ក្រលៀន គឺជាសរីរាង្គសំខាន់មួយនៅក្នុងរាងកាយរបស់យើង ដោយក្រលៀនមានសមត្ថភាពជួយដល់រាងកាយជាច្រើន​ដូចជា គ្រប់គ្រងកាកសំណល់ក្នុងរាងកាយ​ គ្រប់គ្រងសម្ពាធឈាម តែប្រសិនបើក្រលៀនខូចអាចប៉ះពាល់ដល់រាងកាយដូចជាអស់កម្លាំង ហើមជើងដៃ ខ្សោយចំណង់អាហារ មានបញ្ហាក្នុងការគេង...ជាដើម។

ទន្ទឹមនឹងនេះ ក្រុមការងារចាបបៃតង សូមលើកយកប្រភេទភេសជ្ជៈទៅបំផ្លាញក្រលៀន ឬក៏តម្រងនោមបានយ៉ាងងាយ ដោយយោងតាមការចុះផ្សាយរបស់គេហទំព័រ eatthis បានណែនាំរួមមានដូចជា៖

១.ជាតិអាល់គុល៖ ការទទួលទានជាតិអាល់កុលជាប្រចាំថ្ងៃមិនត្រឹមតែខូចសុខភាពថ្លើមនោះទេ វាអាចធ្វើឱ្យរលាកថ្លើមទៅជាក្រិនថ្លើមផងដែរ។ ជាតិអាល់កុលនេះបានទៅបំផ្លាញដល់​ តម្រងនោម (ក្រលៀន) ទៀតផង នេះបើតាមការសិក្សាប្រៀបធៀបមួយបានចេញផ្សាយនៅក្នុងទស្សនាវដ្តី Nephrology Dialysis Transplantation បានរកឃើញថា ក្នុងចំណោមក្រុមមនុស្សពេញវ័យចំនួន 6259 នាក់ដែលនិយមផឹកគ្រឿងស្រវឹង ឬភេសជ្ជៈដែលមានជាតិអាល់កុល ងាយប្រឈមនឹងជំងឺតម្រងនោមជាងអ្នកធម្មតា៕

២.ទឹកផ្លែឈើកំប៉ុង៖ ទឹកផ្លែឈើកំប៉ុង ​គឺប្រមូលផ្តុំទៅដោយជាតិស្ករខ្ពស់ និងសារធាតុរក្សាទុកយូរ ដែលនេះជាដើមហេតុ ងាយឱ្យអ្នកទទួលទានកើតជំងឺតម្រងនោមណាស់។ តួយ៉ាង ក្នុងការសិក្សា Tehran Lipid និង Glucose បង្ហាញថា បុគ្គលដែលផឹកភេសជ្ជៈផ្អែម មានអត្រាខ្ពស់នៃជំងឺតម្រងនោមរុាំរ៉ៃជាងអ្នកដែលកម្រផឹកភេសជ្ជៈមានជាតិស្ករ។

៣.សូដា៖ ការផឹកជាតិសូដា​ឬ ក៏បន្ថែមជាតិនេះនៅក្នុងរបបអាហារប្រចាំថ្ងៃច្រើនលើសកំណត់ពេក គឺអាចប៉ះពាល់ដល់តម្រងនោម ឬក៏ក្រលៀនបានយ៉ាងងាយ។ ការសិក្សាឆ្នាំ ២០១៦ ដែលត្រូវបានចេញផ្សាយនៅក្នុងទស្សនាវដ្តី Nephrology បានរកឃើញថា ក្នុងចំណោមអ្នកចូលរួម ២៣៨២នាក់ដែលផឹកភេសជ្ជៈមានជាតិសូដាច្រើន ប្រឈមនឹងជំងឺតម្រងនោម ឬក្រលៀនរុំារ៉ៃ។

៤.ប្រភេទអាហារបំប៉ន៖​ យោងតាមគេហទំព័រhealthline បានឱ្យដឹងថា ជាទូទៅអាហារបំប៉នធម្មជាតិជាច្រើន ដែលគេបានអះអាងថា​ អាចប៉ះពាល់ទៅដល់មុខងាររបស់ត​​ម្រងនោម ទោះបីជាអ្នកមានសុខភាពល្អក៏ដោយ។ ការសិក្សាចាស់មួយក៏បានរកឃើញថា ផលិតផលធម្មជាតិ ត្រូវបានបំពុលដោយ Bacillus subtilis ជាបាក់តេរីដែលអាចបណ្តាលឱ្យខូចថ្លើម ឬរបួសថ្លើមផងដែរ។ ទោះជាយ៉ាងនេះក៏ដោយប្រសិនបើអ្នកចង់ទទួលទានគួរតែទៅពិភាក្សាជាមួយគ្រូពេទ្យជំនាញជាមុនសិន មុននឹងសម្រេចចិត្តញុំាអាហារបំប៉នសុខភាពណាមួយ។

ជាចុងក្រោយ សូមបងប្អូនទាំងអស់គ្នាថែរក្សាសុខភាពឱ្យបានល្អ ជាពិសេសក្រលៀន ឬក៏តម្រងនោម ព្រោះសរីរាង្គខាងក្នុងពិតជាសំខាន់ខ្លាំងណាស់ ប្រសិនបើមានបញ្ហាឬក៏កើតជំងឺគឺមិនមែនជារឿងងាយស្រួលនោះទេ។​ ដូច្នេះ អាហារណាដែលញុំាហើយប៉ះពាល់សូមកុំព្យាយាម ឬក៏កាត់បន្ថយទៅទើបល្អសម្រាប់សុខភាពទៅថ្ងៃមុខមិនងាយកើតជំងឺផ្ដេសផ្ដាសផ្សេងៗ៕

អត្ថបទដោយ៖ ប៉ែត ធីតា