មនុស្សយើងរស់នៅត្រូវការមានសុខភាពល្អ និងសេចក្តីសុខក្នុងជីវិត។ ប៉ុន្តែសព្វថ្ងៃនេះ មានមនុស្សក្នុងសង្គមកំពុងតែមានបញ្ហាផ្លូវចិត្ត មកពីចង់បានរបស់មួយដែលខ្លួនចង់បាន តែមិនបានរបស់នោះ នាំឱ្យអារម្មណ៍ប្រតិកម្មឈឺចាប់ខ្លាំងឡើង ធ្វើឱ្យជីវិតរស់គ្មានន័យ គ្មានក្តីសង្ឃឹម និងគ្មានការតស៊ូជាដើម។ បើអ្នកមានអារម្មណ៍លក្ខណៈបែបនេះ មកស្តាប់រឿងលោកវេជ្ជបណ្ឌិត Robert Schuler ជាវាគ្មិនលើកទឹកចិត្ត ជាអ្នកនិពន្ធ និងជាគ្រូគង្វាលដ៏ល្បីល្បាញមួយរូប។
មានបុរសម្នាក់បានបាក់ទឹកចិត្ត និងរស់គ្មានព្រលឹងក្នុងនោះទេ។ បុរសនោះ ក៏សម្រេចចិត្តហៅទូរស័ព្ទទៅរកលោកវេជ្ជបណ្ឌិត Robert Schuler គាត់រៀបរាប់ថា ពេលនេះ ជីវិតខ្ញុំត្រូវបានបញ្ចប់ហើយ។ លុយដែលខ្ញុំរកបាន ត្រូវបាត់បង់អស់រលីងពីខ្លួន។ ហើយជីវិតខ្ញុំ បានបាត់បង់អ្វីៗ គ្រប់យ៉ាង វាជាចំណុចសូន្យរបស់ខ្ញុំ។
បន្ទាប់មក លោកវេជ្ជបណ្ឌិត Schuller បានសួរថា “តើអ្នកអាចមើលឃើញរបស់ជុំវិញខ្លួនអ្នកទេ? បុរសនោះក៏បានឆ្លើយថា” លោកវេជ្ជបណ្ឌិត ខ្ញុំនៅមើលឃើញតើ។
ហើយលោក Schuller សួរបន្តថា “តើអ្នកអាចដើរបានទេ? បុរសឆ្លើយថា" បាទ! ខ្ញុំនៅដើរបានធម្មតា។” លោក Schuller បានប្រាប់ថា ពេលនេះ អ្នកនៅស្តាប់ខ្ញុំឮ ហើយបាននិយាយជាមួយខ្ញុំថែមទៀត។ បុរសឆ្លើយយ៉ាងប្រញាប់ថា “"បាទ! ខ្ញុំនៅស្ដាប់ឮលោកនិយាយគ្រប់យ៉ាង។"
ជាចុងក្រោយលោក Schuller បានបញ្ជាក់ថា លោកគ្មានបាត់បង់គ្រប់យ៉ាងទេ ការពិតលោកនៅមានអ្វីគ្រប់យ៉ាងដដែលហ្នឹង។ អ្វីដែលអ្នកបាត់បង់នោះ ជាលុយរបស់អ្នក ប៉ុន្តែជីវិតរបស់អ្នករស់នៅ និងមានតម្លៃណាស់។
នេះជារឿងបញ្ជាក់ថា បុរសនេះបានបាត់បង់លុយ ប៉ុន្តែគាត់នៅមានជើង ដៃ ស្តាប់ឮ និងនិយាយបាន អ្វីដែលមានទាំងអស់នេះ មានតម្លៃជាងលុយដែលគាត់បាត់បង់ទៅទៀត។ ប៉ុន្តែបុរសម្នាក់នេះ គាត់ផ្តោតសំខាន់លើលុយជាងជីវិតរបស់គាត់ទៅទៀត រួមទាំងគាត់នៅមានជីវិតនៅឡើយ។ ហើយគាត់អាចរកលុយទាំងអស់នោះមកវិញបាន។ ខ្ញុំមិនមែនថា លុយមិនសំខាន់ទេ លុយជួយឱ្យយើងទិញកាហ្វេ ទិញឡាន ទិញផ្ទះ និងទិញរបស់ជាច្រើនទៀត។ ខ្ញុំចង់ឱ្យអ្នករស់នៅមានសុភមង្គល និងមានក្តីសុខ ដោយការប្រឹងរកលុយផង រក្សាអារម្មណ៍ផ្លូវចិត្តឱ្យរឹងមាំផង និងមានសុខភាពល្អផងដែរ៕ អត្ថបទដោយ៖ ទ្រ សុភាព