មួយរយៈក្រោយមកនេះ បងប្អូនប្រាកដជាបានស្គាល់ និងល្បីនូវមុខម្ហូបមួយមុខនៅលើបណ្ដាញសង្គមអ៊ីនធឺណិតដែលមានឈ្មោះថា ចាណាង ដោយមុខម្ហូប១នេះ ជាម្ហូបរបស់ជនជនជាតិដើមភាគឦសាន។

ផ្អែកទៅតាមការលើកឡើងរបស់អ្នកស្រី ឡាត់ សុខឯម ម្ចាស់អាជីវកម្មចាណាងជនជាតិដើមអនឡាញ និងជាជនជាតិភាគតិចគ្រឹងមកពីខេត្តរតនគិរី បានលើកឡើងឱ្យដឹងថា មូលហេតុដំបូងដែលអ្នកស្រី សម្រេចចិត្ត ចាប់ផ្តើមនូវអាជីវកម្ម ចាណាងអនឡាញ នេះឡើង គឺកើតចេញពីអ្នកស្រីផ្ទាល់ដែលជាជនជាតិដើមភាគតិច និងចង់បង្ហាញនូវមុខម្ហូបប្រចាំតំបន់ខ្លួនទៅកាន់ទីផ្សារក្នុងប្រទេស។

វត្តមានចាណាងជនជាតិដើម ចាប់ផ្តើមទទួលបានការគាំទ្រកើនឡើងពីសំណាក់បងប្អូននៅក្នុងប្រទេសកម្ពុជា ក្រោយពីបានមុខម្ហូប១នេះ ទទួលបានជ័យលាភីជាប់លេខ២ប្រកួតនៅឆ្នាំ២០១៩ ក្នុងវិញ្ញាម្ហូបពិសេសប្រចាំតំបន់ ដែលបានរៀបចំឡើងដោយក្រសួងវប្បធម៌នៅវត្តភ្នំ។

បន្ទាប់ពីទទួលបានការគាំទ្រជាច្រើន រួមជាមួយនឹងកម្លាំងពីបងប្អូនថែមទៀតនោះ អ្នកស្រី សុខឯម ក៏បានចាប់យកអាជីវកម្ម១នេះឱ្យលេចចេញជារូបរាងឡើងទាំងនៅក្នុងសម័យកូវីដ១៩តែម្តង ប៉ុន្តែសន្ទុះនៃការគាំទ្រនៅតែកើនមានជាបន្តបន្ទាប់រហូតមកទល់នាពេលបច្ចុប្បន្ន។

អ្នកស្រី សុខឯមបានបន្តទៀតថា គោលបំណងធំរបស់អ្នកស្រី គឺចង់ធ្វើការលើកកម្ពស់ម្ហូបប្រពៃណីប្រចាំតំបន់របស់ជនជាតិដើមភាគតិចតែម្តង ស្របពេលដែលសព្វថ្ងៃនេះ អ្នកស្រីក៏មើលឃើញថា មិនទាន់មានយុវជនជ្រើសមុខម្ហូបតំបន់របស់ខ្លួនមកធ្វើជាអាជីវកម្មលើទីផ្សារនៅឡើយ។​ ដូច្នេះហើយ អាជីវកម្មមួយនេះ នឹងជាស្នាដៃពិសេសមួយជួយលើកស្ទួយអាហារតំបន់របស់ជនជាតិភាគតិចភាគឦសាន។

គូសបញ្ជាក់បន្ថែមផងដែរថា អាជីវកម្មចាណាងជនជាតិដើម អនឡាញ ក៏មានជាប្រភេទមុខម្ហូបផ្សេងៗទៀតផងដែររួមមាន៖ សម្លព្រូង បាយតំណើបខ្មៅសាច់ក្រកជ្រូក ងៀតគោ ងៀតក្របី បុកម្ទេស...ផងដែរ។ ប្រសិនបងប្អូនមានចំណាប់អារម្មណ៍ចង់ស្គាល់ ចង់ភ្លក់នូវមុខម្ហូបរបស់ជនជាតិភាគតិចភាគឦសានអាចកម្មង់បានតាមរយៈផេក ចាណាងជនជាតិដើម អនឡាញ Chanang Indigenous Online៕

អត្ថបទដោយ៖ ប៉ាវ ភក្តី