“បើការចាប់ផ្តើមអាជីវកម្មងាយស្រួលដូចគេនិយាយមែន មិនមែនមានអ្នករកស៊ីអនឡាញបះជើងពេញទឹកពេញដីបែបនេះទេ។” នេះគឺជាថ្លែងឡើងរបស់លោក រិន សុក្រិត្យ ដែលជានាយកប្រតិបត្តិក្រុមហ៊ុនសុក្រិត្យនិងពិភារ ខសមេធិក ដែលត្រូវបានគេស្គាល់ថាម្ចាស់ផលិតផលថែរក្សាសក់ម៉ាក “ភារព្រីមៀម”។
ដើម្បីត្រៀមខ្លួនទុកជាមុន មុននឹងឈានទៅដល់ការប្រកបអាជីវកម្មលក់ដូរអនឡាញថ្ងៃនេះក្រុមការងារចាបបៃតងនឹងលើកយកការសម្ភាសជាមួយ លោក រិន សុក្រិត្យ ដែលនឹងចែករំលែកគន្លឹះសំខាន់ៗមួយចំនួនដែលលោកអ្នកគួរដឹង ។
១. ដើមទុនថវិកា៖ ការលក់ទំនិញនៅតាមអនឡាញ ទោះតូចក្តី ឬធំក្តី គឺសុទ្ធសឹងតែត្រូវការត្រៀមថវិកាដើម្បីនាំចូលឬដើម្បីទិញទំនិញបោះដុំ (Wholesale) យកមកលក់រាយបន្តជូនអតិថិជនទូទៅ (Retail)។ ក្នុងករណីលោកអ្នកចង់នាំចូលទំនិញផ្តាច់មុខពីបរទេស លោកអ្នកត្រូវការថវិកាច្រើនពោលរហូតដល់ម៉ឺនដុល្លារ ឬសែនដុល្លារ ឬក៏ឈានដល់លានដុល្លារក៏មានដែរ។ ហើយលោកអ្នកក៏ត្រូវការថវិកាត្រៀមបន្ថែមសម្រាប់ការធ្វើទីផ្សារផងដែរ។ ឧទាហរណ៍៖ លោកអ្នកបញ្ជារទិញទំនិញអស់២ម៉ឺនដុល្លារ យ៉ាងហោចណាស់លោកអ្នកត្រូវមាន១ម៉ឺនដុល្លារដើម្បីត្រៀមចំណាយក្នុងការផ្សព្វផ្សាយ។
២. គុណភាពរបស់ផលិតផលនិងតម្រូវការទីផ្សារ៖ ទំនិញលក់នៅតាមអនឡាញ មានតម្រូវការគុណភាពខ្ពស់ណាស់ដើម្បីអាចទទួលបានការជឿជាក់ពីអតិថិជនបាន។ កត្តានេះ មុននឹងសម្រេចនាំចូលទំនិញ ឬសម្រេចចិត្តក្លាយជាតំណាងចែកចាយផលិតផលណាមួយ សូមលោកអ្នកត្រូវប្រាកដថាផលិតផលនោះមានគុណភាពពិតប្រាកដ ហើយជាផលិតផលមានតម្រូវការប្រើប្រាស់ប្រចាំថ្ងៃ។
កន្លងទៅ មានម្ចាស់អាជីវកម្មវ័យក្មេងមួយចំនួន ហាក់នៅមានភាពរវើរវាយនៅឡើយពាក់ព័ន្ធជាមួយនឹងទស្សនៈវិស័យរបស់ក្រុមហ៊ុនខ្លួន ព្រោះពួកគេមិនដឹងថាក្រុមហ៊ុននាំចូលអ្វីឱ្យពិតប្រាកដ។ ឱ្យតែគេណែនាំ ឱ្យតែគេថាអាចលក់ដាច់ ពួកគេតែងសម្រុកនាំគ្នាបញ្ជារទិញពីរោងចក្រមក ហើយយកមកបង្កើតតំណាងចែកចាយពេញទឹកពេញដី។ កត្តានេះធ្វើឱ្យពួកគេអាចប្រឈមនឹងបញ្ហាលក់លែងដាច់ ឬខាតបះដៃបះជើងដោយសារតែគ្មានអតិថិជនរាយ។
៣. យុទ្ធសាស្ត្រទីផ្សារ៖ យ៉ាងហោចណាស់ ម្ចាស់អាជីវកម្មគ្រប់រូបត្រូវស្គាល់ថាតើផលិតផលរបស់ខ្លួន គឺជាផលិតផលសម្រាប់អតិថិជនប្រភេទណា (Target Customer)? តើផលិតផលនោះគួរលក់នៅក្នុងតម្លៃណា? តម្លៃដុំថ្លៃប៉ុន្មាន តម្លៃរាយថ្លៃប៉ុន្មាន? ថាតើគួរផ្សព្វផ្សាយនៅលើបណ្តាញសង្គមផ្សព្វផ្សាយប្រភេទណា ទើបអាចទៅដល់អតិថិជនគោលដៅ? តើគួរស្វែងរកអ្នកជំនាញបែបណា ដែលអាចជួយឱ្យយុទ្ធសាស្ត្រទីផ្សាររបស់ខ្លួនជោគជ័យ រហូតឈានទៅដល់ការលក់ដាច់ច្រើនបង្កើនប្រាក់ចំណេញ?
៤. យុទ្ធសាស្ត្រលក់៖ ចង់សំដៅលើការចងក្រងលក្ខន្តិកៈអ្នកចែកចាយបន្ត (តំណាងចែកចាយ) ។ លោកអ្នកត្រូវសួរខ្លួនឯងថា តើអ្នកចង់លក់រាយខ្លួនឯង (Retail Sale) ឬលោកអ្នកចង់លក់ដុំ ឬក៏ថាចង់ស៊ីទាំងត្រីតូចទាំងត្រីធំ។ ត្រង់នេះគឺមានសារៈសំខាន់ណាស់ ដែលម្ចាស់អាជីវកម្មគ្រប់រូបត្រូវស្រាវជ្រាវឱ្យបានច្រើនអំពីការបែងចែកអ្នកចែកចាយបន្តឱ្យបានត្រឹមត្រូវជៀសវាងមានតែតំណាងចែកចាយ ប៉ុន្តែគ្មានអតិថិជនរាយ។ អ្វីដែលរឹងរឹតតែសំខាន់នោះគឺការជួយជ្រោមជ្រែងរបស់ក្រុមហ៊ុនទៅកាន់តំណាងចែកចាយ ដើម្បីពួកគេអាចលក់ដាច់ដល់អតិថិជនទូទៅបាន។
៥. ភាពជាដឹកនាំ៖ ភាពជាដឹកនាំគឺជាសរសៃឈាមរបស់អាជីវកម្មមួយ។ បើប្រធានក្រុមហ៊ុនឈ្លើយ ប្រធានក្រុមហ៊ុនលោភលន់ ប្រធានក្រុមហ៊ុនគ្មានសីលធម៌ល្អ សូមប្រធាននោះត្រៀមសារមុងសារខ្នើយឱ្យហើយទៅ។ ជាប្រធានក្រុមហ៊ុន ជាពិសេសជាម្ចាស់ប្រេនដែលមានតំណាងចែកចាយរាប់រយ រាប់ពាន់នាក់ ភាពជាដឹកនាំដ៏ល្អគឺជាកត្តាចំាំបាច់បំផុត។ ប្រធានក្រុមហ៊ុនត្រូវមានទស្សនៈវិស័យច្បាស់លាស់ និងត្រូវមានគោលការណ៍ម៉ត់ចត់ក្នុងការគ្រប់គ្រងក្រុមហ៊ុន។ អ្វីដែលសំខាន់ សូមកុំអាត្មានិយមចង់មានតែឯង ហើយសូមកុំគិតថាតំណាងចែកចាយគឺជាបុគ្គលដែលត្រូវធ្វើតាមខ្លួនទាំងអស់នោះដែរ។ ភាពជាដៃគូរកស៊ីជាមួយគ្នា គឺត្រូវការគោរពគ្នាទៅវិញទៅម ជួយគ្នាទៅវិញទៅមក ណែនាំគ្នាទៅវិញទៅមក ទើបក្រុមហ៊ុនទាំងមូលអាចរីកចម្រើនទៅមុខបាន៕
អត្ថបទ៖ កញ្ញា លីហួយ
