ក្រុមហ៊ុនយក្សធំជាងគេរបស់អាមេរិកដែលផលិតនិងលក់យន្តហោះនិងយន្តចំបាំងទូទាំងពិភពលោក គឺ Boeing បានបញ្ឈប់បុគ្គលិកចំនួន ៦.៧៧០ នាក់ កាលពីថ្ងៃពុធ ដែលជាផ្នែកមួយនៃផែនការកាត់បន្ថយ

ការងារសរុបចំនួន ១៦,០០០ ដោយសារតែការធ្លាក់ចុះយ៉ាងគំហុគនៃការធ្វើដំណើរតាមផ្លូវអាកាសក្នុងកំឡុង

ពេលរាតត្បាត Covid-19 នេះបើតាមសេចក្តីរាយការណ៍ពី CNN Business នៅព្រឹកថ្ងៃព្រហស្បតិ៍នេះ។ 

នាយកប្រតិបត្តិលោក Dave Calhoun បាននិយាយនៅក្នុងសារមួយទៅកាន់និយោជិកកាលពីថ្ងៃពុធថា

“យើងបានឈានដល់ពេលអកុសលនៃការចាប់ផ្តើមបញ្ឈប់ការងារដោយអចេតនា”។ ខណៈដែលក្រុមហ៊ុន Boeing កាលពីថ្ងៃពុធ បានជូនដំណឹងដល់បុគ្គលិកដែលត្រូវបានបញ្ឈប់ពីការងារនៅចុងខែកក្កដា។ អ្នកនាំពាក្យក្រុមហ៊ុន Boeing នៅថ្ងៃដដែលបានប្រាប់ CNN  ថាមុនពេលបញ្ឈប់ការងារ បុគ្គលិកក្រុមហ៊ុន Boeing ចំនួន ៥.៥២០ នាក់បានទទួលយក  buyout package ដោយស្ម័គ្រចិត្ត។ 

សូមជម្រាបថា ក្រុមហ៊ុន Boeing បានបង្ហើបពីការកាត់បន្ថយការកាត់បន្ថយការងារចំនួន ១៦,០០០ ដែលស្មើនឹងប្រហែល ១០ ភាគរយនៃបុគ្គលិក ហើយស្ទើរតែទាំងអស់ធ្វើការនៅសហរដ្ឋអាមេរិក។ អ្នកនាំពាក្យរូបនេះបានបន្តថានឹងមានការបញ្ឈប់ការងារជាច្រើនទៀតនៅប៉ុន្មានខែខាងមុខ។ 

គួរបញ្ជាក់ថា Boeing និង គូរប្រជែងធំ Rival Airbus  បានជួបប្រទះការពន្យារពេលនិងការលុបចោលការបញ្ជាទិញ

យន្ដហោះរបស់ខ្លួន ដោយសារការធ្លាក់ចុះនៃការធ្វើដំណើរតាមផ្លូវអាកាសនៅជុំវិញពិភពលោក ដែលនេះធ្វើ

អោយក្រុមហ៊ុនទាំងពីរបង្ខំចិត្តកាត់បន្ថយផលិតកម្មយ៉ាងហោចណាស់ពីរបីឆ្នាំខាងមុខ។ 

ជាមួយគ្នានេះដែរ ភាគហ៊ុនរបស់ក្រុមហ៊ុន Boeing ដែលបានដាំក្បាលចុះកាលពីប៉ុន្មានខែមុន ក្នុងថ្ងៃនេះបាន

កើនឡើង ១ ភាគរយភ្លាមៗបន្ទាប់ពីចេញផ្សាយសេចក្តីប្រកាសនេះ។ លោក Calhoun បាននិយាយកាល

ពីថ្ងៃពុធថា “ក្រុមហ៊ុននឹងធ្វើការកែតម្រូវផែនការអាជីវកម្មរបស់យើងឱ្យបានជាប់លាប់រហូតដល់ការរីករាល

ដាលនៃជំងឺរាតត្បាតសកលបញ្ឈប់ការវាយលុកទីផ្សារ" ។ ទោះយ៉ាងណា លោកបានហៅការងើបឡើងវិញ

នោះថា “ពន្លកបៃតង” ដែលឧស្សាហកម្មរបស់ក្រុមហ៊ុននឹងត្រលប់មកវិញ ប៉ុន្តែវាត្រូវការពេលច្រើនឆ្នាំដើម្បី

ត្រលប់ទៅរកអ្វីដែលទើបតែមានកាលពី ២ ខែមុន” ។ 

ក្នុងកាលៈទេសៈដូចគ្នានេះដែរ Airbus ក៏បានព្រាងទុកបុគ្គលិកចំនួន ៦០០០ នាក់នៅអឺរ៉ុបកាលពីខែមេសា ប៉ុន្តែគេនៅមិនទាន់ប្រកាសអំពីការកាត់បន្ថយការងារជាអចិន្ត្រៃយ៍នៅឡើយទេ។ នាយកប្រតិបត្តិជាច្រើននៅ

ទូទាំងឧស្សាហកម្មនេះបានព្រមាននិយោជិកពីផែនការកាត់បន្ថយប្រតិបត្តិការនាពេលអនាគត។ 

មិនខុសពី Boeing ទេ ក្រុមហ៊ុនអាកាសចរណ៍ផ្សេងទៀតនៅជុំវិញពិភពលោកក៏កំពុងកាត់បន្ថយការងារ

ឬធ្វើផែនការដូចគ្នានេះដែរ។ យ៉ាងណាមិញ ក្រុមហ៊ុនអាកាសចរណ៍អាមេរិកត្រូវបានហាមឃាត់មិនឱ្យធ្វើ

ការបញ្ឈប់ការងារបុក្គលិកដោយមិនស្ម័គ្រចិត្តទេ រហូតដល់ខែតុលា ក្រោមលក្ខខណ្ឌថវិកាសង្គ្រោះរបស់

រដ្ឋាភិបាលសហរដ្ឋអាមេរិកសម្រាប់ឧស្សាហកម្មនេះ៕

ប្រភព CNN Business

ប្រែសម្រួលដោយ ហៃ សុចិន្តា