ការភ័យខ្លាចជាមេរោគមួយធ្វើស៊ីផ្លូវចិត្តរបស់មនុស្សឱ្យចុះខ្សោយ។ អារម្មណ៍ខ្លាចមួយនេះ អាចបង្កើតឡើងពីអ្នកនៅក្មេង ខ្វះបទពិសោធន៍ ការមើលងាយ និងការរំលាភបំពានមកលើអ្នកពីអតីតកាលជាដើម វាធ្វើឱ្យអ្នករស់ក្នុងអារម្មណ៍ភ័យខ្លាចជានិច្ច។ ហើយអ្វីដែលកាន់តែអាក្រក់ជាងនេះ គឺធ្វើឱ្យអ្នកបាត់អនាគតមិនខានឡើយ។ ដូចនេះ ដើម្បីមានអនាគតរុងរឿង អ្នកត្រូវតែមានភាពក្លាហាន ដើម្បីប្រយុទ្ធតស៊ូក្នុងពិភពលោកក្នុងពេលបច្ចុប្បន្ននេះ។
តាមលោក Ryan Holiday ជាអ្នកនិពន្ធបែបចិត្តសាស្រ្តបានលើកឡើងថា ពេលអ្នករស់នៅគ្មានភាពក្លាហានពេញលេញ ឬជាមនុស្សកំសាកនោះ អ្នកនឹងត្រូវបានសង្គមទាត់ចោលមិនខានឡើយ។ អ្នកត្រូវតែមានចិត្តតស៊ូជាមួយបញ្ហាជាច្រើនដែលរត់ចូលមកក្នុងជីវិតរបស់អ្នក។ សម្រាប់ការដោះស្រាយបញ្ហាទាំងអស់នេះ គឺអ្នកត្រូវប្រើភាពក្លាហាន គុណធម៌ និងគំនិត ទើបចិត្តរបស់អ្នករួចខ្លួនពីការភ័យខ្លាច”។
លោក Ryan បានគូសបញ្ជាក់ដែរថា បុគ្គលលាឈប់ពីការងារដើម្បីលះបង់ខ្លួនឯងចំពោះបុព្វហេតុដ៏មានអត្ថន័យបំផុត វាជាការបង្ហាញពីភាពក្លាហានក្នុងការស្វែងរកអ្វីដែលត្រឹមត្រូវសម្រាប់ជីវិត”។ លោក Ryan កំពុងប្រឹងប្រែងឱ្យអស់ពីសមត្ថភាពដើម្បីបញ្ចូលភាពក្លាហាននេះ ទប់ជាមួយការគេរិះគន់មកលើរូបលោក។ លោកនិយាយថា ពេលខ្ញុំកាន់តែចាស់ហើយមានទំនួលខុសត្រូវកាន់តែច្រើនឡើង ខ្ញុំបានដឹងថា វាមិនត្រឹមតែប៉ះពាល់ដល់ខ្លួនខ្ញុំទេ វាបានប៉ះពាល់ដល់មនុស្សដែលធ្វើការឱ្យអ្នក និងគ្រួសាររបស់អ្នក។ ដូចនេះហើយ ខ្ញុំត្រូវតែមានភាពក្លាហានដើម្បីទទួលខុសលើរឿងដែលចូលមកក្នុងជីវិតរបស់ខ្ញុំ។ ហើយវាធ្វើឱ្យជីវិតរបស់ខ្ញុំកាន់តែរឹងមាំ និងរីករាយជាងមុនផងដែរ”។
តាមសៀវភៅ ចង់ពូកែរកស៊ី ត្រូវចេះសំលៀងពូ បានសរសេរថា បើអ្នកចង់ចេញរកស៊ី សូមកុំឃាំងខ្លួនទៅមុខមិនរួច ព្រោះតែភ័យ។ អ្នកត្រូវតែទទួលស្គាល់រន្ទះបាញ់(ការភ័យខ្លាច) វាអាចធ្វើឱ្យអ្នកស្លាប់ តែទឹកភ្លៀងដែលពោរពេញដោយរន្ទះក៏បាននាំនូវក្តីរំភើប សប្បាយច្រើនសម្រាប់អ្នកដែរ។ សូមអ្នកបោះបង់ភាពភ័យខ្លាចនៅមួយដោយឡែកសិន ហើយចាប់យកឱកាសនៃការរកស៊ីដែលលោកអ្នកមិនធ្លាប់បានដើរពីមុនមក”។ ទាំងការរកស៊ី និងធ្វើកិច្ចការអ្វីក៏ដោយ អ្នកត្រូវតែរស់ក្នុងភាពក្លាហាន ទើបជីវិតរបស់អ្នកមានភាពរីករាយ មានក្តីសុខព្រោះអ្នកអាចសម្រេចក្តីប្រាថ្នានៅអ្វីដែលអ្នកចង់បាន៕ អត្ថបទទដោយ៖ ទ្រ សុភាព