សព្វថ្ងៃនេះ មនុស្សភាគច្រើនស្រ្តេស ចាប់ផ្តើមហូបអាហារកំដរអារម្មណ៍ និងមានថាមពលឡើងវិញ។ អ្នកធាត់ប្រឈមនឹងជំងឺលើសឈាម និងគាំងបេះដូងលឿនផងដែរ។ ទម្លាប់ទាំង ៤ខាងក្រោមនេះ មានប្រសិទ្ធភាពជួយការពារអ្នកកុំឱ្យធាត់ ឬលើសគីឡូ។ ទម្លាប់នីមួយៗ គ្រាន់តែចំណាយពេលព្រឹកបន្តិច ជួយទាំងរាងកាយ និងអារម្មណ៍រីករាយដែរ។
១.ពិសារទឹកឱ្យបានច្រើន៖ មានប្រជាជនខ្មែរយើងមួយចំនួន ពួកគាត់មិនសូវពិសារទឹកឱ្យបានគ្រប់គ្រាន់នោះទេ។ ការចាប់ផ្ដើមពេលព្រឹកជាមួយទឹកមួយកែវ ឬពីរកែវ ជាវិធីងាយស្រួលក្នុងការលើកកម្ពស់សុខភាព និងការសម្រកទម្ងន់ ។ ជាតិទឹកនេះ ក៏ជួយដុតបំផ្លាញកាឡូរីពីរាងកាយរបស់អ្នកដែរ។
២.ហាត់ប្រាណ៖ លោក Matthew Kelly បាននិយាយថា “អានដើម្បីចិញ្ចឹមខួរក្បាល និងហាត់ប្រាណ ដើម្បីការពាររាងកាយឱ្យរឹងមាំ។” ការធ្វើលំហាត់ប្រាណនេះ មិនត្រឹមតែជួយរាងកាយរបស់អ្នកទេ ជួយដល់ចិត្តគំនិតបានល្អ និងរាងកាយអ្នកក៏ស្រកជាតិខ្លាញ់ផងដែរ។ បើសុខភាពរាងកាយអ្នកមានបញ្ហា ចិត្តគំនិតក៏ពិបាកធ្វើការដែរ។
៣. គ្រាប់ជី៖ តាមលោក Deepti Lokesappa ជាអ្នកស្រាវជ្រាវចំណីអាហារនិងអាហារូបត្ថម្ភ និងជាទីប្រឹក្សាជាន់ខ្ពស់ឯកទេសអាហាររូបត្ថម្ភនៅមន្ទីរពេទ្យMotherhood បានប្រាប់ថា គ្រាប់ជីអាចជួយឱ្យស្រកគីឡូ ពីព្រោះនៅក្នុងគ្រាប់ជីវាសម្បូរទៅដោយ កាបូនអ៊ីដ្រាត ជាតិសរសៃខ្ពស់ ទប់ស្កាត់ចំណង់អាហារ ធ្វើឱ្យអ្នកដែលផឹកមានអារម្មណ៍ថាឆ្អែតបានយូរ និងមិនងាយឃ្លានអាហារផ្តេសផ្តាស។ គួរទទួលទានជាមួយទឹកដោះគោស្រស់ ឬក្រឡុកលាយជាមួយផ្លែឈើដើម្បីបង្កើនរសជាតិ ក្នុង១ថ្ងៃអ្នកគួរទទួលទានគ្រាប់ជីត្រឹមបរិមាណ២ស្លាបព្រាតូចល្មមបានហើយ(គិតពីចំនួនគ្រាប់ជីដែលមិនទាន់បានត្រាំទឹក)។
៤.ផ្លែប័រ( Avocado)៖ លោក Jaramillo អ្នកជំនាញផ្នែកចំណីអាហារបាននិយាយថា ការញ៉ាំផ្លែប័រ ពេលព្រឹកគឺល្អខ្លាំងណាស់។ ផ្លែប័រមានផ្ទុកដោយសារធាតុខ្លាញ់ អូមេហ្កា៣ ដែលជួយផ្ដល់សំណើមដល់ស្បែក ជួយឱ្យកោសិកាស្បែកលូតលាស់បានល្អ។ ពិសេសជាងនេះ ផ្លែឈើមួយប្រភេទនេះ គឺជួយឱ្យអ្នកឆាប់ឆ្អែត ដូចនេះវាក៏អាចជួយទប់ស្កាត់ការឡើងគីឡូរបស់អ្នកផងដែរ៕
អត្ថបទដោយ៖ ទ្រ សុភាព