ទឹកភ្លោះ គឺជាសារធាតុរាវ amniotic ដែលនៅក្នុងស្បូនជុំវិញទារក។ ទារកលូតលាស់នៅក្នុងថង់ទឹកភ្លោះ។ ទារកមិន​អាច​រស់​បាន​ដោយ​គ្មាន​ទឹក​ភ្លោះ​នោះ​ទេ ម្យ៉ាងវិញទៀត ក្នុងអំឡុងពេលមានផ្ទៃពោះប្រសិនបើម៉ាក់ៗខ្វះទឹកភ្លោះ ​គឺប៉ះពាល់ខ្លាំង​ការ​លូតលាស់​គភ៌​ កូនអាចខូចតម្រងនោម កើតមកមិនគ្រប់លក្ខណៈ។

ជាការពិតណាស់ យោងតាមការឱ្យដឹងពីគេហទំព័រ clevelandclinic បានបញ្ជាក់ថា ស្បូនរបស់អ្នកចាប់ផ្តើមបង្កើតទឹកភ្លោះដើម្បីទ្រទ្រង់គភ៌ចាប់តាំងពីស្រ្តីមានផ្ទៃពោះរយៈពេល១២ថ្ងៃដំបូង។ ក្នុងអំឡុងពេល១សប្តាហ៍២សប្តាហ៍ដំបូងម៉ាក់ៗមិនអាចសម្គាល់ដឹងទេថា ទឹកភ្លោះលើសឬក៏ខ្វះ។ លុះត្រាតែគភ៌ក្នុងផ្ទៃអាយុបានចាប់ពី១២សប្តាហ៍ឡើងទៅទើបអាចសម្គាល់បាន។

ម៉ាក់ៗត្រូវតាមដាននិងសម្គាល់អាការខ្លួនឯង នៅពេលដែលមានផ្ទៃពោះរយៈពេល១២សប្តាហ៍ឡើងទៅ ប្រសិនបើម៉ាក់មានអាការដូចខាងក្រោមគឺជាសញ្ញាបញ្ជាក់ថាអ្នកកំពុងខ្វះទឹកភ្លោះ ឆាប់ទៅពិនិត្យនៅមន្ទីរពេទ្យ៖

·   ម៉ាក់ៗមានលេចធ្លាយសារធាតុរាវរអិលៗចេញតាមទ្វារមាសញឹកញាប់

·   ស្បូនរបស់អ្នកមានទំហំតូចជាងមុន

·   អ្នកមានអារម្មណ៍ថាកូនរបស់អ្នកមិនសូវធ្វើចលនា

·   ទម្ងន់របស់ម៉ាក់ៗឡើងមិនគ្រប់ ជាទូទៅម៉ាក់ម៉ាក់ដែលមានផ្ទៃពោះគឺត្រូវឡើងគីឡូខ្ពស់បំផុតត្រឹម១៥គីឡូពីគីឡូដើម ហើយទាបត្រូវឡើង១០ទៅ១២គីឡូពីគីឡូដើម។

ករណីម៉ាក់ៗមិនដឹងថាខ្លួនឯងខ្វះទឹកភ្លោះ មានអាការដូចខាងលើហើយមិនឆាប់ពិនិត្យគឺជះឥទ្ធិពលអាក្រក់ទៅដល់កូនដូចជា៖ កូនងាយនឹងខូចតម្រងនោមតាំងពីកំណើត កូនលើសខែមិនងាយឈឺពោះមិនងាយកើត ម៉ាក់ៗប្រឈមមុខជាមួយជំងឺទឹកនោមផ្អែម ទារកលូតលាស់យឺតខុសប្រក្រតី ឆ្អឹងខ្សោយ សុកទារកមានបញ្ហា...។

ប្រសិនជាម៉ាក់ៗមានអាការដូចដែលបានរៀបរាប់ខាងលើក្នុងអំឡុងពេលកំពុងពពោះចាប់ពី១២សប្តាហ៍ឡើងទៅត្រូវប្រញាប់ជួបពិនិត្យជាមួយគ្រូពេទ្យឯកទេសសម្ភពនិងរោគស្រ្តី។ មួយវិញទៀត ប្រសិនជាអ្នកមានអាការដូចដែលបានរៀបរាប់ខាងលើ ត្រូវបង្កើនការផឹកទឹកឱ្យបាន៣ទៅ៤លីត្រក្នុងមួយថ្ងៃ ញ៉ាំបន្លែផ្លែឈើដែលសម្បូរជាតិទឹកដូចជា ឪឡឹក ទឹកដូងខ្ចី ផ្លែប៉ោម...ជាដើម ដើម្បីបំពេញចំនួនឡើងវិញ៕

អត្ថបទដោយ៖ មឿន គន្ធា