ជាតិអាស៊ីតនៅក្នុងក្រពះអាចមានការកើនឡើងឬច្រាលឡើង បណ្ដាលមកពីកត្តាផ្សេងៗដូចជាការញ៉ាំអាហារច្រើនពេកមិនអាចរំលាយអាហារបានល្អ ការមានបាក់តេរីរំខានក្នុងក្រពះ ការទទួលទានជាអាល់កុល ការជក់បារី ការទទួលទានអាហារមានជាតិកាហ្វេអ៊ីនច្រើន អាហារសម្បូរជាតិខ្លាញ់ ការគេងមិនត្រូវទម្រង់ក្បាលរាបស្មើរទាបខ្លាំងពេក ឬគេងផ្អៀងមកផ្អែកខាងស្ដាំយូរពេក និងការប្រើប្រាស់ថ្នាំមួយចំនួនក៏អាចបង្កើតជាតិអាស៊ីតឱ្យច្រាលឡើងលើផងដែរ។

ជាមួយគ្នានេះ កត្តារួមផ្សំខាងលើនេះក៏អាចរួមចំណែកធ្វើឱ្យមានការកើនឡើងឧស្ម័នក្នុងពោះវៀនបានផងដែរ។ ឧស្ម័នពោះវៀនមានខ្យល់ដែលជាប់នៅក្នុងបំពង់រំលាយអាហារ វា​ត្រូវ​បាន​បង្កើត​ឡើង​នៅ​ពេល​អាហារ​ដែល​មិន​រំលាយ​បាន​ផ្លាស់ទី​តាម​ពោះវៀន​និង​ត្រូវ​បាន​បំបែក​ចុះ​។ ឧស្ម័នក៏អាចកើតមានផងដែរ ប្រសិនបើអ្នកលេបខ្យល់លើស នេះបើផ្អែកតាមប្រភពBuzzrx។

ផ្អែកតាមការឱ្យដឹងពីប្រភព clevelandclinic បានឱ្យដឹងថា​ជំងឺច្រាលជាតិអាស៊ីតអាចស្តែងចេញជារោគសញ្ញារំខានដូចជាការឈឺទ្រូងឬក្រហាយទ្រូង មានអាហារថាអាហារច្រាលមកបំពង់រំលាយអាហារមកលើវិញ មានអារម្មណ៍ថាដូចមានអាហារជាប់នៅបំពងក ពិបាកក្នុងការលេបអាហារ ក្អក ក្អួត មានការឈឺបំពង់ក និងស្អកជាដើម។ ក្នុងករណីធ្ងន់ធ្ងរ មិនបានទទួលការព្យាបាលបានត្រឹមត្រូវ ជំងឺច្រាលជាតិអាស៊ីតក្នុងក្រពះអាចវិវត្តទៅជាជំងឺរលាកបំពង់អាហាររ៉ាំរ៉ៃ និងដុំមហារីកបំពង់អាហារប្រសិនបើអ្នកជំងឺមិនបានទទួលការព្យាបាលទាន់ពេលវេលា។

ផ្សារភ្ជាប់ជាមួយគ្នានេះ វេជ្ជបណ្ឌិត Pratik Tibdewal ឯកទេសក្រពះពោះវៀន មន្ទីរពេទ្យ Wockhardt, Mira Road នៅប្រទេសឥណ្ឌា បានចែករំលែកពីវិធីខ្លះៗដើម្បីអាចជួយកាត់បន្ថយនិងការពារការច្រាលជាតិអាស៊ីត និងបង្ការកុំឱ្យឧស្ម័នក្នុងពោះវៀនកើនឡើង អាចអនុវត្តក្នុងការរស់នៅប្រចាំថ្ងៃបានដូចខាងក្រោម៖

១ មានទម្លាប់ផឹកតែក្ដៅៗ៖ ភេសជ្ជៈមិនមានជាតិកាបូន ដូចជាពពួកតែខ្ញី តែផ្កាឆាម៉ូមែល អាចជួយបន្ថយជាតិអាស៊ីតក្នុងក្រពះបាន។

២ ញ៉ាំអាហារស្រាល៖ អាហារស្រាលឬអាចនិយាយថាអាហារដែលងាយរំលាយឱ្យបានច្រើន ដើម្បីជួយសម្រួលដល់ការរំលាយអាហារបាន ដូចជាពពួកអាហារសម្បូរបន្លែ ផ្លែឈើ ពពួកសណ្ដែក គ្រប់ធញ្ញជាតិ មានជាតិកាកសរសៃ។ សម្រាប់របៀបញ៉ាំអាហារវេជ្ជបណ្ឌិត ណែនាំឱ្យព្យាយាមទំពារអាហារឱ្យបានម៉ត់ល្អ ជាផ្នែកមួយជួយសម្រាលដល់ប្រព័ន្ធរំលាយអាហារផងដែរ។

៣ ដកដង្ហើមឱ្យបានត្រឹមត្រូវ៖ ការដកដង្ហើមបានត្រឹមត្រូវ ពិសេសមុនញ៉ាំនិងក្រោយញ៉ាំអាហារ អាចជួយកាត់បន្ថយឧស្ម័នក្នុងពោះវៀនបាន។ វេជ្ជបណ្ឌិតណែនាំឱ្យដកដង្ហើមចូលទៅជ្រៅដើម្បីបំពេញឱ្យសួតបានគ្រប់គ្រាន់ ហើយចាំដកចេញមកវិញដោយប្រាដកថាមិនបានបន្ថែមឧស្ម័ននៅសល់ក្នុងខ្លួនរបស់អ្នកឡើយ។

៤​ រក្សាជាតិទឹកក្នុងខ្លួន៖ ការខ្វះជាតិទឹកធ្វើឱ្យប៉ះពាល់ដល់ប្រព័ន្ធរំលាយអាហារ និងកើនឧស្ម័នបានផងដែរ។ ហេតុនេះគួរមានទម្លាប់ទទួលទានទឹកឱ្យបានគ្រប់គ្រាន់ និងអាចបន្ថែមភេសជ្ជៈធម្មជាតិជំនួយជាតិទឹក ដូចជាទឹកក្រូចឆ្មារ ទឹកដូងបានផងដែរ។

៥ ព្យាយាមផ្លាស់ទីរាងកាយ៖ ការអង្គុយស្ងៀមយូរនៅមួយកន្លែង នឹងធ្វើឱ្យកើនឡើងនៃឧស្ម័ន ហេតុនេះអ្នកគួរតែធ្វើចលនាឱ្យបានច្រើន ជាងការអង្គុយស្ងៀម និងអាចធ្វើលំហាត់ប្រាណបន្ថែមដូចជាការដើរ រត់ យោគៈ និងលំហាត់ប្រាណផ្សេងៗទៀត ដើម្បីជម្រុញប្រព័ន្ធរំលាយអាហារឱ្យដំណើរការបានល្អ៕

អត្ថបទដោយ៖ Senghong