ស្រ្តីដែលត្រៀមពពោះគឺត្រូវមានរឿងសំខាន់ៗជាច្រើនត្រូវយកចិត្តទុកដាក់ចាប់តាំងពីអាហារ ទម្លាប់រាល់ថ្ងៃ ការគេង ការដើរ ការឈរនិងអង្គុយជាដើម ដើម្បីរក្សាបាននូវសុខភាពល្អទាំងម្ដាយនិងទារកទាំងអំឡុងពេលពពោះ ពេលសម្រាលនិងក្រោយសម្រាលហើយ។
ជាមួយគ្នានេះតាមរយៈការសម្ភាសផ្ទាល់ជាមួយអ្នកគ្រូ ទិត សារ៉ុតដែលមានបទពិសោធន៍លើផ្នែកព្យាបាលដោយចលនាប្រមាណជា១០ឆ្នាំ និងបច្ចុប្បន្នបំពេញការងារនៅមជ្ឈមណ្ឌលសម្បទា និងព្យាបាលចលនាអាល់ហ្វា បានឱ្យដឹងថា ការធ្វើហាត់ប្រាណនិងធ្វើចលនាដោយអ្នកជំនាញច្បាស់លាស់អាចទទួលបានអត្ថប្រយោជន៍ជាច្រើនសម្រាប់ស្រ្តីដែលមានបំណងចង់មានបុត្រាបុត្រី ដែលក្នុងនោះរួមមាន៖
-ការពារការឈឺចាប់នៅចង្កេះ ត្រគាក ដោយសារបម្រែបម្រួលអរម៉ូននិងទំហំគភ៌
-កាត់បន្ថយគ្រោះថ្នាក់កំឡុងពេលនិងក្រោយសំរាល
- បង្កើនសុខភាពផ្លូវកាយនិងសុខភាពផ្លូវចិត្ត
- ការពារការឡើងទម្ងន់ខ្លាំង
- ពង្រឹងសមត្ថភាពសរសៃឈាមបេះដូងនិងសួត
- ងាយស្រួលសំរាលដោយធម្មជាតិ - កាត់បន្ថយការសម្រាលដោយការវះកាត់
- រាង្គកាយមាំមួនឆាប់រហ័សក្រោយសំរាល
- រក្សាបានភាពស្រស់ស្អាតក្រោយសំរាល។
អ្នកគ្រូបានបន្ថែមដែរថា ក្រៅពីទទួលសេវាកម្មពិនិត្យនិងថែទាំផ្ទៃពោះជាមួយញគ្រូពេទ្យជំនាញផ្នែកសម្ភព ស្រ្តី មានផ្ទៃពោះគួរតែមកទទួលយកសេវាកម្មព្យាបាលនិងធ្វើលំហាត់ប្រាណជាមួយគ្រូពេទ្យ ជំនាញព្យាបាលដោយចលនាបន្ថែមទៀត ដើម្បីធានាបានសុវត្ថិភាពម្ដាយនិងទារកកំឡុង ពេលនិងក្រោយសំរាល។