១. ធ្វើការប្រៀបធៀបកូនខ្លួនជាមួយកូនគេ។ ការវិធីសាស្ត្រមួយដែលឪពុកម្ដាយ ឬអាណាព្យាបាលភាគច្រើនក្នុងប្រទេសកម្ពុជាតែងជ្រើសយកមកប្រដៅកូន ដោយពុំបានគិតពីផលវិបាកនៃការប៉ះទង្គិចខ្លាំងលើផ្លូវអារម្មណ៍ដែលធ្វើឱ្យក្មេងងាយនឹងកើតជំងឺបាក់ទឹកចិត្តលឿនបំផុត។ តាមអ្នកឧកញ៉ាបណ្ឌិត គួច ម៉េងលី បានលើកឡើងថា មានឪពុកម្ដាយមួយចំនួនចូលចិត្តនិយាយថា កូនខ្លួនមិនលល្អដូចកូនគេ ឬប្រើពាក្យបំបាក់មុខកូននៅចំពោះមុខអ្នកដទៃតែម្តង ដែលធ្វើឲ្យក្មេងឆាប់ចាញ់ច្រាប។ ក្នុងនោះ លោកវេជ្ជបណ្ឌិតបានបង្ហើបនូវគន្លឹះប្រើចិត្តសាស្ត្រផ្ទុយ ដោយប្រើពាក្យពេចន៍លើកសរសើរ ផ្តល់ជាកម្លាំងចិត្តវិញ និងញញឹមដាក់កូនជាសញ្ញាផ្តល់ភាពកក់ក្តៅផ្នែកអារម្មណ៍... ទោះបីវាគ្មានប្រសិទ្ធភាព១០០%មែនក៏ដោយ វាជាផ្នែកមួយជួយឱ្យក្មេងកែប្រែទម្លាប់អាក្រក់របស់គេបន្តិចៗដែរ។

២. កុំរពឹងលើកូនពូកែគ្រប់យ៉ាង នាំឱ្យឪពុកម្តាយខកចិត្ត។ នេះជាផ្នត់គំនិតមួយរបស់ឪពុកម្តាយសម័យថ្មី ឱ្យកូនធ្វើអ្វីត្រូវតែពូកែគ្រប់យ៉ាងនិងល្អតាមការចង់បានរបស់ខ្លួនដូចជាស្តាប់បង្គប់ រៀនពូកែគ្រប់មុខវិជ្ជា... នេះជាការដាក់សម្ពាធធ្វើឱ្យកូនមិនអាចស្វែងរកចំណុចពិសេសខ្លាំងបំផុតរបស់ខ្លួនឯងឃើញនោះឡើយ។ តាមអ្នកជំនាញចិត្តសាស្រ្ត Amy Morin បានលើកឡើងថា កុំគ្រប់គ្រងពួកគេរហូតមិនឱ្យកូនធ្វើអ្វីសោះ ជាឪពុកម្តាយថ្វីត្បិតតែមានការព្រួយបារម្ភអំពីសុវត្ថិភាពកូនៗ ប៉ុន្តែគួរតែអនុញ្ញាតឱ្យពួកគេកម្សាន្តជាមួយសកម្មភាពខាងក្រៅខ្លះតាមបែបធម្មជាតិរបស់ក្មេង  ក្រៅពីកម្មវិធីសិក្សានិងដំណើរកម្សាន្តរបស់សាលា ដើម្បីឱ្យពួកគេស្វែងរកភាពជាខ្លួនឯង។ ការធ្វើបែបនេះ កូនអ្នកមានស្មារតីរឹងមាំមិនងាយចាញ់ច្រាបគេ មានគំនិតថ្មីៗ ដើម្បីបង្កើមសមត្ថភាពរៀនសូត្រល្អជាងមុន និងមានភាពកក់ក្តៅជាមួយឪពុកម្តាយថែមទៀត។

ដូច្នេះហើយ សូមឪពុកម្តាយកុំធ្វើរឿងទាំងពីរនេះអី នាំឱ្យកូនបានស្មារតី ឆាប់ចាញ់ច្រាបគេណាស់។ និយាយទៅ! អស់ភាពក្លាហានតតាំងជាមួយគេពេលធំឡើង។ ឪពុកម្តាយគួរលើកទឹកចិត្តធ្វើរឿងថ្មីៗ ទោះបីខុសក៏ដោយ កុំសម្លុតខ្លាំងៗ ដាក់កូន គួរតែណែនាំកូនបន្ថែម និងលើកទឹកចិត្តកូនឱ្យរឿងហ្នឹង ឱ្យសម្រេច ទើបកូនមានផ្លូវចិត្តរឹងមាំ ចេះតស៊ូក្នុងជីវិត៕ អត្ថបទដោយ៖ ទ្រ សុភាព