ខួរក្បាលរបស់យើងពិតជាសំខាន់ណាស់ បើខួរក្បាលគិតពុំសូវបានល្អប៉ុន្មានទេ ការដោះស្រាយបញ្ហាក៏ខ្សោយតាមហ្នឹងដែរ។ ចឹងហើយ អ្នកត្រូវមានកម្មវិធីបង្វឹកឱ្យខួរក្បាលគិតបានរហ័ស និងកុំឱ្យស្រ្តេសច្រើន។ ថ្ងៃនេះ យើងមានទម្លាប់ចំនួន៤ ពីបុគ្គលល្បីៗ ឱ្យខួរក្បាលអ្នករីករាយ៖
១. ទម្លាប់ការគេងជារឿងសំខាន់ ដើម្បីរក្សាប្រព័ន្ធអង្គចងចាំខួរក្បាលកុំឱ្យភ្លេច ឬស្រ្តេសច្រើន។ សូម្បីលោក អាញស្តាយ ជាបិតារូបវិទ្យាដែលអាចគិតរកទ្រឹស្តីសម្ព័ទ្ធភាពបានសម្រច គឺគាត់មានទម្លាប់គេងមួយថ្ងៃ ១០ម៉ោងជាង ដើម្បីឱ្យអារម្មណ៍គាត់ផ្តោតការគិតបានល្អ។ ពេលគាត់គិតម្តងៗ មានរយៈពេលយូរណាស់រហូត ៣ទៅ៥ម៉ោងដោយការផ្តោតចិត្តគំនិតលើរឿងដែលគាត់ចង់បង្កើតរបស់អ្វីមួយតាមរូបវិទ្យា។ ពេលអ្នកគេងបានស្ងប់ អ្នកមានអារម្មណ៍គិតអ្វីក៏បានល្អនិងរហ័សជាងគេដែរ។
២. ស្រូបយកពន្លឺព្រះអាទិត្យនាពេលព្រឹក៖ ពន្លឺព្រះអាទិត្យនាពេលព្រឹក មានសារៈសំខាន់ក្នុងការគ្រប់គ្រង rythym circadian ដែលនៅពេលណាពន្លឺនោះប៉ះចំភ្នែករបស់យើង វារំញោចផ្លូវសរសៃប្រសាទដែលភ្ជាប់រីទីណា និងអ៊ីប៉ូតាឡាមូសនៅក្នុងខួរក្បាល។ ដោយដំណើរការនេះ ប្រាប់ទៅកាន់ខួរក្បាលឱ្យដំណើរការសីតុណ្ហភាពរាងកាយ អរម៉ូន និងដាស់សរីរាង្គផ្សេងទៀតឱ្យភ្ញាក់កុំឱ្យខួរក្បាលគិតរាងស្ពិកៗ។ នេះជាការយោងតាមវេជ្ជបណ្ឌិត Patrick K. Porter អ្នកជំនាញផ្នែកខួរក្បាល។
៣. ទម្លាប់អានសៀវភៅ មានបុគ្គលខ្លាំងៗ ជាច្រើនមានទម្លាប់អានគ្មានពីរនោះទេ។ ពេលអ្នកអានសៀវភៅច្រើនដូចជាអ្នកបញ្ចូលទិន្នន័យសំខាន់ៗ ចូលក្នុងខួរក្បាល ហើយពេលអ្នកគិតត្រឡប់ទៅលើរឿងណាមួយ គិតបានលឿនជាងអ្នកពុំសូវបានអានច្រើន។ មានបុគ្គលដូចជា លោក Bill Gates លោក Jeff Bezos និងលោកWarren Buffett សុទ្ធតែអ្នកបង្វឹកខួរក្បាលចេញពីការអានសៀវភៅយ៉ាងជក់ចិត្តជក់អារម្មណ៍បំផុត។
៤. ក្រោយពីអានហើយទន្ទេញហើយ អាចសាកល្បងវិធីមួយទៀតដើម្បីចងចាំវាបានយូរគឺសរសេរចេញនូវអ្វីដែលយើងបានចាំ។ ការសរសេរវាបានធ្វើឱ្យខួរក្បាល ដៃ និងភ្នែករបស់យើងមានទំនាក់ទំនងជាមួយគ្នា ហេតុនេះវាក៏ជាល្បិចមួយឱ្យធ្វើឆាប់ចងចាំបានផងដែរ។ ព្យាយាមធ្វើដូចនេះ នៅពេលប្រលងឬយកទៅប្រើការជាក់ស្ដែង បើភ្លេច អាចបិទរកនឹកស្រមៃដល់រូបភាព អក្សរដែលបានសរសេរនោះបានផងដែរ។
ទម្លាប់ទាំង៤នេះ មានប្រសិទ្ធភាពខ្ពស់ជួយបង្វឹកខួរក្បាលចងចាំបានល្អ និងកុំឱ្យស្រ្តេសច្រើន។ ទម្លាប់ប្រចាំថ្ងៃនេះ មានឥទ្ធិពលដល់ខួរក្បាលណាស់ ដូចជាទម្លាប់ផឹកស្រាប្រចាំថ្ងៃ អ្នកគិតថា មិនអីទេ ប៉ុន្តែរយៈពេល៥ទី១០ឆ្នាំ ការគិតចុះខ្សោយខ្លាំង និងមានជំងឺថែមទៀត។ ចូរអនុវត្តតាមទម្លាប់៤នេះ ខួរក្បាលអ្នកសប្បាយចិត្តណាស់៕ អត្ថបទដោយ៖ ទ្រ សុភាព