អ្នកខ្លះគិតថា នៅវ័យក្មេងមានអាយុ ២០ឆ្នាំជាងគ្មានបញ្ហាដាច់សរសៃឈាម និងគាំងបេះដូងនោះទេ។ តាមគេហទំព័រ Vejthani បានចុះផ្សាយថា មានបន្ទុកការងារច្រើនពេក និងធ្វើការយូរនាំឱ្យស្រ្តេសពេក ជាពិសេសសម្រាប់មនុស្សវ័យក្មេងអាចបង្កើនហានិភ័យជំងឺដាច់សរសៃឈាមខួរក្បាលផងដែរ។ ប៉ុន្តែបញ្ហានេះបើអ្នកទុកយូរនាំផលប៉ះពាល់ផ្លូវចិត្តខ្លាំង ព្រោះវាបញ្ចេញអរម៉ូនដូចជា cortisol និង adrenaline បង្កើនអត្រាបេះដូង សម្ពាធឈាម បណ្តាលឱ្យកាត់បន្ថយលំហូរឈាមទៅកាន់សរីរាង្គសំខាន់ៗ រួមទាំងខួរក្បាលផងដែរ។ សម្ពាធឈាមច្រើនពេកអាចដាច់សរសៃឈាមខួរក្បាលបានយ៉ាងងាយ។ សូមអ្នកមានការប្រុងប្រយ័ត្នហើយកុំមើលងាយបញ្ហាស្រ្តេសនេះឱ្យសោះ។
ភាពតានតឹងផ្លូវចិត្តរ៉ាំរ៉ៃនាំមានផលប៉ះពាល់ដល់ទម្លាប់ក្នុងការរស់នៅ និងកត្តាហានិភ័យផ្សេងៗទៀតផងដែរ។ មនុស្សស្ត្រេសយូរមានទំនោរទទួលទានអាហារមិនទៀងទាត់ ហាត់ប្រាណតិច ឬបំពានសារធាតុរំញោចដូចជាគ្រឿងស្រវឹង និងថ្នាំជក់ច្រើន។ ទម្លាប់ទាំងនេះបង្កើនហានិភ័យនៃជំងឺធាត់ ជំងឺបេះដូង សម្ពាធឈាមខ្ពស់ និងជំងឺទឹកនោមផ្អែម លក្ខខណ្ឌបញ្ហាទាំងនេះមានការទាក់ទងនឹងជំងឺដាច់សរសៃឈាមខួរក្បាល។
និយាយទៅ! អ្នកគួរបង្ការជំងឺដាច់សរសៃឈាមខួរក្បាលទាំងវ័យក្មេងទើបចាស់ឡើងខួរក្បាលរបស់អ្នកនៅគិតបានល្អ។ អ្នកគួរតែគ្រប់គ្រងភាពតានតឹងដោយការធ្វើហាត់ប្រាណជាប្រចាំដើម្បីកាត់បន្ថយអរម៉ូន cortisol បន្ថយសម្ពាធឈាម បង្កើនចរន្តឈាមទៅខួរក្បាលឱ្យប្រសើរឡើង។ ការគេងឱ្យបានគ្រប់គ្រាន់ក៏ជួយស្តារមុខងារប្រព័ន្ធប្រសាទខួរក្បាល និងតុល្យភាពអ័រម៉ូនក្នុងរាងកាយបានល្អ។ ការអនុវត្តបច្ចេកទេសដកដង្ហើមជ្រៅៗ ធ្វើសមាធិ ឬហាត់យូហ្គាដើម្បីសម្រាកទាំងផ្លូវកាយនិងផ្លូវចិត្តចេញពីស្រ្តេសផងដែរ។
អ្នកគួរចៀសវាងប្រភេទអាហារមានជាតិប្រៃ ខ្លាញ់ និងជាតិស្ករខ្ពស់ វាមិនល្អដល់ខួរក្បាលទេ។ ការទទួលទានបន្លែបៃតង ផ្លែឈើស្រស់ៗ គ្រាប់ធញ្ញជាតិ និងអាហារសម្បូរទៅដោយអូមេហ្គា-៣ និងផឹកទឹកឱ្យបានគ្រប់គ្រាន់ជួយឱ្យសុខភាពបេះដូងប្រសើរឡើងនិងកាត់បន្ថយហានិភ័យនៃជំងឺដាច់សរសៃឈាមខួរក្បាលផងដែរ៕ អត្ថបទដោយ៖ ទ្រ សុភាព