មានមនុស្សមិនតិចនាក់ទេ ដែលកំពុងតែជ្រួញចិញ្ចើមគិត ថាតើគួរតែជ្រើស រើស Sunscreen បែបណា ទើបត្រូវនឹងប្រភេទស្បែកមុខរបស់ខ្លួន? អ្នកខ្លះ ទិញ Sunscreenក្នុងតម្លៃថ្លៃៗ ក៏ប៉ុន្តែបែរជាប្រើគ្មានបានលទ្ធផលអ្វីសោះ ហើយអ្នកខ្លះទៀត យកមកប្រើបែរជាជួបបញ្ហាលើសដើមទៅវិញ។ ដោយសង្កេតឃើញពីបញ្ហាទាំងនេះ ចាបបៃតងកម្ពុជា បានធ្វើការស្រាវជ្រាវពីក្បួនជ្រើសSunscreenឱ្យត្រូវនឹងស្បែក ហើយក្នុងនោះ គឺគេបានបែងចែកយ៉ាងច្បាស់ ដូច្នេះលែងព្រួយបារម្ភរឿងជ្រើសSunscreenខុសទៀតហើយ៖

១.រើសSunscreenសម្រាប់ស្បែកដែលឆាប់ប្រតិកម្ម

សម្រាប់ស្បែកដែលងាយប្រតិកម្ម ត្រូវបានណែនាំឱ្យជ្រើសឡេការពារកម្ដៅថ្ងៃដែលគ្មានក្លិន គ្មានជាតិម្សៅរដេញរដុបសៗស្អិតៗ ពេលលាបលើស្បែក។ បន្ថែមពីនេះ លោកអ្នកត្រូវពិនិត្យមើលលើសារធាតុផ្សំរបស់ឡេការពារកម្ដៅថ្ងៃ ដែលមានផ្ទុកសារធាតុPhysical Sunscreen ,Mineral ព្រោះវាមានសារធាតុស័ង្កសីអុកស៊ីតកម្ម និងទីតាញ៉ូមឌីអ៊ុកស៊ីត ដែលការពារស្បែក។ ចំពោះសារធាតុទាំង២នេះ គឺវាមិនធ្វើឱ្យស្បែករលាក ឬក្រហាយឡើយ ជាពិសេសវាបានដើរតួនាទីយ៉ាងសំខាន់ក្នុងការការពារស្បែកអ្នកពីពន្លឺព្រះអាទិត្យបានយ៉ាងល្អ។

២.ជ្រើសSunscreenសម្រាប់ស្បែកមានមុន

សម្រាប់ស្បែកមុខដែលមានមុន គឺពិតជាត្រូវការការប្រុងប្រយ័ត្នខ្ពស់ ពីព្រោះវាងាយនឹងរងផលប៉ះពាល់ ប្រសិបើជ្រើសខុស។ មុខដែលកើតមុន គឺភាគច្រើនមានជាតិខ្លាញ់ និងកកស្ទះរន្ធញើស ដែលធ្វើឱ្យឆាប់ក្រហម រោល​និងមានមុនខ្ទុះមានកប់សាច់ជាដើម។ ដូច្នេះសម្រាប់សារធាតុដែលគួរតែជ្រើស គឺSunscreenដែលមានសាច់ស្ដើង គ្មានជាតិកាត់ និងជាពពួកSunscreenដែលមានជាតិទឹកផ្ដល់សំណើមដល់ស្បែក​។

៣.ជ្រើសរើសSunscreen សម្រាប់ស្បែកស្ងួត

សម្រាប់ស្បែកដែលស្ងួត គឺពិតត្រូវការជាតិទឹកចាំបាច់បំផុត ដូច្នេះចំពោះការលាបSunscreen ក៏ជាប្រភេទSunscreenដែលមានជាតិសំណើមខ្ពស់ដែលអាចជួយបំពេញជាតិទឹក ផ្ដល់សំណើមឱ្យស្បែក។

តើយើងគួរជ្រើសរើសឡេការពារពន្លឺថ្ងៃប្រភេទណាយកមកប្រើប្រាស់?

-ត្រូវមើលស្លាកសញ្ញាមាន SPF (Sun Protection Factor) 30 ដល់ 50+ និង PA++++ (Protection Grade of UVA rays) ឬ Broad Spectrum ដែលអាចការពារបានទាំង UVA និង UVB។ ពីព្រោះ UVA rays ធ្វើឲ្យស្បែកឆាប់ចាស់។ រីឯ UVB rays អាចធ្វើឲ្យងាយរលាកស្បែក។ ទាំង UVA និង UVB អាចធ្វើឲ្យប្រឈមនឹងការកើតមហារីកស្បែកបាន។

-សារធាតុផ្សំ៖

-Physical Sunscreen មានដូចជា៖ Zinc Oxide ឬ Titanium Dioxide

-Chemical Sunscreen មានដូចជា៖ Oxybenzone Avobenzone                                                        

ប្រសិនបើស្បែកមុខលោកអ្នកមានលក្ខណៈងាយរងប្រតិកម្ម ឬ ស្បែកមុខងាយមានមុន គួរជ្រើសរើសប្រភេទ Physical Sunscreen។ ប្រសិនបើស្បែកមុខលោកអ្នកជាប្រភេទស្បែកមុខប្រេង គួរប្រើ Sunscreen with Oil Free។

-ងាយស្រួលលាប និងចូលស្បែកបានល្អ។ ឩទាហរណ៍ប្រភេទ Lotion ឬ Gel។                 

-ភាពធន់នឹងទឹក៖ ទោះបីហែលទឹក ឬបែកញើសច្រើនក៏ដោយនៅតែមាន Sunscreen ជួយការពារ។ ជាពិសេសប្រសិនធ្វើការក្រោមកំដៅថ្ងៃច្រើន គួរប្រើ SPF 50+ ឬច្រើនជាងនេះ។  

អត្ថបទដោយ៖ កញ្ញា តឹក ស៊ីថា