តើអ្នកផឹកស្រាបៀរជាប្រចាំទេ? ឬផឹកយូរៗម្តង? បើគិតថាមធ្យម មួយខែអ្នកផឹកស្រាបៀរអស់ប៉ុន្មានកំប៉ុងដែរ? ការផឹកស្រាបៀរ ឬគ្រឿងស្រវឹងផ្សេងៗបានក្លាយជាចំណុចកណ្តាលនៃការជួបជុំមិនថាក្នុងការជួបជុំសប្បាយ ឬជួបជុំកើតទុក្ខនោះទេ រហូតដល់មានពាក្យនិយាយបន្តៗគ្នាថា “សប្បាយក៏ផឹក កើតទុក្ខក៏ផឹក”។ ប៉ុន្តែតើការផឹកជាញឹកញាប់ ក្នុងបរិមាណច្រើនៗបែបនេះ អាចប្រឈមនឹងជំងឺ ឬគ្រោះថ្នាក់ដល់ជីវិតឬទេ? ចម្លើយប្រាកដជាប៉ះពាល់ខ្លាំងណាស់, ការសិក្សាស្រាវជ្រាវជាច្រើនបានរកឃើញពីផលប៉ះពាល់ដល់សុខភាព ជីវិត និងសេដ្ឋកិច្ចរបស់អ្នកនិយមផឹកគ្រឿងស្រវឹងច្រើន ប៉ុន្តែសាមីខ្លួនផ្ទាល់ហាក់បីដូចជាមើលរំលង។

កាលពីពេលថ្មីៗនេះ ការសិក្សាបានរកឃើញថា អ្នកផឹកគ្រឿងស្រវឹង មានហានិភ័យដល់ទៅ៥៧%ក្នុងការកើតមានជំងឺស្ទះឬដាច់សរសៃឈាមខួរក្បាល ដែលគំរាមគំហែងយ៉ាងខ្លាំងដល់អាយុជីវិត។

នៅក្នុងការសិក្សា១របស់ INTERSTROKE ដែលត្រូវបានសហការដឹកនាំដោយសាកលវិទ្យាល័យ Galway និងត្រូវបានបោះពុម្ពផ្សាយនៅក្នុង Neurology ដោយមានអ្នកចូលរួមចំនួន២៥,៨៤៨នាក់មកពី ២៧ប្រទេសផ្សេងៗគ្នា។ នៅក្នុងនោះ ២៥%នៃអ្នកចូលរួមជាអ្នកកំពុងផឹកស្រា ១៦,៧%ជាអតីតអ្នកផឹក និង ៥៨,៣%មិនធ្លាប់ផឹកទាល់តែសោះ។

ជាលទ្ធផលពីអ្នកចូលរួម អ្នកដែលផឹកស្រាក្នុងបរិមាណខ្ពស់១៤ កែវ/កំប៉ុងក្នុងមួយសប្តាហ៍សម្រាប់ស្ត្រី និងច្រើនជាង ២១កែវ/កំប៉ុងសម្រាប់បុរស អាចបង្កើនហានិភ័យនៃជំងឺដាច់សរសៃឈាមខួរក្បាលដល់ទៅ៥៧% ។ ក្នុងពេលជាមួយគ្នានេះ ការផឹកស្រាច្រើនត្រូវបានផ្សារភ្ជាប់ជាមួយនឹងហានិភ័យខ្ពស់នៃជំងឺស្ទះសរសៃឈាមខួរក្បាល (ischaemic stroke) ចំនួន ២៩% ហានិភ័យខ្ពស់នៃជំងឺដាច់សរសៃឈាមខួរក្បាលគ្រប់ប្រភេទចំនួន៣៩% និងហានិភ័យខ្ពស់នៃការហូរឈាមក្នុងខួរក្បាលដល់ទៅ៧៦% ។

ជាមួយគ្នានេះ អ្នកជំនាញផ្នែកអាហារូបត្ថម្ភ Johna Burdeos, RD, បានប្រាប់ទៅកាន់ប្រភព Eat This, Not that! ទៀតថា “ការផឹកគ្រឿងស្រវឹងកម្រិតធ្ងន់ អាចកាត់ផ្តាច់លំហូរឈាម ដែលបណ្តាលឱ្យមាន ការវាយប្រហារទៅកាន់ខួរក្បាល ឬដាច់សរសៃឈាមខួរក្បាលនេះ។” លោកបានបន្ថែមទៀតថា មិនថាគ្រឿងស្រវឹង បៀរ សុទ្ធតែអាក្រក់ទាំងអស់នោះទេ សំខាន់អ្នកត្រូវចេះជ្រើសរើសវាយកមកទទួលទាន ហើយទទួលទានក្នុងកម្រិតដែលអ្នកជំនាញណែនាំ៕

អត្ថបទដោយ៖ កញ្ញា លីហួយ