នៅថ្ងៃទី៩ ខែមិថុនា ឆ្នាំ២០២២កន្លងមកនេះ ក្រសួងសុខាភិបាល បានចេញសេចក្តីប្រកាស ក្រើនរំឭកឱ្យមានការប្រុងប្រយ័ត្នទៅលើជំងឺពងបែកដៃជើង និង ក្នុងមាត់ បន្ទាប់ពីបច្ចុប្បន្នមានការរកឃើញអ្នកដែលមានកើត ជំងឺនេះក្នុងទ្រង់ទ្រាយតិចតួចនៅតាមបណ្តាខេត្តមួយចំនួន។ ជំងឺនេះ គឺជាជំងឺឆ្លងដែលអាចឆ្លងពីមនុស្សម្នាក់ទៅមនុស្សម្នាក់ទៀត តាមការប៉ះពាល់ផ្ទាល់ជាមួយនឹងវត្ថុរាវនៃផ្លូវដង្ហើម រួមមាន ទឹកមាត់ កំហាក ស្លេស្ម និងសំបោរ ទឹករងៃជាដើម។
យោងតាមលិខិតក្រសួងបានឱ្យដឹងថា នាពេលបច្ចុប្បន្ននេះមានការរកឃើញជារប៉េះរប៉ោះនៃជំងឺពង បែកនៅដៃជើង និងក្នុងមាត់ លើកុមារ តាមបណ្តាខេត្តមួយចំនួន។ ពងបែកនៅដៃ ជើង និងក្នុងមាត់នេះ ជាជំងឺឆ្លង ដែលបង្កឡើងដោយវីរុស ច្រើនកើតមានចំពោះទារក និងកុមារ ភាគច្រើនលើកុមារដែលមានអាយុតិចជាង១០ ឆ្នាំ ជាពិសេសកុមារអាយុក្រោម ៥ឆ្នាំ។ ជំងឺនេះកើត មាននៅក្នុងប្រទេសកម្ពុជាតាំងពីឆ្នាំ២០១២ ហើយក៏ជាជំងឺដែលកើតមាននៅប្រទេសជាច្រើនលើពិភពលោកដែរ។ ជាមួយគ្នានេះវាក៏អាចឆ្លងពីមនុស្សម្នាក់ទៅមនុស្សម្នាក់ទៀត តាមការប៉ះពាល់ផ្ទាល់ជាមួយនឹងវត្ថុរាវនៃផ្លូវដង្ហើម រួមមាន ទឹកមាត់ កំហាក ស្លេល្ស និង សំបោរ ទឹករងៃ ដែលចេញពីពងបែក និង លាមកអ្នកជំងឺ។
រោគសញ្ញាដំបូង នៃជំងឺពងបែកដៃជើងនិងក្នុងមាត់ជំងឺនេះ ជាទូទៅចាប់ផ្តើមឡើងដោយមានក្តៅខ្លួន ការហូបចុកថយចុះអស់កម្លាំង និងឈឺបំពង់ក។ ស្បែកមានរមាស់ចាប់ផ្តើមចេញក្នុង អំឡុងពេល ១ ទៅ ២ ថ្ងៃ ដោយមានស្នាមចំណុចក្រហមអុចៗ និងខ្លះ មានពង បែកនៅលើបាតដៃ បាតជើង ក្នុងមាត់ និងពេលខ្លះលើកំប៉េះគូទ ឬ អវយវៈភេទ។ រោគសញ្ញាធ្ងន់ធ្ងរនៃជំងឺពង បែកនៅដៃជើងនិងក្នុងមាត់ក្នុងចំណោមកុមារមួយចំនួនតូច។ ជំងឺពងបែកនៅដៃជើងនិងក្នុងមាត់អាចបង្កឱ្យមានជំងឺធ្ងន់ធ្ងរដែលរោគសញ្ញានៃជំងឺធ្ងន់ធ្ងរ រួមមាន រោគសញ្ញាប្រព័ន្ធប្រសាទ និងរោគសញ្ញាពិបាកដកដង្ហើម (ហត់)។
ក្រសួងបានឱ្យដឹងទៀតថា អ្នកជំងឺអាចចម្លងខ្លាំងបំផុតក្នុងសប្តាហ៍ទី១ ហេតុនេះក្រសួងសុខាភិបាលសូមក្រើនរំលឹកនិងអំពាវនាវដោយទទូចដល់បងប្អូនប្រជាពលរដ្ឋទាំងអស់បន្តបង្កើនការប្រុងប្រយ័ត្នខ្ពស់ ដោយអនុវត្តឱ្យបានខ្ជាប់ខ្ជួន និងគ្រប់ៗគ្នានូវវិធានការអនាម័យល្អ លាងសម្អាតដៃឱ្យបានញឹកញាប់ជាមួយសាប៊ូនិងទឹក ពិសេសក្រោយពីប៉ះពាល់ជាមួយនឹងវត្ថុរាវនៃផ្លូវដង្ហើមរបស់អ្នកជំងឺ៕
សូមអានសេចក្តីលម្អិតក្នុងលិខិតខាងក្រោម៖
អត្ថបទដោយ៖ កញ្ញា លីហួយ
