អ្នកស្រាវជ្រាវសាកលវិទ្យាល័យMaryland School of Medicine (UMSOM) បានឱ្យដឹងថា ប្រភេទឈាមរបស់មនុស្សម្នាក់អាចត្រូវបានផ្សារភ្ជាប់ទៅនឹងហានិភ័យនៃការកើតជំងឺដាច់សរសៃឈាមខួរក្បាល តាមការឱ្យដឹងពីប្រភព medschool.umaryland.edu។ អ្នកជំនាញបានធ្វើការវិភាគមេតារួមបញ្ចូលទិន្នន័យដែលមានទាំងអស់ពីការសិក្សាពីហ្សែនដែលផ្តោតលើជំងឺដាច់សរសៃឈាមខួរក្បាលischemic បណ្តាលមកពីការស្ទះនៃលំហូរឈាមទៅកាន់ខួរក្បាលដែលកើតឡើងចំពោះមនុស្សវ័យក្មេងដែលមានអាយុក្រោម៦០ឆ្នាំ។

គេបានធ្វើការសិក្សាលើហ្សែនចំនួន48 ប្រភេទ និងអ្នកជំងឺដាច់សរសៃឈាមខួរក្បាល១៧០០នាក់ និងអ្នកដែលស្ថិតក្រោមការថែទាំងសុខភាពគ្មានជំងឺចំនួន៦០០,០០០នាក់។ ក្រុមឈាមសំខាន់ៗដែលគេលើកយកមកសិក្សា មានប្រភេទ A AB BនិងO។ ជាលទ្ធផលគេរកឃើញថា ក្រុមមនុស្សមានឈាមប្រភេទA មានហានិភ័យនៃជំងឺដាច់សរសៃឈាមខួរក្បាលដំណាក់កាលដំបូង មុនអាយុ៦០ឆ្នាំ ច្រើនជាងក្រុមឈាមផ្សេងទៀត១៦%។ រីឯមនុស្សមានក្រុមឈាមប្រភេទO មានហានិភ័យទាបជាងឈាមផ្សេងៗទៀតរហូតដល់១២%។

លោកវេជ្ជបណ្ឌិត Kittner បានលើកឡើងថា "យើងនៅតែមិនដឹងថាហេតុអ្វីបានជាឈាមប្រភេទA ផ្តល់ហានិភ័យខ្ពស់ ប៉ុន្តែវាទំនងជាមានអ្វីដែលត្រូវធ្វើជាមួយកត្តាកំណកឈាមដូចជាប្លាកែត និងកោសិកាដែលតម្រង់ជួរសរសៃឈាម ក៏ដូចជាប្រូតេអ៊ីនដែលចរាចរផ្សេងទៀត ដែលទាំងអស់នេះដើរតួរយ៉ាងសំខាន់។” យ៉ាងណាមិញ ក្រុមអ្នកស្រាវជ្រាវ បានសង្កត់ធ្ងន់ថាត្បិតក្រុមឈាមប្រភេទA មានហានិភ័យជាងឈាមផ្សេងទៀត ប៉ុន្តែមិនមែនមានន័យថា សុទ្ធតែកើតគ្រប់គ្នានោះទេ។ សូមកុំមានក្រុមឈាមប្រភេទA កុំមានការព្រួយបារម្ភខ្លាំងពេក ហានិភ័យកើតឡើងក្នុងចំនួនតិចប៉ុណ្ណោះ។

យ៉ាងណាមិញ មិនថាអ្នកមានក្រុមឈាមប្រភេទណា អាយុប៉ុន្មាន បើអ្នកមិនចង់មានជំងឺធ្ងន់ធ្ងរ ប៉ះពាល់ដល់អាយុជីវិត អ្នកគួរយកចិត្តទុកដាក់លើរបៀបក្នុងការរស់នៅ របបអាហារប្រចាំថ្ងៃ ការធ្វើសកម្មភាពរាងកាយ និងការពិនិត្យសុខភាពឱ្យបានទៀងទាត់ផងដែរ៕

អត្ថបទដោយ៖ Senghong