ជំងឺខ្សោយបេះដូង គឺជាការធ្លាក់ចុះ ឬខ្សោយនូវមុខងារបេះដូង ក្នុងការនាំឈាមទៅចិញ្ចឹមសរីរាង្គនៃខ្លួនយើង។ តើពួកយើងគួរអនុវត្តន៍វិធីសាស្ត្របែបណាដើម្បីចាកឆ្ងាយពីជំងឺខ្សោយបេះដូង?
តួយ៉ាងប្រជាពលរដ្ឋខ្មែរមិនសូវជាមានការយកចិត្តទុកដាក់នឹងការថែទាំសុខភាពប៉ុន្មាននោះទេ ដែលជាហេតុធ្វើឱ្យប្រជាពលរដ្ឋងាយប្រឈមមុខយ៉ាងខ្លាំងចំពោះបញ្ហាសុខភាព ដូច្នេះដើម្បីការពារ និងចៀសវាងការកើតជំងឺខ្សោយបបេះដូងបាន ប្រជាពលរដ្ឋត្រូវផ្លាស់ប្ដូរនៅទម្លាប់អាក្រក់កន្លងទៅ ហើយមកអនុវត្តន៍វិធីសាស្ដ្រទាំង ៧ នេះវិញម្ដង ដើម្បីពង្រឹងសុខភាពរឹងមាំរួមមាន៖
១‑អ្នកត្រូវជៀសវាងអាហារដែលមានជាតិស្ករខ្ពស់ អាហារមានជាតិខ្លាញ់ ព្រោះវាបណ្តាលឱ្យមានការប្រមូលផ្តុំជាតិខ្លាញ់នៅក្នុងសរសៃឈាម។
២‑អ្នកត្រូវបរិភោគអាហារដែលមានជាតិខ្លាញ់ទាបដូចជា បន្លែបៃតង ត្រី ផ្លែឈើ និងអាហារមួយចំនួនទៀតដូចជា ពោត ស្រូវសាលី ជាដើម។
៣‑អ្នកត្រូវធ្វើលំហាត់ប្រាណឱ្យបានទៀងទាត់ យ៉ាងហោចណាស់ ៣ ដងក្នុងមួយសប្តាហ៍យ៉ាងទាប ឬ ៥ដងក្នុងមួយសប្ដាហ៍យ៉ាងខ្ពស់ ដោយប្រើរយៈពេល ២០ នាទី ទន្ទឹមនឹងគ្នានេះរាល់ការហាត់ប្រាណថ្ងៃបន្ទាប់ទៀតអាចបង្កើនរយៈពេលបន្តិចម្តងៗ និងបង្កើនភាពញឹកញាប់ក្នុងការហាត់ប្រាណ។
៤‑អ្នកត្រូវជៀសវាងការជក់បារី ដោយសារតែបារីមានផ្ទុកនូវជាតិនីកូទីន និងសារធាតុផ្សេងៗទៀត ដែលធ្វើឱ្យប៉ះពាល់ដល់ស្រទាប់សរសៃឈាមរបស់អ្នក។
៥‑អ្នកត្រូវគេងឱ្យបានគ្រប់គ្រាន់ មិនត្រូវធុញថប់នឹងការងារ ត្រូវធ្វើការសមាធិ ឬស្តាប់តន្ត្រីបែបស្រទន់។
៦‑អ្នកត្រូវគ្រប់គ្រងទម្ងន់កុំឱ្យឡើង ឬធាត់ ដោយការប្រើធ្វើលំហាត់ និងទទួលទានរបបអាហារត្រឹមត្រូវ ដូចជាការមិនបរិភោគបង្អែមមានជាតិស្ករខ្ពស់។
៧‑អ្នកមានភារកិច្ចត្រូវទៅពិនិត្យសុខភាព យ៉ាងហោចណាស់ ៦ខែ ទៅ មួយឆ្នាំម្តង ប៉ុន្តែប្រសិនបើមានអាការៈឈឺចាប់ និងឈឺទ្រូងហើយក៏បាត់ទៅវិញ អ្នកគួរតែទៅពិគ្រោះជាមួយគ្រូពេទ្យជាបន្ទាន់ ដើម្បីធ្វើរោគវិនិច្ឆ័យរកមើលអាការៈទាំងនោះ។(នេះជាការលើកឡើងរបស់ BANGKOK HOSPITAL)
យ៉ាងណាមិញតាមរបាយការណ៌ថ្មីៗបានបង្ហាញថា ចំនួនអ្នកមានជំងឺខ្សោយបេះដូងនៅលើពិភពលោកមានប្រមាណ ៦២លាននាក់។ ដោយឡែក នៅមជ្ឈមណ្ឌលបេះដូងនៃមន្ទីរពេទ្យកាល់ម៉ែតបានបង្ហាញថាចំនួនអ្នកជំងឺខ្សោយបេះដូងចូលសម្រាកពេទ្យ មានប្រមាណ ២០០០នាក់ ក្នុងមួយឆ្នាំ (ប្រហែល៣០% នៃអ្នកជំងឺសម្រាកពេទ្យ) គិតជាមធ្យម ប្រហែល៥នាក់ក្នុងមួយថ្ងៃ នេះបើយោងការលើកឡើងរបស់ មន្ទីពេទ្យកាល់ម៉ែត។
ដូច្នេះសូមមេត្តាបងប្អូនបង្កើននៅការប្រុងប្រយ័ត្នឱ្យបានខ្ពស់ចំពោះបញ្ហាសុខភាព ក៏ដូចជាជំងឺខ្សោយបេះដូងនេះផងដែរ ដោយអនុវត្តន៍នៅវិធីការពារខាងលើ ដើម្បីចៀសវាសការកើតជំងឺខ្សោយបេះដូង។យ៉ាងណាមិញប្រសិនបើបងប្អូនមានអាការៈណាមួយមិនស្រួល សូមបងប្អូនទៅពិគ្រោះ និងពិនិត្យសុខភាពជាមួយនឹងវេជ្ជបណ្ឌិតឯកទេសឱ្យបានទាន់ពេលវេលា៕
អត្ថបទស្រាវជ្រាវដោយ៖ម៉ាង វិសិដ្ឋារតន៍