អ្នកវិទ្យាសាស្ត្រអាមេរិកនៅសាកលវិទ្យាល័យ Boston និងមជ្ឈមណ្ឌលវេជ្ជសាស្ត្រ Tufts បានចាប់ដៃគ្នាសិក្សាលើមូលហេតុអ្វីបានជាមនុស្សខ្លះមានអាយុរស់នៅបានរហូតដល់១០០ឆ្នាំ ឬចាស់ជាងនេះ ដោយពួកគេបានអះអាងថា មូលហេតុមនុស្សដែលរស់នៅបានរហូតដល់១០០ឆ្នាំ ឬចាស់ជាងនេះ ក៏ព្រោះតែពួកគេមានកោសិកាភាពស៊ាំខ្លាំង ដែលអាចការពារខ្លូនបានខ្ពស់ពីជំងឺដែលមកបៀតបៀនរាងកាយ។ នេះបើយោងតាមការចុះផ្សាយរបស់វែបសាយ Vnexpress កាលពីថ្ងៃអង្គារ ទី៤ ខែមេសា ឆ្នាំ២០២៣។
ជាការពិតណាស់ធម្មតាប្រព័ន្ធភាពស៊ាំដែលមាននៅក្នុងរាងកាយរបស់យើងត្រូវបានប៉ះពាល់នឹងមេរោគ និងបាក់តេរីដែលបង្កជំងឺ ខណៈមេរោគទាំងនោះមិនមែនសុទ្ធសឹងតែអាក្រក់ចំពោះរាងកាយយើងនោះទេ មេរោគខ្លះវាចូលទៅដើម្បីបង្កើតទៅជាប្រព័ន្ធភាពស៊ាំការពារជំងឺផ្សេងៗដែលយើងត្រូវរៀនសម្របខ្លួនទៅនឹងពួកវានាពេលអនាគត។ សមត្ថភាពរបស់ប្រព័ន្ធនេះមានតួនាតីក្នុងការឆ្លើយតបនឹងការឆ្លងមេរោគធ្លាក់ចុះតាមអាយុ។ ទោះជាយ៉ាងណាក៏ដោយ អ្នកវិទ្យាសាស្ត្រសន្មត់ថា ប្រព័ន្ធភាពស៊ាំរបស់មនុស្សដែលមានអាយុដល់ទៅ១០០ឆ្នាំ រឹតតែខ្លាំងជាងមុន ជាហេតុធ្វើឱ្យពួកគេយកឈ្នះលើជំងឺកាន់តែងាយស្រួល។
ដើម្បីបញ្ជាក់ពីចំណុចនេះ អ្នកជំនាញបានវិភាគកោសិកាភាពស៊ាំក្នុងឈាមពីអ្នកស្ម័គ្រចិត្ត ៧នាក់ ដែលមានអាយុលើសពី ១០០ឆ្នាំនៅអាមេរិកខាងជើង។ ពួកគេបានកំណត់លំនាំជាក់លាក់នៃភាពចាស់ និងអាយុជីវិតរបស់មនុស្ស បន្ទាប់មកពួកគេបានប្រៀបធៀបព័ត៌មាននេះជាមួយនឹងទិន្នន័យរបស់អ្នកដទៃដែលមានអាយុកាលជាមធ្យម៧០ ទៅ៨០ឆ្នាំ ហើយបានរកឃើញថាគំរូភាពស៊ាំរបស់មនុស្សដែលមានអាយុលើសពី ១០០ឆ្នាំ មិនធ្វើតាមលំដាប់នៃភាពចាស់តាមធម្មជាតិនោះទេ។
ជាមួយគ្នានេះផងដែរអ្នកនិពន្ធ Paola Sebastiani នាយកមជ្ឈមណ្ឌលសម្រាប់វិធីសាស្រ្តវិទ្យាសាស្ត្របរិមាណ និងទិន្នន័យ និងវិទ្យាស្ថានស្រាវជ្រាវគ្លីនិក និងសុខភាពបាននិយាយថា ការរកឃើញនេះគាំទ្រការសន្មត់ថាមនុស្សរាប់រយនាក់មានកត្តាការពារនៅក្នុងខ្លួនរបស់ពួកគេដែលបង្កើនសមត្ថភាពរបស់ពួកគេក្នុងការជាសះស្បើយពីជំងឺ ឬការឆ្លងមេរោគ។
យោងតាមលោក Stefano Monti សាស្ត្រាចារ្យរងផ្នែកវេជ្ជសាស្ត្រ ជីវស្ថិតិ និងជីវព័ត៌មានវិទ្យា នៃសាកលវិទ្យាល័យ Boston វាមិនច្បាស់ទេថាតើភាពស៊ាំពិសេសនេះគឺជាហ្សែន ឬការរួមបញ្ចូលគ្នានៃកត្តាខាងក្រៅ។ អ្នកវិទ្យាសាស្ត្រសង្ឃឹមថា លទ្ធផលនៃការសិក្សានេះអាចជាមូលដ្ឋានសម្រាប់អភិវឌ្ឍការព្យាបាលវេជ្ជសាស្រ្តសម្រាប់មនុស្សវ័យចំណាស់របស់ពិភពលោក៕
អត្ថបទដោយ៖ ស្រីណុច
