យោងតាមប្រភពព័ត៌មានពី Gov.uk បានឱ្យដឹងថា ការសាកល្បងនេះ ត្រូវបានគាំទ្រដោយទឹកប្រាក់ជិត១៤លានដុល្លារអាមេរិក នៅក្នុងការផ្ដល់មូលនិធិរបស់រដ្ឋាភិបាល និងជាផ្នែកមួយនៃកិច្ចខំប្រឹងប្រែង ដើម្បីកែលម្អការថែទាំជំងឺមហារីកក្នុងចក្រភពអង់គ្លេស។ ការធ្វើតេស្តសាកល្បងនឹងធ្វើឡើងចំនួន៣០កន្លែងនៅទូទាំងប្រទេស។ បច្ចុប្បន្ននេះ ជំងឺមហារីកសុដន់ត្រូវការអ្នកឯកទេសចំនួន២នាក់ ក្នុងការត្រួតពិនិត្យតាមរយៈ mammogram។

ប្រភពដដែលបានបន្ដទៀតថា ប្រសិនបើការសាកល្បងបច្ចេកវិទ្យា AI ដ៏ទំនើបនេះ ទទួលបានជោគជ័យ វាអាចសម្រួលការងារដល់អ្នកជំនាញផ្នែកវិទ្យុសកម្ម រួមទាំងអ្នកឯកទេសរាប់រយនាក់នៅទូទាំងប្រទេស ជួយកាត់បន្ថយបញ្ជីរង់ចាំចូលពិនិត្យ ជួយសង្គ្រោះជីវិតមនុស្សកាន់តែច្រើន និងជួយដោះស្រាយការកើនឡើងអត្រាជំងឺមហារីកផងដែរ។ សម្រាប់គម្រោងនៃការដាក់ដំណើរការ នឹងធ្វើឡើងនៅចុងឆ្នាំ២០២៥នេះ។

គួរបញ្ជាក់ឱ្យដឹងផងដែរថា មានស្ត្រីប្រមាណ៥៥,០០០នាក់ត្រូវបានធ្វើរោគវិនិច្ឆ័យឃើញថាមានជំងឺមហារីកសុដន់ជារៀងរាល់ឆ្នាំក្នុងចក្រភពអង់គ្លេស។ បច្ចុប្បន្ន ស្ត្រីដែលមានអាយុចន្លោះពី៥០ទៅ៧១ឆ្នាំ ត្រូវបានណែនាំឱ្យទៅពិនិត្យរកជំងឺរៀងរាល់៣ឆ្នាំម្ដង៕

អត្ថបទដោយ៖ មាស ចាន់ដារ៉ា