១. ឈឺឆ្អឹងរ៉ាំរ៉ៃ៖ ការឈឺចាប់នេះជាធម្មតាចាប់ផ្តើមបន្តិចម្តងៗ មិនខ្លាំងភ្លាមៗទេនិងកើតឡើងហើយក៏បាត់ទៅវិញ តែកើតបែបនេះញឹកញាប់។ យូរទៅការឈឺចាប់នឹងកាន់តែខ្លាំងឡើងហើយឈឺបែបនេះទៅជារុំារ៉ៃ។ អ្នកជំងឺច្រើនមានការឈឺចាប់ធ្ងន់ធ្ងរនៅពេលល្ងាច ឬនៅពេលធ្វើសកម្មភាពរាងកាយដូចជា ហាត់ប្រាណ ឬធ្វើការងារធ្ងន់។ ការឈឺឆ្អឹងប្រភេទនេះមិនសូវធូរស្រាលទេ ទោះបីជាសម្រាក ឬប្រើថ្នាំបំបាត់ការឈឺចាប់ក៏ដោយ ហើយវាខុសពីការឈឺសាច់ដុំធម្មតា ឬការឈឺដែលបណ្តាលមកពីរបួសទូទៅ។

២. ហើម ឬដុំពកនៅជិតឆ្អឹង៖ ជាធម្មតា ការហើមនេះអាចលេចឡើងបន្ទាប់ពីការឈឺចាប់កើតមានរយៈពេលមួយរួចហើយ ហើយអាចមើលឃើញនឹងភ្នែក ឬប៉ះទៅមានអារម្មណ៍ថាមានដុំពក។ នៅតំបន់់ដុំពកនោះអ្នកនឹងមានអារម្មណ៍ក្ដៅ ឬឡើងក្រហម ហើយពេលខ្លះអាចឈឺចាប់នៅពេលប៉ះ។ ដុំពក ឬការហើមណាមួយដែលមិនដឹងមូលហេតុច្បាស់លាស់ ហើយបន្តកើនឡើងក្នុងទំហំធំបងប្អូនមិនគួរមើលរំលងឡើយ ហើយគួរតែទៅពិគ្រោះជាមួយគ្រូពេទ្យឱ្យបានឆាប់។

៣. មហារីកឆ្អឹងក៏អាចធ្វើឱ្យឆ្អឹងខ្សោយពីខាងក្នុង ដោយមិនមានសញ្ញាខាងក្រៅច្បាស់លាស់ដែរ៖ ទោះបីវាមិនបង្ហាញសញ្ញាមកក្រៅច្បាស់ តែបងប្អូនអាចសង្កេតខ្លួនឯងបានព្រោះនៅពេលឆ្អឹងខ្សោយវានឹងងាយបាក់ ទោះបីបងប្អូនដួលតិចតួចក៏ដោយ។ ការបាក់ឆ្អឹងបែបនេះ ត្រូវបានគេហៅថា “ការបាក់ឆ្អឹងដោយសាររោគសាស្ត្រ” ដែលមានន័យថា ឆ្អឹងបានខ្សោយរួចទៅហើយ។ ប្រសិនបើមានការបាក់ឆ្អឹងញឹកញាប់ ឬបាក់ដោយគ្មានមូលហេតុច្បាស់ នោះអាចជាសញ្ញាថារចនាសម្ព័ន្ធឆ្អឹងកំពុងមានបញ្ហាធ្ងន់ធ្ងរ។

៤. អស់កម្លាំងញឹកញាប់ និងស្រកទម្ងន់គ្មានមូលហេតុ៖ រាងកាយត្រូវប្រើថាមពលយ៉ាងច្រើនដើម្បីប្រយុទ្ធប្រឆាំងនឹងជំងឺមហារីក ដូច្នេះអ្នកជំងឺអាចមានអារម្មណ៍នឿយហត់ ឬអស់កម្លាំងជានិច្ច ទោះបីជាមិនបានធ្វើការងារធ្ងន់ក៏ដោយ។ ជាមួយនឹងនេះ ការបាត់បង់ចំណង់អាហារ និងការស្រកទម្ងន់អាចកើតឡើងដោយមិនចាំបាច់តមអាហារ ឬហាត់ប្រាណឡើយ។ ជំងឺមួយចំនួនក៏អាចមានរោគសញ្ញាបែបនេះ ដូច្នេះបងប្អូនគួរតែទៅពិនិត្យជាមួយគ្រូពេទ្យឱ្យបានច្បាស់ប្រសិនបើមានការសង្ស័យ៕

អត្ថបទដោយ៖ សារួ