១. ដកខ្លួនចេញពីស្រ្តេស៖ លោក លី កុំកុំ បាននិយាយថា ពេលការងារច្រើន បញ្ហាក៏ច្រើនតាមហ្នឹងដែរ។ ពេលបញ្ហាច្រើនពេក ដោះស្រាយបញ្ហាមិនទាន់ទេ នាំឱ្យយើងកើតស្រ្តេសខ្លះដែរ។ ពេលគាត់ស្រ្តេស ដាច់ខាតគាត់មិនទុកខ្លួនឱ្យស្រ្តេសត្រាំនឹងបញ្ហានោះទេ។ គាត់ដកខ្លួនចេញពីកន្លែងការងារបន្តិចសិន អាចទៅផឹកភេសជ្ជៈមួយកែវ និងជិះឡានលំហែរអារម្មណ៍បន្តិច ហើយអាចនិយាយគ្នាលេងជាមួយណានរម្នាក់ ធ្វើឱ្យអារម្មណ៍គាត់ស្រាលបញ្ហាក្នុងចិត្ត ទើបគាត់ត្រឡាប់មកធ្វើការងារ វាពិតជាមានប្រសិទ្ធភាពខ្ពស់។ នេះជាវិធីងាយៗ ដកចិត្តពីស្រ្តេសមករស់ក្នុងសន្តិភាព។ អ្នក៏អាចធ្វើបានដូចគ្នា។ ផ្អាក់ការងារបន្តិច ដើរប្រហែល ២នាទី អារម្មណ៍របស់អ្នកធូរស្រាលហើយចាំបកមកធ្វើការវិញ លទ្ធផលការងាររបស់អ្នកក៏លឿនហើយអត់ស្មុគថែមទៀត។

២. ប្រើទម្លាប់តូចៗ រក្សាខួរក្បាល៖ បើខួរក្បាលយើងចុះខ្សោយ ហើយយើងខំប្រឹងប្រើទៀត វាមិនខុសគ្នាពីពូថៅមិនមុតនៅតែខំកាប់នោះទេ។ លោក Komkom Ly បាននិយាយពីបទពិសោធន៍ខ្លួនថា ខួរក្បាលរបស់មនុស្សយើង បើចេះប្រើវាក្នុងការងារនិងការរកស៊ីដឹងតែមានលទ្ធផលមានចំណូលខ្ពស់។ គាត់មានទម្លាប់តូចៗ រក្សាថាមពលខួរក្បាលដូចជា ហូបអាហារបែបស្រស់ៗ មានបន្លែ ផ្លែឈើ និងត្រី ហូបតែត្រឹម ៨០%នៃក្រពះមិនឱ្យឆ្អែតពេកទេ វាធ្វើឱ្យគាត់ស្រួលខ្លួនអារម្មណ៍ល្អ។ មានទម្លាប់តូចទៀត គាត់ចូលចិត្តស្តាប់បុគ្គលឆ្នើមៗ និយាយដើម្បីបញ្ចូលគំនិតថ្មីៗ ក្នុងខួរក្បាល។ មានតែគំនិតមានថាមពលខ្លាំងទេ បានយើងកម្រស្រ្តេស។ 

ជីវិតស្រ្តេសមកពីអ្នកធ្វើអ្វីមួយ មានកំហុសឆ្គងហើយមិនព្យាយាមរកផ្លូវដោះស្រាយ និងមិនប្រឈមមុខជាមួយនឹងវា។ សម្រាប់លោក កុំកុំ បានឆ្លងកាត់កំហុសនិងបញ្ហាច្រើនណាស់ ដើម្បីជំនួសឱ្យការអង្គុយកើតទុក្ខ គាត់ត្រូវតែរៀនពីកំហុសហើយ ឆាប់កែប្រែកំហុសឆ្គង កុំឱ្យវាកើតម្តងទៀត។ ព្រោះកំហុសជាឱកាសបង្កើនចំណូល។ មានពាក្យមួយគេតែងនិយាយថា ដោះបញ្ហាកើនចំណូល។ ព្រោះលុយនៅក្នុងបញ្ហា។ ដើម្បីដោះបញ្ហាបាន យើងមានគំនិតខ្លាំងសិន។ សូម្បីតែលោក Bill Gates បានផ្តល់មតិថា “យើងគួរតែអបអរភាពជោគជ័យ ប៉ុន្តែពេលបរាជ័យ យើងត្រូវរៀនពីវាដើម្បីឱ្យខួរក្បាលរបស់យើងកាន់តែឆ្លាត ដើម្បីធ្វើដំណើរទៅមុខទៀត”៕ អត្ថបទដោយ៖ ទ្រ​សុភាព