មនុស្សគ្រប់គ្នាប្រហែលនិយមខ្ពុរមាត់ជាប្រចាំជាមួយអំបិល ឬទឹកអំបិល នៅពេលយប់មុនចូលគេង។ តើការខ្ពុរមាត់ជាប្រចាំជាមួយអំបិលអាចមានគ្រោះថ្នាក់ទេ?

បើយោងតាមប្រភព Practo បានបញ្ជាក់ច្បាស់ៗថា ការសម្អាតមាត់របស់អ្នកជាមួយនឹងទឹកអំបិលក្ដៅឧណ្ហៗមានអត្ថប្រយោជន៍ជាច្រើនក្នុងការព្យាបាល ពីព្រោះថាទឹកអំបិលក្ដៅឧណ្ហៗមានផ្ទុកអំបិល និងសារធាតុរ៉ែ ដែលល្អសម្រាប់រាងកាយមនុស្ស។ នៅក្នុងនោះដែរ លោកទន្តជ្ជបណ្ឌិត N Srinivas ជនជាតិឥណ្ឌាបាននិយាយថា ទឹកអំបិលក្ដៅឧណ្ហៗមិនធ្វើឱ្យរលាងភ្នាសរំអិលនៃប្រហោងធ្មេញ។

នៅក្នុងនោះដែរ ទន្តបណ្ឌិតជាច្រើន បានណែនាំថា ការប្រើប្រាស់ទឹកអំបិលខ្ពុរមាត់ជួយជម្រះមេរោគ បន្ធូរអារម្មណ៍ ពីព្រោះអំបិលជួយព្យាបាល។ រឹតតែពិសេសនោះ ការខ្ពុរមាត់ដោយទឹកអំបិល គឺជួយកាត់បន្ថយការរលាកដោយការសម្លាប់មេរោគ បាក់តេរី និងបញ្ជូនកោសិកាឈាមសទៅកម្ចាត់មេរោគផងដែរ។

ពិតមែនហើយ វាជាជម្រើសដ៏ល្អសម្រាប់អ្នកដែលមានមេរោគតាមប្រហោងធ្មេញ មាត់មានដំបៅ ឈឺបំពង់ក ឬផ្តាសាយ។ ជនជាតិអេហ្ស៊ីប ក្រិក និងចិនបានប្រើប្រាស់ទឹកប្រៃ ដើម្បីព្យាបាលជំងឺអញ្ចាញធ្មេញតាំងពីយូរយារណាស់មកហើយ។

ចំពោះការរៀបចំទឹកអំបិលក្ដៅឧណ្ហៗ គឺមានលក្ខណៈសាមញ្ញាណាស់ ដោយគ្រាន់តែដាក់អំបិលកន្លះស្លាបព្រាកាហ្វេក្នុងទឹកក្ដៅឧណ្ហៗ ហើយមួយវិញទៀតអ្នកក៏អាចបន្ថែមអំបិលមួយស្លាបព្រាកាហ្វេទៀត នៅពេលដែលអ្នកសុំាជាមួយទឹកអំបិល។ បន្ទាប់មកអ្នកត្រូវដាក់ទឹកអំបិលក្នុងមាត់ រួចធ្វើការខ្ពុរដោយបឺតទឹកទៅវិញទៅមកតាមជើងធ្មេញយឺតៗក្នុងរយៈពេល ៣០វិនាទី រួចខ្ជាក់ទឹកអំបិលចេញ បន្ទាប់មកខ្ពុរជាមួយទឹកអំបិលក្ដៅឧណ្ហៗនោះចំនួន០២ទៅ០៣ដងទៀតជាការស្រេច។

ជាចុងក្រោយលោកវេជ្ជបណ្ឌិត បានបន្ថែមថា អត្ថប្រយោជន៍នៃការប្រើប្រាស់ទឹកអំបិលជួយសន្សំសំចៃលុយ ងាយស្រួលធ្វើនៅផ្ទះ និងងាយស្រួលប្រើប្រាស់។​ ទោះបីជាមានអត្ថប្រយោជន៍ដ៏អស្ចារ្យនៃការលាងមាត់ដោយទឹកប្រៃក៏ដោយ វាមិនអាចត្រូវបានប្រើជាជម្រើសសម្រាប់ការថែទាំមាត់កុមារនោះទេ៕