ប្រុងប្រយ័ត្ន! ឈឺធ្មេញចេញអាការនេះប្រញាប់ ទៅពេទ្យព្រោះអាចគ្រោះថ្នាក់ដល់ជីវិត
ធ្មេញគឺជាសរីរាង្គមួយដែលមានអត្ថប្រយោជន៍ច្រើន ក៏ប៉ុន្ដែមនុស្សជាច្រើន ដូចជាមិនសូវអើពើជាមមួយជំងឺធ្មេញប៉ុន្មាននោះទេ ជាក់ស្ដែងការបង្ករោគពីធ្មេញអាចមានគ្រោះថ្នាក់ដល់ជីវិត បើព្យាបាលមិនបានទាន់ពេល ដូច្នេះហើយប្អូនត្រូវប្រយ័ត្នឱ្យមែនទែន។
ជាក់ស្ដែងដូចការចែករំលែករបស់ខាងមន្ទីរពេទ្យកាល់ម៉ែត បានណែនាំថា បើសិនជាបងប្អូនមានបញ្ហាឈឺធ្មេញបង្ករោគ ហើយមានសភាពដូចជា ហើមមុខ លឹបភ្នែក ឬហើមតំបន់ក្រោមឆ្អឹងថ្គាម ឬចង្កា ដែលប៉ះពាល់និងពិបាកដល់ការលេបចំណីអាហារ ឬទឹកមាត់ (មានន័យថាប៉ះពាល់ដល់ផ្លូវដកដង្ហើម) គួរតែប្រញាប់មកជួបពេទ្យដើម្បីពិគ្រោះឱ្យបានលឿន ព្រោះអ្នកជំងឺអាចស្លាប់បាន ប្រសិនបើមិនទទួលការការព្យាបាលបានត្រឹមត្រូវ។
មូលហេតុដែលអាចគ្រោះថ្នាក់ដល់អាយុជីវិត ប្រសិនបើមិនព្យាបាលឲ្យទាន់ពេលវេលាទេនោះមេរោគ (Bacteria) ដែលបង្កឲ្យមានការករខ្ទុះអាចរីករាលដាលពីតំបន់ធ្មេញ ទៅកាន់តំបន់ផ្សេងៗទៀតដូចជា --ផ្នែកធ្មេញខាងលើ៖ នាំឲ្យហើមមុខជុំវិញភ្នែក រួចឆ្លងចូលទៅតំបន់ Cavernous Sinus និងអាចឆ្លងចូលទៅកាន់ខួរក្បាល។
-ផ្នែកធ្មេញខាងក្រោម៖ នាំឲ្យហើមតំបន់ក្រោមចង្កា និង តំបន់ឆ្អឹងថ្គាមក្រោម (ធ្វើឲ្យពិបាកលេខទឹកមាត់ និងស្ទះផ្លូវដង្ហើម) ហើយអាចរីករាលដាលដល់តំបន់ទ្រូង (Mediastinum) និង Infective Endocarditis។ មួយវិញទៀតមេរោគអាចចូលទៅក្នុងឈាមដោយផ្ទាល់ (Septicemia)។
ចំពោះការការព្យាបាលអាចធ្វើទៅតាមដំណាក់កាលដូចខាងក្រោម៖
- ធ្វើការចោះបង្ហូរខ្ទុះរួចលាងសំអាតឲ្យត្រឹមត្រូវ
- ការយកខ្ទុះទៅវិភាគរកមេរោគ និងការប្រើប្រាស់ថ្នាំផ្សះត្រឹមត្រូវ
- យកមូលហេតុដែលបង្ករោគចេញៈ ដោយការព្យាបាលធ្មេញ ឬដកធ្មេញនោះចេញតែម្តង
- ការប្រើប្រាស់ថ្នាំ
- សំរាប់អ្នកជំងឺដែលមានជំងឺ ដូចជា ជំងឺលើសឈាម ជំងឺទឹកនោមផ្អែម និង ជំងឺគួបផ្សំផ្សេងៗ ដែលមានមកជាមួយអ្នកជំងឺស្រាប់ត្រូវការ ការព្រឹក្សាបន្ថែមជាមួយ វេជ្ជបណ្ឌិតឯកទេស បន្ថែមលើការព្យាបាល និងក្នុងករណីធ្ងន់ធ្ងរត្រូវសម្រាកព្យាបាលនៅមន្ទីរពេទ្យ ។
វិធីការពារចៀសវាងបង្កគ្រោះថ្នាក់ខ្លាំង
- សូមជួបជាមួយទន្តបណ្ឌិត ឬគ្រូពេទ្យជំនាញពេលលោកអ្នកមានបញ្ហាធ្មេញ ឬហើមមុខមាត់ ជៀសវាងការប្រើប្រាស់ថ្នាំដោយខ្លួនឯង។
- បញ្ហាមាត់ធ្មេញអាចបង្កគ្រោះថ្នាក់ដល់អាយុជីវិតសូមមកជួបជាមួយទន្តបណ្ឌិត ជារៀងរាល់ ៦ខែម្តង ដើម្បីពិនិត្យសុខភាពមាត់ធ្មេញលោកអ្នក។
អាស្រ័យហេតុនេះបើសិនបងប្អូនមានបញ្ហាដូចបានរៀបរាប់ខាងលើសូមកុំទុកយូរអាចអញ្ជើញពិនិត្យនិងពិគ្រោះនៅមន្ទីរពេទ្យកាល់ម៉ែត ព្រោះអាចគ្រោះថ្នាក់ដល់អាយុជីវិតបានប្រសិនព្យាបាលមិនទាន់ពេល ៕