គ្នាយើងភាគច្រើន ជួបបញ្ហាស្ត្រេស ខួរក្បាលស្មុគស្មាញសឹងរាល់ថ្ងៃ ដោយសារការងារ របររកស៊ី គ្រួសារ លុយ និងបណ្ដាញទំនាក់ទំនងសង្គម។បើបញ្ហាស្ត្រេស កើតមានរយៈពេលយូរ វាអាចប៉ះពាល់ដល់សុខភាពផ្លូវកាយទៀតផង ដូចជា គេងមិនលក់ កើតជំងឺលើសឈាម ទឹកនោមផ្អែម និងបេះដូង។
ទោះយ៉ាងណា បញ្ហាទាំងនេះ អាចដោះស្រាយបាន តាមរយៈមធ្យោបាយ ៧ យ៉ាង ដែលយើងគ្រប់គ្នាអាចធ្វើបាន ដើម្បីសម្រាកខួរក្បាល និងគ្រប់គ្រងបញ្ហាស្ត្រេស។
១. រកមូលហេតុនៃបញ្ហាស្រ្តេស៖ យើងមិនអាចសម្រាក់ខួរក្បាលបានទេ បើយើងមិនដោះស្រាយបញ្ហាដែលបង្កឲ្យយើងស្រ្តេស។
២. ដកដង្ហើមវែង៖ វាជាចំណុចពីសេសមួយដែលជួយឲ្យខួរក្បាលកុំឲ្យគិតច្រើន និងស្មុគស្មាញខ្លាំង។
៣. ម៉ាស្សា៖ ដើម្បីសម្រាកខួរក្បាល យើងត្រូវសម្រាករាងកាយជាមុនសិន ហើយការម៉ាស្សាគឺជាវិធីល្អមួយ។ ការម៉ាស្សាមិនត្រឹមតែជួយសម្រួលសាច់ដុំបន្ថយការចុក និងឈឺចាប់ផ្សេងៗ ប៉ុន្តែវាក៏អាចជួយដល់បញ្ហាស្រ្តេស និងជួយឲ្យស្រួលខ្លួនរយៈពេលយូរក្រោយម៉ាស្សា។
៤. ការមុចទឹកក្តៅអុនៗ៖ វាជួយសម្រួលការឈឺចាប់សាច់ដុំ សម្រួលអារម្មណ៍ និងបញ្ហាស្រ្តេសក៏ដូចជាសុខភាពទូរទៅ និងស្បែកផងដែរ។
៥. គេងពី ២០នាទីទៅ ៣០នាទី៖ គ្នាយើងខ្លះគេងមិនបានគ្រប់គ្រាន់នៅពេលយប់ ដូច្នេះការគេងគេងពី ២០នាទីទៅ ៣០នាទី អាចជួយឲ្យអារម្មណ៍ស្រស់ស្រាយ ហើយក៏ជាវិធីសម្រាកមួយដែលប្រើនៅទូរទាំងពិភពលោក។
៦. ហាត់ប្រាណ៖ យើងមានបញ្ហាជាច្រើននៅក្នុងខួរក្បាល ដូច្នេះការហាត់ប្រាណបានបញ្ចេញសកម្មភាពតែផ្តោតអារម្មណ៍ អាចជួយឲ្យយើងមិនឲ្យគិតពីបញ្ហានានាដែលនាំឲ្យយើងស្រ្តេស។
៧. មើលភាពយន្ត៖ ពេលខ្លះគ្មានអីជាងស្លុងអារម្មណ៍ជាមួយសាច់រឿង នៅក្នុងរោងភាពយន្តងងឹតនោះទេ ដែលជួយឲ្យយើងគិតពីបញ្ហាស្រ្តេសនានា ការមើលភាពយន្តតាមទូរស័ព្ទក៏អាចឲ្យយើងសម្រាកខួរក្បាលផងដែរ៕
អត្ថបទដោយ៖មាស វាសនា