កុមារដែលទើបចេះដើរតេះតះ ជារឿយៗតែងតែជួបប្រទះនឹងការរីកលូតលាស់សក់មិនស្អាត ដែលអាចលេចឡើងជាដុំៗសម្រាប់រយៈពេល២ទៅ៣ខែដំបូង។ ម៉ាក់ៗមួយចំនួនធំ តែងព្រួយបារម្ភពីរូបសម្រស់របស់កូនៗ នៅពេលឃើញកូនរបស់ខ្លួន មិនសូវមានសក់ ដុះស្ដើងៗ ប្រសិនបើម៉ាក់ៗចង់ឲ្យកូនមានសក់ដុះមកស្អាត ក្រាស់ល្អ មានគន្លឹះងាយៗមួយចំនួនដែលមានសុវត្ថិភាព ធម្មជាតិ ទាមទារឲ្យម៉ាក់ៗអនុវត្តទៅលើកូនឲ្យបានជារៀងរាល់ថ្ងៃ ដើម្បីជួយក្នុងការលើកកម្ពស់ការលូតលាស់នៃសក់។ ផ្អែកតាមការឱ្យដឹងពីគេហទំព័រ timesofindia គន្លឹះទាំងអស់នោះរួមមាន៖
១. សិតសក់ដោយច្រាសទន់ៗ៖ ការសិតសក់ដោយមានច្រាស់ទន់ៗដោយស្រាលៗជាទៀងទាត់គឺចាំបាច់ដើម្បីធានាបាននូវចរន្តឈាមនៅក្នុងស្បែកក្បាលដើរបានត្រឹមត្រូវ។ វិធីបែបនេះគឺជួយម៉ាស្សា ក្បាលរបស់កូនអ្នកបានយ៉ាងល្អ។
២. ប្រេងដូង៖ គឺជាប្រភេទប្រេងដែលអាចយកទៅលាបនៅលើសក់ដែលមានសារធាតុចិញ្ចឹមច្រើនប្រភេទ។ វាមិនត្រឹមតែព្យាបាលស្បែកក្បាលប៉ុណ្ណោះទេ ប៉ុន្តែក៏ជួយជំរុញដល់ការលូតលាស់សក់ផងដែរ។ ការម៉ាស្សាស្បែកក្បាលរបស់កូនក្មេងជាប្រចាំជាមួយនឹងប្រេងដូង អាចធ្វើឱ្យសក់របស់ពួកគេដុះក្រាស់ និងទន់ជាងមុន។
៣. ចៀសវាងការចងសក់៖ ឪពុកម្តាយភាគច្រើនចូលចិត្តចងសក់កូនតូចដើម្បីឲ្យស្រឡះក្បាលល្អ មើលទៅគួរឱ្យស្រលាញ់ និងធ្វើឱ្យក្មេងមើលទៅមានរបៀបរៀបរយ។ ប៉ុន្តែឪពុក ម្ដាយមិនបានដឹងសោះឡើយ សក់កូនទើបលូតលាស់តិចតួច ការចងសក់នេះពិតជាអាចបំផ្លាញការលូតលាស់របស់សក់បានដោយងាយ ដែលវាធ្វើឲ្យឫសសក់ក្មេងខ្សោយ និងនាំឱ្យខូចសក់។
៤. វីតាមីន E៖ ប្រេងវីតាមីន E ក៏អាចត្រូវបានប្រើប្រាស់យ៉ាងងាយស្រួលដើម្បីផ្តល់សារធាតុចិញ្ចឹមដែលត្រូវការច្រើនដល់ស្បែកក្បាលរបស់កូនអ្នក។ អ្នកអាចលាយប្រេងវីតាមីន E ២-៣ដំណក់ក្នុងប្រេងដូង ហើយលាបលើសក់ទារក។ ប្រេងវីតាមីន E នឹងទប់ស្កាត់សំណើមនៅក្នុងស្បែកក្បាល និងជំរុញការលូតលាស់សក់មានសុខភាពល្អ។ សូមប្រឹក្សាជាមួយគ្រូពេទ្យឱ្យបានច្បាស់មុននឹងទិញវីតាមីនណាមួយមកប្រើ។
ជារួមមកវិញបើម៉ាក់ៗពិតជាចង់ឱ្យកូនមានសក់ដុះស្អាតតាមបែបធម្មជាតិ រួមទាំងមានសុវត្ថិភាព១០០% គួរកុំរំលងវិធីសាស្រ្ដទាំង៤ខាងលើនេះឲ្យសោះ ព្រោះសក់គឺមានសារៈសំខាន់បំផុតដែលអាចជួយលើកសម្រស់ឱ្យកាន់តែស្អាតបានមួយកម្រិតទៀត ៕
អត្ថបទដោយ៖ ស្រីណុច