គុយជា គឺជារុក្ខជាតិវល្លិព្រៃមួយប្រភេទ ដែលមានរសជាតិជូរអែមឆ្ងាញ់ ផ្លែគុយ ជាផលផ្លែមានសាច់ជោ និងគ្រាប់ ផ្លែមានរាងមូល ឬ រាង ពងក្រពើ សំបក សាច់ផ្លែមានជាតិទឹកច្រើន សំបកមានជ័រស្អិត មានគ្រាប់វែង។ គុយគឺជារុក្ខជាតិដែលដុះដោយឯកឯង រុក្ខជាតិនេះ ក៏មានប្រយោជន៍ជួយដល់សេដ្ឋកិច្ចរបស់ប្រជាជនដែលនៅតំបន់ផងដែរ ឱ្យតែដល់ខែប្រមូលផលម្ដងៗ ព្រោះផ្លែគុយ ជាផ្លែមានទីផ្សារ គេចូលចិត្តញុំាច្រើន និងកម្រមាន។
ជាការពិតណាស់ យោងតាមរយៈក្រសួងបរិស្ថាន នាពេលកន្លងទៅនេះ មានរៀបរាប់ ចែករំលែកទាក់ទងនិងអត្ថប្រយោជន៍ច្រើនមហាសាលជួយសុខភពរបស់ផ្លែគុយ ដែលបងប្អូនខ្លះក៏បានដឹង ខ្លះទៀតក៏មិនទាន់បានដឹង។
ខាងក្រោមនេះគឺជាអត្ថប្រយោជន៍របស់ផ្លែគុយ
-សំបកគុយមានរសជាតិមិនល្វីង(យកសំបក) ទៅស្ងោរដាំទឹកផឹក ជួយព្យាបាល អាការឈឺក្បាល
-នៅប្រទេសម៉ាឡេស៊ី ឫសត្រូវបានគេយកទៅស្ងោរផឹក ជាឱសថព្យាបាលជំងឺខាន់លឿងដែលបណ្ដាលមកពីជំងឺគ្រុនចាញ់ (ឫស)
-ឫសមានរសជាតិហិល បើយកមកស្ងោរផឹកជាថ្នាំព្យាបាលឈឺបំពង់ក និងឈឺទ្រូង
-វល្លិ ដើម ឬឫស ស្ងោរផឹកជាថ្នាំព្យាបាលរោគរាគ
-ផ្លែគុយទុំយកមកបរិភោគ ជួយរំអិលពោះវៀន ធ្វើឱ្យងាយស្រួលក្នុងការបញ្ចេញចោល
-ដើមស្ងោរនឹងទឹកផឹកជាឱសថព្យាបាលការក្រិនថ្លើម
-តាមក្បួនឱសថបុរាណភាគខាងត្បូងនៃប្រទេសថៃ គេយកដើមមកស្ងោរជាមួយទឹកផឹកជាថ្នាំព្យាបាលការហូរទឹករងៃ
-ផ្លែខ្ចីមានរសជាតិជូរ គេប្រើផ្លែខ្ចី ហាលស្ងួត យកទៅដុតបន្ទាប់មកលាយជាមួយទឹក ប្រើជាថ្នាំព្យាបាលរបួស
-ជ័រយកលាបលើមុខរបួស ជួយផ្សះរបួសអោយឆាប់ជា
-ឫសត្រូវហាន់ល្អិតៗ ហើយប្រើជាឱសថព្យាបាលជំងឺខាន់លឿងចំពោះទារក
-មានលក្ខណៈសម្បត្តិជាថ្នាំប៉ូវកំលាំងផងដែរ
-វល្លិត្រូវបានគេប្រើជំនួសខ្សែរសម្រាប់ចងរបស់របរ
-ឫសគេអាចយកមកផលិតជាថ្នាំពណ៌ ដោយវាផ្តល់ពណ៌ក្រហម។
ក្រោយពីអានអត្ថប្រយោជន៍របស់ផ្លែគុយលើរួចមក បងប្អូនយល់យ៉ាងណាពីអត្ថប្រយោជន៍ច្រើនមហាសសាល ដែលអាចយក ឬ យកសំបក យកផ្លែរបស់រុក្ខជាតិនេះមក ធ្វើជាឱសថកែរោគបានយ៉ាងច្រើន មិននឹកស្នានដល់ ជាពិសេសអ្វីដែលមិនអាចបំភ្លេចបាននោះគឺ រសជាតិជូរអែមឆ្ងាញ់ជាប់មាត់របស់ផ្លែគុយ៕
អត្ថបទដោយ៖ ប៉ែត ធីតា
