត្រឹមតែ ២០ ០០០ដុល្លារហ្នឹងជាការស្រាវជ្រាវ ឬជាការសាកល្បងប៉ុណ្ណោះ។ ធ្វើឱ្យគាត់សប្បាយចិត្តធូរទ្រូងឡើងវិញ។

ក្បួនទី៣៖ បន្ទាប់មកទៀត ខ្ញុំចំណាយពេល និងកម្លាំងកាយចិត្តខំដោះស្រាយវិបត្តិធំៗ ដែលខ្ញុំទទួលយក ធ្វើវាឱ្យល្អបំផុត។ គាត់ចាប់ផ្តើមព្យាយាមដោះស្រាយឱ្យថ្លៃចំណាយតិចបំផុត ដែលកំពុងតែប្រឈមមុខនេះ។ គាត់បានស្នើឱ្យក្រុមហ៊ុនបន្ថែមដើមទុន ៥ ០០០ដុល្លារ ដើម្បីទិញគ្រឿងបន្លាស់មកផ្សំគ្នាបន្ថែម ហើយគាត់បានដោះស្រាយបញ្ហានេះបានយ៉ាងល្អ។ ហើយលទ្ធផល ធ្វើឱ្យក្រុមហ៊ុនត្រូវខាត ២០.០០០ដុល្លារឯណោះ តែបែរជាចំណេញបាន ១៥.០០០ដុល្លារទៅវិញ។

នេះជាមេរៀនមួយ មានតម្លៃក្នុងការដោះស្រាយវិបត្តិផ្លូវចិត្តនេះ តាមលោក Willis H.Carrier គាត់គិតថា គាត់ត្រូវចំណាយលុយ ២០ ០០០ដុល្លារ ប៉ុន្តែជាក់ស្តែង គាត់អត់លុយហើយ និងហ៊ានស្នើសុំលុយពីក្រុមហ៊ុនដោះស្រាយគ្រឿងបន្លាស់ហ្នឹង រួចធ្វើឱ្យចំណេញបាន ១៥.០០០ដុល្លារឯណោះ។ វិបត្តិផ្លូវចិត្តភាគច្រើន មកពីមនុស្សគិតច្រើនពេក រហូតធ្លាក់ក្នុងអន្លង់ងងឹតកើតជាវិបត្តិផ្លូវចិត្តកម្រិតធ្ងន់ធ្ងរ។ ពេលអ្នកចាប់ធ្វើ ពេលខ្លះ វាងាយជាងអ្នកគិតទៅទៀត។ ធ្វើឱ្យច្រើន អ្នកច្បាស់ជាមានដំណោះស្រាយល្អៗ ក្នុងជីវិតរបស់អ្នក និងជាបទពិសោធន៍អស្ចារ្យផងដែរ៕

ប្រភពដោយ៖ How to Stop Worrying and Start Living ពីសៀវភៅលោក Dale Carnegie

អត្ថបទដោយ៖ ទ្រ សុភាព