១. សម្រួលផ្លូវដង្ហើមមួយៗ ឱ្យចិត្តធូរពីបញ្ហា៖ ការហាត់ពត់ទម្លាប់ធ្វើសមាធិតាមរយៈការដកដង្ហើមមួយៗ វែងៗ ដោយមានសតិដឹងតាមខ្យល់ដងង្ហើមនោះ វាធ្វើឱ្យចិត្តយើងទម្លាក់បញ្ហាចេញពីចិត្ត។ តាមព្រះពុទ្ធការធ្វើសមាធិនេះ ជួយឱ្យចិត្តត្រជាក់ ចិត្តស្ងប់។ សមាធិមិនត្រឹមតែជួយបន្ធូរអារម្មណ៍តានតឹងទេ វាជួយឱ្យស្ថានភាពផ្លូវចិត្តឱ្យរីករាយ ឱ្យតាន់ជាងមុនផងដែរ។ តាមរយៈការសិក្សាមួយចំនួនបានបង្ហាញថា ការធ្វើសមាធិតាមការដកដង្ហើមនេះ ជួយបង្កើននូវកម្លាំងចិត្តជម្នះលើបញ្ហាក្នុងជីវិតប្រចាំថ្ងៃ។

២. បណ្តុះភាពរីករាយដោយការគិតវិជ្ជមាន៖ គ្រាន់តែអ្នកណាត់ជួបជាមួយមិត្តស្និតស្នាលដែលជាមិត្តគិតវិជ្ជមានហើយមានទម្លាប់វិជ្ជមាននោះ វាធ្វើឱ្យចិត្តអ្នកឆ្លងភាពរីករាយដូចគ្នា។ ការគិតវិជ្ជមាន វាធ្វើឱ្យចិត្តអ្នករីករាយក្នុងបញ្ហា ដូចជាបើអ្នកមានបញ្ហាក្នុងការរកស៊ី បើអ្នកអង្គុយពិបាកចិត្ត វាគ្មានបានផលអ្វីទេ ប៉ុន្តែបើគិតវិជ្ជមានទៅអានសៀវភៅ និងនិយាយជាមួយបុគ្គលឆ្នើម ឬស្តាប់បុគ្គលរកស៊ី អ្នកនឹងមានគំនិតរកស៊ីទៅដោះបញ្ហាមិនខានទេ។ នេះជាការគិតវិជ្ជមានបណ្តុះភាពវិជ្ជមានធ្វើឱ្យចិត្តរបស់អ្នកនឹងឈ្នះលើបញ្ហាមិនខានទេ។ សូម្បីតែតារាចម្រៀង Selena-Gomez បានបង្កើតទម្លាប់ចាប់ផ្តើមថ្ងៃថ្មីជាមួយផ្នត់គំនិតវិជ្ជមាន ដើម្បីឱ្យអារម្មណ៍ស្រស់ស្រាយ រីករាយ ពេញដោយក្តីសង្ឃឹម ហើយបែបនេះយូរៗទៅ វាបានជួយឱ្យផ្នត់គំនិតនិងភាពអវិជ្ជមានបាត់បន្តិចម្តងៗ។ ជារៀងរាល់ព្រឹក គាត់តែងចែករំលែកផ្នត់គំនិតវិជ្ជមាននៅលើ Instagram របស់គាត់។

៣. ប្រើកាយនាំចិត្ត៖ នៅក្នុងសៀវភៅមេដែករបស់លោកគ្រូ សំ កុសល បាននិយាយថា"ចិត្តនាំកាយ កាយនាំចិត្ត"។ ដែលមានន័យថាបើចិត្តមិនសប្បាយ កាយត្រូវបញ្ចេញសកម្មភាពឱ្យខ្លាំង នាំខ្លួនឯងធ្វើរឿងសប្បាយៗ ញ៉ាំរបស់ឆ្ងាញ់ ជួបមនុស្សដែលយើងស្រឡាញ់ ធ្វើរឿងដែលយើងចូលចិត្ត ធ្វើខ្លួនឱ្យរវល់ នោះអ្នកនឹងគ្មានពេលនឹកឃើញរឿងសោកសៅទៀតទេ។ រីឯ ចិត្តនាំកាយវិញ បើកាយយើងឈឺ ត្រូវបញ្ជាចិត្តឱ្យលើកទឹកចិត្តខ្លួនឯង និយាយរឿងវិជ្ជមានប្រាប់ខ្លួនឯងឱ្យច្រើន។ ឧទាហរណ៍ថា អ្នកកំពុងឈឺ ត្រូវប្រាប់ខ្លួនឯងថាមិនអីទេ គេងបន្តិច ញ៉ាំថ្នាំ ហាត់ប្រាណបន្តិច ជាវិញហើយ ប្រាប់ខ្លួនឯងថាអ្នកជាមនុស្សពូកែ៕ អត្ថបទដោយ៖ ទ្រ សុភាព