ជាធម្មតានៅពេលកើតមុននៅលើស្បែកមុខមិនថានៅទីតាំង ថ្ងាស ចង្កា ច្រមុះ...នោះទេ នោះមនុស្សគ្រប់គ្នាតែងតែគិតដល់បញ្ហាបង្កថាមកពីប្រើផលិតផលខុស ការប្រែប្រួលអរម៉ូន ការសម្អាតមុខមិនបានស្អាត ទើបបណ្តាលឱ្យមុនទាំងនោះកើតឡើង។ ប៉ុន្តែបើសិក្សាឱ្យកាន់តែជ្រៅទៅ ការកើតមុននៅត្រង់ចំណុចណាមួយនៃផ្ទៃមុខ គឺជាសញ្ញាបញ្ជាក់ថាសុខភាពខាងក្នុង ជាពិសេសគ្រឿងក្នុងរបស់យើងកំពុងតែមានបញ្ហ ឬមានជំងឺហើយ។

ជាការពិតណាស់ យោងតាមការណែនាំពី វេជ្ជបណ្ឌិត អ៊ិត ម៉ូលីកា ស្ថាបនិកគ្លីនិក K Dermaបានបញ្ជាក់យ៉ាងច្បាស់ៗថា វាអាចជារឿងថ្មីមួយ ពីព្រោះកន្លងមកមនុស្សភាគច្រើនមិនបានចាប់អារម្មណ៍ថា មុនជាសញ្ញាបញ្ជាក់ពីសុខភាពខាងក្នុងនោះទេ។ មនុស្សគ្រប់គ្នាតែងគិតថាការកើតមុនគឺបណ្តាលមកពី ការថែទាំស្បែកមុខមិនបានល្អ ឬប្រើផលិតផលខុសជាដើម។ ប៉ុន្តែតាមពិតទៅ មុនជាសញ្ញាបញ្ជាក់ពីសុខភាពខាងក្នុង ប្រសិនបើមនុស្សម្នាក់មានសុខភាពខាងក្នុងល្អរឹងមាំ សុខភាពស្បែកល្អ នោះមុនក៏មិនកើតដែរ ប៉ុន្តែបើមនុស្សម្នាក់មានសុខភាពចុះខ្សោយ នោះវាមិនត្រឹមតែធ្វើឱ្យកើតមុននោះទេ ថែមទាំងប្តូរពណ៌ស្បែកថែមទៀតផង។

ដូច្នេះជាជម្រើសដ៏ល្អក្នុងការចំណាំ អ្នកដែលតែងតែកើតមុននៅលើស្បែកមុខជាប្រចាំ កើតមិនបាត់ ជាពិសេសកើតញឹកញាប់នៅត្រង់ចំណុចទាំង ៧ខាងក្រោម ជាសញ្ញាបញ្ជាក់ថា អ្នកមានសុខភាពចុះខ្សោយ ក្រពះ ពោះវៀន ក្រលៀនរបស់អ្នកកំពុងតែមានបញ្ហាហើយ៖

១. កើតមុនត្រង់ថ្ងាសនិងច្រមុះញឹកញាប់៖ ប្រសិនបើអ្នកជាមនុស្សម្នាក់ដែលតែងតែកើតមុននៅត្រង់ថ្ងាស និងច្រមុះញឹកញាប់ មិនថាមុននោះជាមុនកប់ មុនសាច់​ ឬមុនខ្ទុះនោះទេ គឺសបញ្ជាក់ឱ្យឃើញថា អ្នកកំពុងតែមានបញ្ហាស្រ្តេសច្រើន គេងមិនគ្រប់គ្រាន់ រាងកាយខ្វះសារធាតុចិញ្ចឹម មួយវិញទៀត ការកើតមុននៅត្រង់ថ្ងាស និងច្រមុះនេះក៏ជាសញ្ញាបញ្ជាក់ថា ក្រពះ និងពោះវៀនរបស់អ្នកកំពុងមានបញ្ហា គួរប្រញាប់ទៅពិនិត្យឱ្យឆាប់បំផុត។

២. កើតមុននៅបរិវេណចិញ្ចើម៖ វាអាចបណ្តាលមកពីអ្នកប្រតិកម្មជាមួយសាប៊ូកក់សក់ ក្រែមបន្ទន់សក់ ឬបណ្តាលមកពីការប្រតិកម្មពីផលិតផលគូរចិញ្ចើមជាដើម ដែលបណ្តាលឱ្យអ្នកកើតមុននៅត្រង់ចិញ្ចើមញឹកញាប់។ ជាជ្រើសល្អ អ្នកគួរតែសង្កេតទៅលើផលិតផលទាំងនោះ បើអាចគួរផ្លាស់ប្តូរការប្រើប្រាស់។

៣. កើតមុនត្រង់បរិវេណថ្ពាល់៖ អ្នកដែលតែងតែកើតមុននៅលើថ្ពាល់ជាប្រចាំអត់បាត់ គឺបណ្តាលមកពីការថែរក្សាស្បែកមិនបានល្អ សម្អាតមិនស្អាត ចូលចិត្តនិយាយទូរស័ព្ទយូរៗ ឆ្លងមេរោគពីទូរស័ព្ទ កន្លែងគេងគ្មានអនាម័យ អ្នកមានបញ្ហាមាត់ធ្មេញក៏បណ្តាលឱ្យកើតមុននៅត្រង់ថ្ពាល់អត់បាត់ផងដែរ។

៤. កើតមុននៅបរិវេណគុំត្រចៀក៖ អ្នកដែលកើតមុននៅត្រង់គុំត្រចៀកញឹកញាប់គឺបណ្តាលមកពីផ្លូវចិត្តទន់ខ្សោយ ស្ត្រេសច្រើន អរម៉ូនប្រែប្រួលខ្លាំង ហើយការកើតមុននៅត្រង់ចំណុចនេះក៏ជាសញ្ញាបញ្ជាក់ថា ក្រលៀនកំពុងមានបញ្ហា ឆាប់ពិនិត្យ។

៥. កើតមុននៅបរិវេនជើងសក់៖ មុនត្រង់ចំណុចនេះគឺជាសញ្ញាបញ្ជាក់ប្រាប់ថា អ្នកកំពុងប្រតិកម្មជាមួយផលិតផលសាប៊ូកក់សក់ ក្រែមបន្ទប់សក់ ឬគ្រឿង Skin care ដែលប្រើប្រាស់ប្រចាំថ្ងៃ ដូច្នេះគួរយកចិត្តទុកដាក់ក្នុងការសង្កេត បើនៅតែកើតមុនអត់បាត់ គួរផ្លាស់ប្តូរផលិតផលដែលពាក់ព័ន្ធដូចដែលបានរៀបរាប់ខាងលើចេញ។

៦. កើតមុននៅបរិវេណថ្គាម និងចង្កា៖ អ្នកដែលតែងតែកើតមុននៅបរិវេណនេះញឹកញាប់ គឺជាសញ្ញាបញ្ជាក់ថា អរម៉ូនក្នុងរាងកាយដំណើរការមិនប្រក្រតី ប្រព័ន្ធរំលាយអាហារធ្វើការអត់បានល្អ បរិភោគអាហារអត់ទៀងទាត់ ហើយអ្នកដែលចូលចិត្តញ៉ាំសាច់ច្រើន មិនញ៉ាំបន្លែផ្លែឈើ ក៏ជាហេតុបណ្តាលឱ្យកើតមុននៅបរិវេណថ្គាមនិងចង្កាដែរ។

៧. កើតមុននៅបរិវេណក៖ ជាសញ្ញាបញ្ជាក់ថា អ្នកខ្វះជាតិទឹកក្នុងរាងកាយ គេងមិនគ្រប់ ញ៉ាំមិនគ្រាន់ ស្រ្តេស គិតច្រើន ហើយក៏ជាសញ្ញាបញ្ជាក់ថា អ្នកកំពុងខ្សោយតម្រងនោមផងដែរ។

សរុបមកវិញ ទីតាំងនៃការកើតមុននៅលើបរិវេណមុខទាំង៧ទីតាំង គឺបង្កមកពីមូលហេតុផ្សេងៗគ្នា ហើយក៏ជាសញ្ញាបញ្ជាក់ពីសុខភាពខាងក្នុងខុសៗគ្នាផងដែរ។ ដូច្នេះ អ្នកគួរតែកត់ចំណាំទុក ប្រសិនជាអ្នកជាមនុស្សម្នាក់ដែលតែងតែកើតមុននៅត្រង់បរិវេណណាមួយខាងលើ អ្នកគួររកដំណោះស្រាយឱ្យបានឆាប់ ពុំនោះទេមុននឹងគ្មានថ្ងៃបាត់ ហើយសុខភាពខាងក្នុងក៏មិនជាសះស្បើយដែរ៕

អត្ថបទដោយ៖ មឿន គន្ធា