អាហារដែលអ្នកហូបជាប្រចាំថ្ងៃក៏មានបញ្ហាដែរ។ បើអ្នកផឹកកាហ្វេពេលល្ងាច យប់ឡើងអ្នកពិបាកគេងមិនខានឡើយ។ បើអ្នកផឹកស្រាដើម្បីសម្រាកខួរក្បាលក៏ដោយ ការពិតជាតិស្រាហ្នឹងបែបជាទៅបំផ្លាញកោសិការខួរក្បាលរបស់អ្នកទៅវិញទេ។ បើអ្នកចង់គេងលក់ស្រួលនោះ អ្នកគួរតែផឹកភេសជ្ជៈ ៣នេះ៖
១. ទឹកដោះគោក្តៅឧណ្ហៗ៖ សូម្បីតាមការចែករំលែកពីអ្នកឧកញ៉ាវេជ្ជបណ្ឌិត គួច ម៉េងលី ក៏បានណែនាំពីភេសជ្ជៈជំនួយការគេងមួយដោយយកទឹកដោះគេទៅកម្ដៅ។ បើអ្នកជាមនុស្សម្នាក់ដែលពិបាកក្នុងការគេង គេងមិនងាយលក់ មុនពេលចូលគេងអាចយកទឹកដោះគោឆៅ ឬទឹកដោះគោស្រស់មួយកែវ ទៅកម្តៅឱ្យក្តៅឧណ្ហៗល្មម ហើយផឹកជារៀងរាល់ថ្ងៃ នាពេលល្ងាច ឬមុនចូលគេង។ ការផឹកទឹកគោក្តៅឧណ្ហៗមួយកែវមុនចូលគេង ជួយបង្កើនឱ្យឆាប់ងងុយ ឆាប់គេងលក់ ចន្លោះពី១០ទៅ១៥នាទី បន្ទាប់ពីផឹកអ្នកនឹងទន់ត្របកភ្នែក គេងស្ងប់ទល់ភ្លើង។
២. ទឹកឃ្មុំទឹកក្ដៅឧណ្ហៗ៖ ការផឹកទឹកឃ្មុំវានឹងជួយផ្តល់ថាមពលដល់រាងកាយច្រើនជាងទឹកដោះគោជិត៥ដង។ ហើយវាស័ក្តិសមសម្រាប់ផឹកនៅពេលព្រឹកដើម្បីជួយបង្កើនថាមពលសម្រាប់សរីរាង្គក្នុងការដំណើរការ។ ក្រៅពីនេះ ទឹកឃ្មុំក៏ជួយដល់រាងកាយក្នុងការកម្ចាត់ចោលនូវកាកសំណល់ច្រើនឱ្យអារម្មណ៍ស្រួល។ ដូចនេះហើយទឹកឃ្មុំជាមួយទឹកក្តៅឧណ្ហៗ វាជួយសម្អាតក្រពះ និងកម្ចាត់កាកសំណល់ ខណៈពេលដែលជួយឱ្យរាងកាយបង្កើតកោសិកាឈាមថ្មី ស្តារ ប្រឆាំងបាក់តេរី និងជម្រុញការបង្កើតឡើងវិញនូវកូឡាជែនពេលអ្នកគេងបានលក់ស្រួល។
៣. តែខ្ញី៖ សម្រាប់តែខ្ញីជួយការពារជំងឺផ្តាសាយ ហៀរសំបោរ និងឲ្យអ្នកឆាប់គេងលក់ស្រួល ហើយវាជួយសម្រកគីឡូផងដែរ ព្រោះវាអាចបន្ស៊ីទៅកម្ចាត់ជាតិខ្លាញ់លើសចេញពីរាងកាយបានយ៉ាងល្អ។ តាមគេហទំព័រ theteamakers បានបញ្ជាក់ថា តែខ្ញីនេះពិតជាភេសជ្ជៈដែលមានឥទ្ធិពលលើផ្លូវចិត្តឱ្យមានភាពស្ងប់ស្ងាត់គួរឱ្យកត់សម្គាល់ ហើយវាក្លាយជាភេសជ្ជៈសម្រាប់ពេលចូលគេងដ៏ល្អឥតខ្ចោះផងដែរ។ ព្រោះតែវាមានសារធាតុគីមីដែលបញ្ជូនសញ្ញាទៅកាន់ខួរក្បាលធ្វើឱ្យយើងមានអារម្មណ៍ឆាប់ងងុយគេងបានលឿន ហើយគេងស្ងប់៕ អត្ថបទដោយ៖ ទ្រ សុភាព