មុនលើផ្ទៃមុខជាផលរំខានដែលគួរឱ្យស្អប់ ស្របពេលរឿងមិនអាចបញ្ចប់ បន្ទាប់ពីមុខអស់មុខសស់ស្នាមគួរឱ្យខ្លាច។ បញ្ហាមួយនេះ ត្រូវបានចោទឡើងពាសពេញពិភពលោកជាពិសេសសម្រាប់យុវវ័យដែលទើបតែពេញវ័យ បែរជាត្រូវរងទុក្ខទោរម្នេញដោយសារបញ្ហា មុនស្នាម កើតមានឥតឈប់ឈរ ស្ទើរមិនហ៊ានដើរចេញក្រៅផ្ទះសូម្បីមួយជំហ៊ាន។

ដោយឡែក តើអ្នកដឹងទេថា បញ្ហាមុនស្នាមនេះ មិនមែនកើតមានដោយសារតែការរងសម្ពាធពីបរិយាកាសខាងក្រៅតែមួយមុខនោះទេ? ព្រោះថា របបអាហារដែលអ្នកកំពុងតែទទួលជាប្រចាំថ្ងៃក៏ជាផ្នែកធំមួយដែលធ្វើឱ្យកោសិកាស្បែកឆាប់រងនូវផលប៉ះទង្គិចផងដែរ ប្រសិនបើអ្នកញ៉ាំអាហារមួយចំនួនទាក់ទិនទៅនឹង សារធាតុខ្លាញ់ ស្ករ លើសលប់។

យោងតាមប្រភពចេញផ្សាយ healthline.com បានចែករំលែកនូវប្រភេទអាហារចំនួន ៧មុខ ជួយកម្ចាត់នូវស្នាមមុនលើស្បែកមុខយ៉ាងមានប្រសិទ្ធភាពបំផុត៖

១. ខាត់ណាដើម៖ មានជាតិសរសៃខ្ពស់ ផ្ទុកកាឡូរីទាបសម្បូរទៅដោយ វីតាមីន A, B-6, C,K ម៉ង់ហ្គាណែស កាល់ស្យូម ទង់ដែង ប៉ូតាស្យូម និងម៉ាញ៉េស្យូម។

ប្រសិទ្ធភាព៖ មានសារធាតុប្រឆាំងអុកស៊ីតកម្ម វីតាមីន និងសារធាតុរ៉ែក្នុងខាត់ណាដើមជួយកាត់បន្ថយការឡើងសម្ពាធឈាមដែលជាគន្លឹះក្នុងការជួយសម្រួលដល់កោសិកាស្បែកដែលងាប់។ វីតាមីន C ក៏ជួយជំរុញការបង្កើតខូឡូជែនជ្រាបចូលទៅជួសជុលផ្សះស្នាមមុន ជាំ និងប្រហោងបានយ៉ាងឆាប់រហ័ស។

២. ដំឡូងជ្វារ៖ ដំឡូងមួយប្រភេទនេះត្រូវបានក្រុមអ្នកសិក្សាស្រាវជ្រាវចំណីអាហាររកឃើញថា សម្បូរទៅដោយ សារធាតុ Retinol និង Beta-carotene។

ប្រសិទ្ធភាព៖ សារធាតុ Retinol បំប្លែងទៅជាវីតាមីនA ដែលមានសមត្ថភាពប្រឆាំងនឹងការកកើតមុន និងបំបាត់ភាពជ្រីវជ្រួញ។ ហើយវត្តមាន Retinol ត្រូវបានគេជ្រើសយកជាសារធាតុសំខាន់បំផុតខ្វះមិនបានសម្រាប់ដាក់នៅក្នុងផលិតផលថែរក្សាសម្ផស្សលក់នៅលើទីផ្សារ។ ចំណែកឯ Beta-carotene នឹងប្រែទៅជាវីតាមីនA ដែលមានលក្ខណៈសម្បត្តិដើរតួជារបាំងការពារស្បែកប្រឆាំងនឹងការប្រែពណ៌ ការរលាករោលនិងរន្ធញើសស្ទះដែលបណ្ដាលមកពីរ៉ាឌីកាល់សេរី។

៣. ក្រូចឆ្មា៖ ក្រូចឆ្មាត្រូវបានគេដឹងយ៉ាងច្បាស់ថា សម្បូរទៅដោយវីតាមីន C វីតាមីន B-6, អាស៊ីត pantothenic, ទង់ដែង និងម៉ង់ហ្គាណែស...។

ប្រសិទ្ធភាព៖ សមាសធាតុនៅក្នុងក្រូចឆ្មាអាចជួយ បង្កើនផលិតកម្មខូឡូជែន រារាំងរ៉ាឌីកាល់សេរី កម្ចាត់ចោលនៅសារអាតុកខ្វក់កកជាប់នៅក្នុងស្បែកមុខ និងពន្យាភាពចាស់។

៤. ល្ពៅ៖​ ល្ពៅមានផ្ទុកនូវសារធាតុប្រឆាំងអុកស៊ីតកម្ម វីតាមីនA វីតាមីនC វីតាមីនE វីតាមីន B2 ស័ង្កសី ទង់ដែង ម៉ង់ហ្គាណែស ប៉ូតាស្យូម និងបេតាការ៉ូទីន...។

ប្រសិទ្ធភាព៖ សារធាតុស័ង្កសី និងអាស៊ីតអាល់ហ្វាអុ៊កស៊ី(alpha hydroxy acids) ដែលមាននៅក្នុងល្ពៅអាចធ្វើឱ្យស្បែកទន់រលោង ម៉ត់ និងស្តារនូវតុល្យភាព pH ឡើងវិញ។ សារធាតុទាំង២ខាងលើនេះត្រូវបានគេរកឃើញជាច្រើននៅក្នុងផលិតផលគ្រឿងសម្អាង។

៥. ល្ហុង៖ អត្ថប្រយោជន៍នៃផ្លែល្ហុងគឺសម្បូរទៅដោយ វីតាមីន A, C, K វីតាមីន B រួមទាំងសារធាតុ folate។

ប្រសិទ្ធភាព៖ វីតាមីននិងសារធាតុរ៉ែរបស់ផ្លែល្ហុង​ ចូលទៅជួសជុលនូវកោសិកាងាប់លើស្បែក ផ្តល់សំណើបដល់ស្បែក អាចជួយលុបបំបាត់ការលេចចេញនូវស្នាមមុន សរសៃក្រហម និងស្នាមជ្រីវជ្រួញ។

៦. ផ្កាខាត់ណា ស៖ ផ្កាខាត់ណាស មានផ្ទុកនូវជាតិសរសៃFiber វីតាមីន B6, C, K, folate ផូស្វ័រ ម៉ាញ៉េស្យូម...។

ប្រសិទ្ធភាព៖ សារធាតុអាស៊ីតអាមីណូដែលមាននៅក្នុងផ្កាខាត់ណាស គេហៅថាអ៊ីស្ត្រូឌីន មានសមត្ថភាព ការពារកាំរស្មី UV ដែលបង្កគ្រោះថ្នាក់ធ្វើឱ្យខូចស្បែក។

៧. ត្រីសាលម៉ុន៖ ត្រីសាលម៉ុនមានសារធាតុប្រឆាំងអុកស៊ីតកម្ម ប្រូតេអ៊ីន វីតាមីន B ប៉ូតាស្យូម សេលេញ៉ូម និងអាស៊ីតខ្លាញ់អូមេហ្គា៣។

ប្រសិទ្ធភាព៖ អូមេហ្គា ៣ ការពារស្បែកពីការបំផ្លាញ ដោយពន្លឺព្រះអាទិត្យកាត់បន្ថយហានិភ័យក្នុងការវិវត្តទៅជាជំងឺមហារីកស្បែក និងស្នាមអុជខ្មៅដែលបណ្តាលមកពីការប៉ះពាល់នឹងពន្លឺព្រះអាទិត្យយូរ៕