ជំងឺក្រួសតម្រងនោមគឺជា ជំងឺមួយដែលអាចបង្កជាផលប៉ះពាល់ដល់ក្រលៀនខ្លាំងណាស់ ប្រសិនណាមិនបានទទួលការព្យាបាល ទាន់ពេលកំណត់។ ដោយយោងតាមរយៈការចែករំលែករបស់វេជ្ជបណ្ឌិតអុឹង ម៉េងលាង ឯកទេស វះកាត់ជំងឺក្រួសតម្រងនោម នៅមន្ទីរពេទ្យព្រះអង្គឌួង បានប្រាប់ក្រុមការងារចាបបៃតង ថាការព្យាបាលជំងឺក្រួសតម្រងនោម នៅមន្ទីរពេទ្យព្រះអង្គឌួង នាពេលបច្ចុប្បន្ននេះគឺ មានការរីកចម្រើនខ្លាំង ដោយសារប៉ុន្មានឆ្នាំនេះ មន្ទីរពេទ្យព្រះអង្គឌួងបាននាំចូលឧបករណ៍ព្យាបាល ទំនើបៗមកច្រើន មានរហូតដល់៤ឧបករណ៍សំខាន់ៗ។
តួយ៉ាង ឧបករណ៍ទំនើបៗទាំងនេះ បានជួយឱ្យការព្យាបាលជំងឺក្រួសតម្រងនោម របស់គ្រូពេទ្យកាន់តែមានប្រសិទ្ធភាពជាងមុនៗឆ្ងាយខ្លាំង ព្យាបាលរយៈពេលខ្លី គ្មានការឈឺចាប់ខ្លាំង ហូរឈាមខ្លាំង មានសុវត្តិភាពជាងសម័យមុនៗឆ្ងាយ។
លោកវេជ្ជបណ្ឌិតបានរៀបរាប់ទៀតថា សម្រាប់ការព្យាបាលក្រួសនៅក្នុងតម្រងនោម សម័យមុនគ្រូពេទ្យវះកាត់តាមវិធីទាំងនេះ៖
-ការព្យាបាលជំងឺក្រួសនៅក្នុងតម្រងនោមពីសម័យមុនវិញគឺ គ្រោះថ្នាក់ខ្លាំងណាស់ឈានដល់បាត់បង់ជីវិតច្រើន ដោយអ្នកជំងឺនីមួយៗមុននឺងវះកាត់បានព្រមព្រៀងជាមួយគ្រូពេទ្យរួចហើយថា ត្រូវស្លាប់ក៏រស់នៅបន្ដ ប្រសិនបើវះកាត់បរាជ័យគឺក៏បានជោគជ័យ។ពីព្រោះថា ការព្យាបាលក្រួសនៅក្នុងតម្រងនោមសម័យមុន តម្រូវឱ្យគ្រូពេទ្យប្រើបច្ចេកទេសវះកាត់ រកតំបន់ក្រលៀនឬត្រម្រងនោមជាមុនសិន អាចវះត្រង់ពោះ ក្បែរចង្កេះឬក៏វះខាងក្រោយ។
បន្ទាប់ពីវះរកទីតាំងរបស់ក្រលៀនឬតម្រងនោមឃើញហើយ គ្រូពេទ្យចាប់ផ្ដើមពុះក្រលៀនជាពីរចំណែកដើម្បីចាប់យកក្រួសដែលមានក្នុងតម្រងនោមចេញ បន្ទាប់ពីយកចេញហើយ គ្រូពេទ្យក៏ចាប់ផ្ដើមដេរភ្ជាប់តម្រងនោមឬក្រលៀន។ លោកគ្រូពេទ្យបានបន្តទៀតថាការដេរភ្ជាក់ក្រលៀនឬតម្រងនោមនេះ មិនមែនជារឿងងាយស្រួលឡើយ ទាល់តែគ្រូពេទ្យមានជំនាញ ទឹកដៃបុិនប្រសប់ផងដែរ ទើបអាចដេរបាន ព្រោះសាច់របស់ក្រលៀនពិបាកនៅក្នុងការដេរខ្លាំងណាស់ បើខុសអាចមានឈាមហូរខ្លាំង ប្រឈមនឹង កាត់ក្រលៀនឬតម្រងនោមម្ខាងដែលវះកាត់ចោលភ្លាម ដើម្បីជួយសង្គ្រោះជីវិតអ្នកជំងឺ។
ចូលមកការព្យាបាលជំងឺក្រួសនៅក្នុងតម្រងនោមសម័យបច្ចុប្បន្ននេះវិញ
-លោកគ្រូពេទ្យបានបង្ហើបថាលែងប្រើវិធីវះកាត់ដូចសម័យមុនៗទៀតឡើងគឺមានបច្ចេកទេសព្យាបាលជំងឺ ក្រួសតម្រងនោម ដោយប្រើប្រាស់ឧបករណ៍ទំនើបៗ
វិធីព្យាបាលជំងឺក្រួសតម្រងនោមសម័យថ្មីមានម៉ាស៊ីនដូចជា៖
១.ប្រភេទម៉ាស៊ីនC-Arm៖ តួនាទីម៉ាស៊ីននេះជាម៉ាស៊ីនមួយសម្រាប់បញ្ជារពេលដែលលោកគ្រូពេទ្យធ្វើការវះកាត់ បាញ់បំបែកក្រួសតម្រងនោមកំណត់ថាការបាញ់បំបែកក្រួសតម្រងនោកបានប៉ុន្មានភាគរយហើយ ក៏មើលលើឧបករណ៍ដែលគ្រូពេទ្យដាក់ចូលទៅក្នុងបំពង់បង្ហូរនោម បានត្រឹមត្រូវដែរឬទេចៀសវាងដាក់ទៅមានបញ្ហាដូចជាអាចប៉ះធ្លុះជាដើម។
២.ម៉ាស៊ីនឡាស៊ែ៖ ម៉ាស៊ីននេះជាប្រភេទម៉ាស៊ីនដែល ទំនើបជាងគេនៅប្រទេសកម្ពុជា ដោយសារម៉ាស៊ីននេះមានតែ៤ប៉ុណ្ណោះ តួនាទីរបស់ម៉ាស៊ីនឡានេះមានកម្លាំង៦០w ជាឧបករណ៍មួយបាញ់បំបែកក្រួសដែលមានក្នុងតម្រងនោម។
៣.Nephroscope៖ ឧបករណ៍នេះប្រើសម្រាប់ចោះតម្រងនោមឬក្រលៀន ដើម្បីបាញ់បំបែកក្រួសនៅក្នុងតម្រងនោម។
៤.Uretero-renoscope flexible៖ ម៉ាស៊ីននេះគឺមានតួនាទីសម្រាប់មើលផ្លូវបង្ហូរនោម ម៉ាស៊ីននេះផ្ទាល់វាអាចបត់បែនបាន មានភាពងាយស្រួលនៅក្នុងការរកមើលក្រួសនិងបាញ់បំបែកក្រួសបានស្រួល។ម៉ាស៊ីននេះផ្ទាល់ជួយឱ្យការព្យាបាលរបស់អ្នកជំងឺដោយគ្មានការហូរឈាម និងការឈឺចាប់ខ្លាំង ដែលព្យាបាលសម្រាកនៅមន្ទីរពេទ្យរយៈពេលខ្លីអាច ទៅសម្រាកនៅផ្ទះបានធម្មតា។
ជាចុងក្រោយ ប្រសិនណាអ្នកមានបញ្ហាជំងឺក្រួសតម្រងនោមកុំទុករហូតធ្ងន់ធ្ងរ ប្រញាប់មកទទួលការព្យាបាលឱ្យទាន់ពេលវេលា ព្រោះសម័យឥឡូវការព្យាបាល ជំងឹក្រួសតម្រងនោមមានបច្ចេសទេស ទំនើបមានប្រសិទ្ធភាពចំណាយពេលខ្លី ព្យាបាលគ្មានការឈឺចាប់យូរ ហូរឈាមខ្លាំងប្រឈមនឹងការបាត់បង់ជីវិតដូចសម័យមុនឡើយ៕
អត្ថបទដោយ៖ប៉ែត ធីតា
